మేఘం పాడిన పాట!

[శ్రీమతి గీతాంజలి రచించిన ‘మేఘం పాడిన పాట!’ అనే కవితను పాఠకులకు అందిస్తున్నాము.]

[dropcap]ఎ[/dropcap]వరో మేఘ మల్హర్ రాగం పాడుతున్నట్లున్నారు..
అక్కడ ఖాళీ అయిన మబ్బుల్లో.,
తమ గుండెల్లోని.. వియోగాన్ని,
కళ్ళల్లోని కన్నీటిని.. వంపుతున్నట్లున్నారు.
ఇక్కడ నా ఆకాశంలో
కొత్త మేఘాలు.. తాజా కన్నీళ్లు!
***
ఆమె వెళ్లిపోయాక
నగరం ఖాళీ అయిపోయింది
నా హృదయంలా!
***
సమస్తమూ ఆమెకి ఇచ్చేసిన
సంగతి మరిచిపోయి
నాలో నేనే ఏదో వెతుకుతూ ఉంటాను.
***
నువ్వు నాకెన్నటికీ
దొరక్కపోవడమే ప్రేమ!
***
అవును కానీ.. నాకిది చెప్పు!
నువ్వింతగా నాకు
జ్ఞాపకానికి వస్తావని
నీకు ముందే తెలుసు కదూ..
తెలిసీ తలుపు తట్టావెందుకు..
మరిచిపోయావెందుకు?
సరేలే.. అందరూ ఉంటారు నీతో..
కానీ నేను ఉండను!
నేను లేకుండా మరి
నువ్వుండగలవేమో చూస్కో!