[box type=’note’ fontsize=’16’] ప్రసిద్ధ హిందీ/ఉర్దూ కవి, సినీ గీత రచయిత శ్రీ సాహిర్ లుధియాన్వీ శత జయంతి సంవత్సరం సందర్భంగా వారి ఎంపిక చేసిన కొన్ని కవితలను ‘మేరే దిల్ మె ఆజ్ క్యా హై’ శీర్షికతో స్వేచ్ఛానువాదం చేసి సంచిక పాఠకులకు అందిస్తున్నారు గీతాంజలి. [/box]
నిన్నా – నేడు! {కల్ ఔర్ ఆజ్}
[dropcap]ఈ[/dropcap] రోజు కూడా మబ్బులు కమ్మాయి..
బహుశా వర్షం ఏ క్షణాన్నో కురవచ్చు.
కానీ.. కవి ఆలోచనలో ఇంకేదో ఉంది.
బస్తీ మీద కూడా మబ్బులు కమ్ముకున్నాయి..
కానీ ఈ బస్తీ ఎవరిది?
ఈ భూమ్మీద అమృతం కురుస్తుంది
కానీ ఈ భూమి ఎవరిది?
రైతుల పంటపొలాలని నాగళ్లు దున్నుతాయి
భూమి నుంచి ఆ నిరుపేదల కష్టం ఉవ్వెత్తున పొలమై లేస్తుంది.
పంటలు కోసి శ్రామికులు ధాన్యం కుప్పలుగా పోస్తారు.
కానీ ..ఆఖరుకి ఏమవుతుంది?
భూస్వాములు వచ్చి ఆ శ్రమనంతా దోచుకుని డబ్బులు చేసుకుంటారు
ముసలి రైతుల ఇంట్లోకి మాత్రం వ్యాపారస్థుడు అడవి కోడై దూరిపోతాడు
అప్పుల.. వడ్డీల మాయజాలంలో ఇంటి ఆడబిడ్డ అమ్ముడుపోతుంది
ఇదే కదా నిన్నా.. నేడు జరిగింది ?
రేపు జరగబోయేదీ ఇదే కదా..
కష్టం రైతుది.. కానీ లాభం భూస్వామిది ఎందుకైంది?
పంటా..భూమీ రెండూ రైతువి ఎందుకు కాలేదు?
భూమ్మీద రైతు అమృతం పండిస్తాడు..
కానీ భూమి ఎవరిదైంది?
నిన్నే కాదు ..చరిత్ర అంతా అన్నార్తులు ఆకలితో అలమటించిపోయారు
ఈ రోజు కూడా జనం అంతే ఆకలితో ఉన్నారు..
నిన్న కురిసిన వర్షమే
ఈ రోజు కూడా కురిసి ఉంటుంది
నిన్నటి దోపిడీయే..
ఈ రోజూ కొనసాగుతున్నది
దాని గురించే మరి నాలోని కవి ఆలోచిస్తున్నాడు ..
అదిగో..అలా చూడండి..
నాకు కనిపించేది మీకూ కనిపిస్తోందా?
ఈ రోజు కూడా ఆకాశం నిండా మబ్బులు కమ్ముకున్నాయి
మారు మూల పల్లెల్లో బీద రైతుల ఆకలి కేకల మధ్య
ఇక ఏ క్షణంలోనో వర్షం కురవచ్చు!
మూలం: సాహిర్ లుథియాన్వి
స్వేచ్ఛానువాదం: గీతాంజలి
