[dropcap]స[/dropcap]మాజ దేహం మీద రాచకురుపు లేచింది!
అది పగిలి, చీము, రసి, కారుతూనే ఉన్నాయి.
శస్త్ర చికిత్స చేసి దాన్ని తొలగించే మొనగాడెవరూ
అధికారంలోకి రాలేదింత వరకు.
విచిత్రమేమంటే జనం కూడ అవినీతికి అనుకూలమే
అక్రమ సంపాదనతో వేల కోట్లకు పడగ ఎత్తిన వారు
హీరోలుగా చలామణీ అయ్యే దేశం మనది!
పనైపోవడానికి సంతోషంగా ముడుపులు సమర్పించుకోవడం
మనకు సిగ్గులేని సంస్కృతిగా మారింది!
కాబోయే అల్లుడికి ‘పై ఆదాయం’ బాగానే ఉంటుందని
అదో అదనపు అర్హతలాగా మురిసిపోయే దౌర్భాగ్యం!
‘అనిశా’ అని ఒకటుంది కానీ
బహుశా అది అజాగళ స్తనమే!
రాజకీయ ప్రత్యర్థులపై ప్రతీకారాస్త్రమే తప్ప
నిర్మూలన అది చేసేది సున్న!
భ్రష్టాచారం కొత్త పోకడలు పోతో
‘క్విడ్ ప్రో కో’ లాంటి ప్రయోగాలు తెచ్చింది.
కథలకూ, కవితలకూ ఇతివృత్తంగా ఉంటూ
అవినీతి మరింత సృజనాత్మకమయింది.
లంచం తీసుకొనేవాడూ, ఇచ్చేవాడూ నేరస్థులే, శిక్షార్హులే!
దోషులను దండించడంలో మన న్యాయవ్యవస్థ
నత్తకేమీ తీసిపోదని చిత్తగించండి
అవేవో అరబ్ దేశాలలో ఉన్నట్టు
అవినీతి అజగరాలకు కాలో చెయ్యే తీసేస్తేగాని
ఈ జాడ్యం వదలదు ఎన్నటికీ
అవినీతిపై పోరు కేవలం ‘ఉటోపియా’ కాకూడదు
అది జనహితమై పరిఢవిల్లాలి
