[box type=’note’ fontsize=’16’] ప్రసిద్ధ హిందీ/ఉర్దూ కవి, సినీ గీత రచయిత శ్రీ సాహిర్ లుధియాన్వీ శత జయంతి సంవత్సరం సందర్భంగా వారి ఎంపిక చేసిన కొన్ని కవితలను ‘మేరే దిల్ మె ఆజ్ క్యా హై’ శీర్షికతో స్వేచ్ఛానువాదం చేసి సంచిక పాఠకులకు అందిస్తున్నారు గీతాంజలి. [/box]
లోకంలో ప్రతి వస్తువూ.. ఉండాల్సిన చోటే ఉంది!
[dropcap]అ[/dropcap]వును..
ఒక్ఖ నువ్వు తప్ప.. లోకంలో అన్నీ ఎక్కడ ఉండాలో అక్కడే ఉన్నాయి.
ఒకప్పుడు.. నిన్ను చూసుకున్న
చూపులూ.. వాటి అర్థాలూ అక్కడే ఉన్నాయి.
నా ఆశలు చేసే సైగలు కూడా..
నిశ్శబ్దంగా ఇంకా అక్కడే ఉన్నాయి!
చెప్పుకోవటానికేంలే.. అన్నీ ఉన్నాయి.
కానీ… నిజానికీ ఏమీ లేవక్కడ!
నా ప్రతి కన్నీటి బిందువులో..
నేను కోల్పోయిన సంతోషాల మెరుపు ఉంది.
నా ప్రతి శ్వాసలో గతించిన ఘడియల దుఃఖపు అల ఉంది.
ప్రేయసీ..
నువ్వెక్కడైనా ఉండుగాక..! నీ నొప్పి మాత్రం నా తోనే ఉంది.
ప్రియా.. ఇప్పుడిక ఏ మనో వాంఛా లేదు… ఆశా లేదు.. చెప్పొద్దు.. భరోసా కూడా లేదు!
నీ జ్ఞాపకాలు తప్ప నా దగ్గర ఇంకేమీ లేవు!
అసలు ఆ జ్ఞాపకాలైనా ఉన్నాయో లేవో… ఆ నమ్మకమూ లేదు.
ఈ లోకంలో ఏది ఎక్కడ ఉండాలో సరిగ్గా అన్నీ అక్కడే ఉన్నాయి.
ఒక్క నువ్వు తప్ప..
నిజం చెప్పు..
నువ్వెక్కడున్నావని?
నా దగ్గరైతే లేవు మరి!
మూలం: సాహిర్ లుథియాన్వి
స్వేచ్ఛానువాదం: గీతాంజలి
