[dropcap]స[/dropcap]మాజంలో
సంచరిస్తున్నప్పుడు
మాటల ఈటెలు గుచ్చుకోవడం
చేతల గాయాలవడం మామూలే..!
ఉన్నత మనస్తత్వాలు..
ఉదాత్త వ్యక్తిత్వాలు..ఎదురయ్యే సందర్భాలు
బహు తక్కువే!..
అలాంటి క్షణాల్లో
ఓ మంచి స్నేహం
వెన్నెల చల్లదనాన్ని చూపిస్తుంది..
సాత్విక వచనాలు
కలత చెందిన హృదయానికి
నవనీత లేపనంలా గాయాన్ని మాన్పుతుంది..
‘అక్కర’ వచ్చినప్పుడు
అక్కున చేర్చుకున్న చేతులే..ఆపన్న హస్తాలు !
ఊరటనిచ్చే మాటలే..తేనెల చిలకరింపులు !!
అలాంటప్పుడే తెలుస్తుంది..
ముళ్ళను రూపొందించిన ఆ దేవుడు
పూలనెందుకు సృష్టించాడోనని !!!
