[dropcap]వి[/dropcap]షయ తీవ్రతను తగ్గించేది విషాన్ని సైతం అమృతంగా మార్చేది ‘హాస్యరసం’. ఇది మనందరికీ అవసరం. ఆరోగ్యానికి హాస్యమే ఆహారం. ఆరోగ్యమే మహా సంపద. ‘సాహిత్య శ్రీ’ కొండూరి కాశీవిశ్వేశ్వరరావు గారు అందిస్తున్న హాస్యరంజని (నవ్వుల శతకం) ఆస్వాదించండి.
71. చిటికలు
ఆఫీసర్: నీకు చిటిక వేయడం వచ్చా?
అభ్యర్థి: నాకు ఉద్యోగం ఇవ్వమని అడిగితే, చిటికేయమంటారేమిటి? నాకు చిటిక వేయడం రాదు.
ఆఫీసర్: మరి కండక్టర్ ఉద్యోగంలో చిటిక వేస్తూ టిక్కట్లు ఇవ్వాలి కదా! అందుకనే ఈ ఉద్యోగం నీకు రాదు. వెళ్లు! నేర్చుకొని మళ్ళీ రావయ్యా!
72. చెముడు
ఆండాళ్లు: అబ్బాయి బానే ఉన్నాడు కానీ, చెముడు ఉన్నట్లుంది. ఈ సంబంధం మనకొద్దండి.
కామేశం: అది చెముడు కాదే, అబ్బాయికి మ్యూజిక్ అంటే ఇష్టమట.
73. వంకర టింకర
సీతారామ్: ఎవడయ్యా వాడు మతిలేని వాడు, తన భవంతిని వంకర టింకరగా కట్టుకున్నాడేమిటి?
అప్పలకొండ: మతి ఉండే కట్టుకున్నాడు లేవయ్యా!
సీతారామ్: అంటే నాకు దృష్టి లోపమా?
అప్పలకొండ: ఆ విషయం నాకు తెలియదు కానీ, తన ఇల్లు వంకర టింకరగా ఎందుకు కట్టాడో తెలుసా, ఈ మధ్యన వచ్చే భూకంపంలో సరియైపోతుందనియట! తెలుసుకో!
74. శిక్ష
ప్రిన్సిపాల్: నీకు ఉద్యోగం ఇస్తాను కానీ, పిల్లల హోమ్ వర్క్ చేయాలి మరి!
టీచర్: నేనెందుకు చెయ్యాలండీ! వాళ్ళే చేస్తారుగా?
ప్రిన్సిపాల్: వాళ్లు చేయరు, కొడితే మనల్ని జైల్లో పెడతారు. అందుకని మనమే వాళ్ల హోమ్ వర్క్‌లు చేయాలి.
75. కవిత
రామ్: ఆయన ఇంటికి ‘కవిత’ అని పేరు పెట్టాడు. అతను కవా?
లక్ష్మణ్: కవి కాదు, కాకరకాయా కాదు.
రామ్: ఇంతకూ ఎవరో చెప్పవయ్యా!
లక్ష్మణ్: ఆయన కవితల పోటీలు పెట్టాడు. ఎంట్రీ ఫీజులు కొట్టాడు. ఆపై ఇల్లు కట్టేశాడు.
76. తూలుతూ
గంగరాజు: ఈయనెవరండీ తూలుతూ సభా వేదిక మీదకు వస్తున్నాడు?
సభాపతి: మీరు రచించిన గ్రంథంపై తులనాత్మక విమర్శ చేయటానికి వస్తున్నాడండీ!
77. కొత్త బట్టలు
వియ్యంకుడు: పండక్కి అబ్బాయికి బట్టలు పెడతానని ఈ ముష్టి జీను ప్యాంట్, టీ షర్టు మా అబ్బాయి కిస్తారా.. ఛ..
వియ్యపురాలు: ఈ రోజుల్లో కుర్రాళ్ళు ఇష్టపడి మరీ తొడుగుతున్నారు కదా అన్నయ్య గారూ! అయినా ఒక సంవత్సరం వరకు ఉతకక్కరలేదు. చిరిగిపోవు కూడా! ఖర్చులుండవుగా!
78. టెస్ట్ ట్యూబ్ భవన్
శరత్: మీ ఇంటికి ‘టెస్ట్ ట్యూబ్ భవన్’ అని పేరు పెట్టారు, మీరు పరీక్ష నాళికల వ్యాపారం చేస్తారా?
భరత్: నా పిల్లలిద్దరూ టెస్ట్ ట్యూబ్ బేబీలు. అందుకే!
79. ట్విస్ట్
డైరక్టర్: ఇన్ని ట్విస్టులతో సినిమా తీస్తే జనం అసలు చూడడం లేదు. ఎందుకు చెప్మా?
కమేడియన్: అదే ప్రేక్షకులు ఇచ్చిన ట్విస్ట్ మరి!
80. పెనిమిటి
గత జన్మయందు నీకు
నాతో ఉంది ఎనిమిటి
అందుకే అయ్యాను నేను
నీకు పెనిమిటి
ఇదంతా వ్రాశాడు
పైనున్న ఆల్‌మైటీ
ఇదే యూనిటీలో
డైవర్సిటీ
(మళ్ళీ కలుద్దాం)
