రక్తపుటేరుల రాజ్యం!

[శ్రీ విడదల సాంబశివరావు రచించిన ‘రక్తపుటేరుల రాజ్యం!’ అనే కవితని పాఠకులకు అందిస్తున్నాము.]

[dropcap]ఇ[/dropcap]ప్పుడిక్కడ అరాచకం
గర్వంగా తలెత్తుకొని
రాజ్యమేలుతోంది!
పచ్చదనం ముసుగులో
హరితవనాలను మరిపించే పల్లెసీమలు..
రాజకీయ కక్షలకు వర్గ పోరాటాలకు
వేదికలుగా మారిపోయాయి!
బంధుత్వాలను విస్మరించి..
రక్త సంబంధాలను ప్రక్కన బెట్టి..
ఐకమత్య భావనకు తిలోదకాలిచ్చి..
ఆజన్మ శతృవుల మాదిరి
కొట్టుకు చస్తున్నారు!
రక్తపుటేరుల ప్రవాహంతో
సిరుల భాండాగారాలు గ్రామసీమలు
నెత్తుటి మేఘం ముసుగేసుకొని
భీతి గొలుపుతున్నాయి!
వాడెవడో..
అధికారం అందలమెక్కి ఊరేగుతున్నాడు!
వీడెవడో..
కోట్లు కూడబెట్టుకొని
ప్రతిపక్షం పాత్రలో కులాసాగానే ఉన్నాడు!
అమాయక పిచ్చి జనం మాత్రం..
అభిమానాన్ని మూర్ఖంగా గుండెల్లో దాచుకొని
ఒకరిపై ఒకరు కత్తులు దూసుకొని
గ్రామ సీమల శాంతి సౌభాగ్యాలను
రక్తచందనంతో అభిషేకిస్తున్నారు!