[dropcap]నే[/dropcap]ను పంచ భూతాల్లో ఒక భూతాన్ని.
భూతమంటే భూతముకాదు దెయ్యాన్ని కాదు.
మారు పేరు ప్రాణవాయువుని.
నేను లేనిదే జీవి లేదు. జీవే నేను
నేనే జీవి.
నేను అనంత విశ్వంలోంచి
అప్పుడే పుట్టే దేహాల ఊపిరితిత్తులలో చేరి
దేహానికి ప్రాణప్రదం చేస్తూవుంటాను .
జీవుల మనుగడకు సహకరిస్తుంటాను.
నేను జీవి ఊపిరితిత్తులలో
ఆడుకుంటాను. ఊపిరితిత్తులలోనించి
బైటకి లోపలకి ప్రయాణిస్తూ ఆడుకుంటాను.
నా ఆట భలేగా సాగుతూ ఉంటుంది.
కానీ ఈ ఆట యెంత కాలం సాగుంతుందో
నాకే తెలియదు.
నా ప్రయాణం సుదీర్ఘమూ కావచ్చు
లేక హ్రస్వమూ కావచ్చు.
కాలుని దయా దాక్షిణ్యాలమీద
ఆధారపడి ఉంటుంది.
కాలునికి కోపమొస్తే నన్ను
వెంటనే జీవి నుండి వెడలమని
ఆదేశిస్తే నా ఆట కట్టినట్టే.
కాలునికి కోపమొచ్చిననాడు
నన్ను జీవి నుండి వెడలమని
ఆదేశిస్తే నేను నా ఆటను కట్టి పెట్టి
కాలుని ఆజ్ఞ మేరకు
అనంత విశ్వంలో కలసి పోవలసిందే.
ఊపిరి లో ఊపిరినై
ఆడుకుంటుంటే
నన్ను ఈ విధంగా
ఆటలు చాలించి జీవిని విడిచి వెళ్ళమని
జీవాన్ని నిర్జీవిని చేయుటకై
కాలుడు ఆదేశించటం
న్యాయమేనా ?
నా ఆట అంతటితో ఆగదులే
నేను ఊరుకుంటానా మరలా
వేరొక దేహంలో చేరి పుట్టుకొస్తాను
మరలా మరలా
ఆడుకుంటానే వుంటాను
సృష్టి వున్నంతవరకు.
ప్రాణాల్ని నిలపటమే కాదు.
విధ్యంసం సృష్టించడమూ నా పనే
నేను అతి త్వరగా అమెరికా వెళ్ళాలి.
నేను టోర్నిడోగా మారి విధ్యంసం సృష్టించాలి.
మారణ హోమం చేయాలి.
నేను యెంత ఉపకారినో అంతే అపకారినికూడా.
ఎప్పుడు ఏ విధంగా మారుతానో
నాకే తెలియదు.
నాకు కోపమొస్తే విలయ తాండవం చేస్తాను
మరి వుంటా అనను దేశ దిమ్మరిని కదా
టా టా ఇక వెళ్తా.
