[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]
~
311.
ఉయ్యల నూపు వాడతడె; గిల్లువాడతడె; మరల
నుయ్యల నూపి నూరడించి పరుండబెట్టు వాడతడె,
అయ్యారే! లోని తత్త్వమిది, వికట రసికుడెయగు విధాత
అయితిమి బలి, వాడి వికటింపు వర్తనమునకు – మంకుతిమ్మ!
312.
సంధింపవో కాల కారణ కరణ కార్యములవి
ఇందు జేసిన కర్మ లెక్క లిందే ముగియింపక
ముందు జన్మల నవ్వాటిని గొనిపోవగనేల? కర్మశేషముల
బంధించు చున్నాడీ విధి నిన్ను – మంకుతిమ్మ!
313.
లెక్క వేయుటలో నిపుణుడు కాడనిపించు విధాత; మానుండి
దక్కించుకొనుటకు జన్మాంతరములు వేచియుండడ?
దక్కించుకొనగరాదె యన్నియు నిప్పుడే, ఈ జన్మలోనె
దక్కించుకొననని యనునె యంతకుండు – మంకుతిమ్మ!
314.
కర్మఋణశేషములవి మిగిలి బీజములై
మరుజన్మలో నవి మానులై వెలయకున్న
పరబ్రహ్మ యుద్యానవనమది శాశ్వతమెట్లగు?
అరయ సృష్టి మర్మమిది – మంకుతిమ్మ!
315
ధనము నార్జింప ఛలము, దంభముగ మెరయ నిచ్చయు
ఘన గేహంబును గట్టు గోర్కెయు, సుఖసంసారపు నాశయ
వేన వేలవి యున్నవి కోర్కెల వెంపరలాటలు
ఎనలేని బలము నిచ్చుచున్న వివియే జగానికి – మంకుతిమ్మ!
316.
తనదంతటదేదీ లేదని దిర్దిరిగి తానె తూలి పోవు
తన బలంబుడిగిన తరి బొంగరము వాలిపోవు
తనదు బలము సన్నగిల్లిన తరి నరుడును ధర కొరిగిపోవు
యునికి యస్థిరము నరునకీ జగాన – మంకుతిమ్మ!
317.
పాప పుణ్యముల మిశ్రమ మీ నరుడు; నెలసిన నేలయు
లోపలి భావంబులును గొనుపోవునాతని పుణ్యపాపంబుల కడకున్,
పాపపుణ్యములవి నలుపు తెలుపులు – విమర్శింపగా రాదే
నెపంబున నైన నెవరినైన – మంకుతిమ్మ!
318.
విదూషకుడీ విధాత, పరిహాసమాడు వికటంబుగ మన తోడ
వదనమా గాంభీర్యము; నవ్వించు చక్కిలిగిలి వెట్టి,
మృదువుగ నుపచరించు, త్రాగించు మిరియాల కషాయము
ఇదియె వాడి లోకపాలనా రీతి – మంకుతిమ్మ!
319.
పంచభూతములట, పంచేద్రియములట!
పంచమమే యేల? చతుష్ట, షట్కంబులు కాగూడదే!
పొంచియున్నాడు విభుడు, ఏమున్నదో వాడి తంతు
వంచితులే కద మనమందరము – మంకుతిమ్మ!
320.
ఐదో, లేక ఇరవై యైదో, ఈ మూలభూతముల సంఖ్య!
ఏదైననూ, వాటి గుణము లేవైనను చేయునదేమున్నది
అదైనను అరకొఱగా తెలిసిన, పూర్తి తెలిసినటులౌనె?
ఆ ధాత పరతత్త్వము దెలియ సులభ సాధ్యమె – మంకుతిమ్మ!
(ఇంకా ఉంది)
