అలుపెరగని బాటసారి!

[శ్రీ గొర్రెపాటి శ్రీను రచించిన ‘అలుపెరగని బాటసారి!’ అనే కవితని పాఠకులకి అందిస్తున్నాము.]

[dropcap]ని[/dropcap]ర్దయగా కాలం సంధిస్తున్న ప్రశ్నలకు
సమాధానాలు అన్వేషిస్తూ
మౌనంగా సాగుతుంటాను!
గత జ్ఞాపకాలే జీవితంగా బ్రతకలేను
రేపు ఏమి జరుగుతుందో తెలియకపోయినా
నిర్భయంగా వర్తమానాన్ని ఆస్వాదిస్తూ జీవిస్తుంటాను!
మది నిండా అమావాస్యల చీకట్లు కమ్మేస్తున్నా
ఆత్మవిశ్వాసాన్ని వీడను!
కొన్నిసార్లు ఆనందాలు ఎదురై పరవశాలను పరిచయం చేస్తుంటే
సంబరానికి మారుపేరై నిలుస్తాను!
జీవితమంటే సప్తవర్ణ మయమైన ఇంద్రధనుస్సని గ్రహించి..
విభిన్నభావాలను గుండెలకు హత్తుకుంటూ..
చెక్కుచెదరని ధీరత్వాన్ని వెంటబెట్టుకుని
అడుగులు ధీమాగా ముందుకే వేస్తుంటాను!