ప్రపంచ మానవులారా… ఏకం కండి!

[dropcap]ఇ[/dropcap]ది…
ప్రకృతి సృష్టించిన ప్రళయం కాదు!
ఆ ఉన్మాది మెదడు పొరలలో జనియించిన
వికృత వికార చేష్టల పరాకాష్టకు ప్రతిరూపం!
విశ్వమానవ జాతి విన్నపాలను
బూటు కాళ్ల క్రింద తొక్కిపెట్టి
విశ్వశాంతి నినాదానికి చరమగీతం పాడి
మానవ హననానికి శ్రీకారం చుట్టాడు!
విశృంఖల వికటాట్టహాసంతో
మరణ మృదంగ ఘోషను
వీనుల విందుగా అనుభూతిస్తూ…
శవాల గుట్టలపై కరాళ నృత్యం చేస్తూ…
రాక్షసానందంతో
ప్రపంచ మానవాళిని
మృత్యు గుహ్వరం ముందు నిలిపాడు!
దశాబ్దాల కాల చక్రం ఇరుసు కింద…
పగిలి ముక్కలై పోయిన
తన సామ్రాజ్య చిహ్నాలను
ఒక్కటిగా అతికించాలని…
సార్వభౌమాధికారాన్ని చేజిక్కించుకొని
పూర్వ వైభవాన్ని పొందాలని…
విశ్వవిజేతలా వెలుగొందాలని…
రాజ్యకాంక్షను గుండెల్లో దాచుకొని…
మారణహోమం మొదలెట్టాడు!
ప్రపంచ మానవులారా… ఏకం కండి
శాడిస్టు నియంత పీచమణచి
విశ్వజగతిలో…
శాంతి బీజాలు నాటండి!