[dropcap]ఎ[/dropcap]న్ని నాళ్ళ ముచ్చటో అది…
ఇప్పటికీ నా మదిలో శాశ్వతమై
అపురూపమైన జ్ఞాపకంగా నిలిచిపోయింది!
నా కలల రాణి అందాన్ని ఆరాధిస్తూ
నిదుర రాని కనులతో
ఆనాటి ఉషోదయ సంధ్యలో
నిన్ను ప్రేమించే నా హృదయం
నీ వాకిటి ముంగిట చేరి
శుభోదయం పలికింది!
రేయంతా వెన్నెల జలపాతంలో
తడిసి మురిసిన ముగ్ధమోహన సౌందర్యంతో
నా కన్నుల ముందు సాక్షాత్కరించావు!
నీ చూపుల విసిరిన
చిరునవ్వుల వెలుగు రేకలకు
నా చుట్టూ అలముకున్న చీకటి తెరలు
కనుచూపు మేర కనిపించకుండా
కనుమరుగై పారిపోయాయి!
రేయి మొత్తం కలల గుర్రమెక్కి
నీ ప్రేమ సామ్రాజ్యంలో దౌడు తీశా ఒంటరిగా…!
నీవు వెంట ఉన్నావనే ఊహల్ని
హృదయం లోగిలిలో దాచుకొని
కౌముదీ కాంతులను తోడు తీసుకొని
ఉదయానికి ముందే
వేకువ పొద్దున…
నీ చిరునవ్వుల రహదారిలో
నీ కాలి అందియల సవ్వడి కోసం
నేను ఆశగా నిరీక్షిస్తోన్న
ఆ అమృత ఘడియల్లో….
జాబిలి నుండి జాలువారిన మంచు వెన్నెలవై
నన్ను పూర్తిగా ఆక్రమించి…
ఆనంద తరంగాలలో ఓలలాడించావు!
