[డా. చెళ్లపిళ్ల సూర్య లక్ష్మి గారి ‘Soul-searching’ అనే ఆంగ్ల కవితను అనువదించి అందిస్తున్నారు కొల్లూరి సోమ శంకర్.]
[dropcap]నా[/dropcap] వెన్ను విపరీతంగా నొప్పెట్టింది, ఆశ్చర్యం కలిగింది
‘ఈ మధ్య తగిన దెబ్బ వల్ల కావచ్చు’ అనుకున్నా.
కాని నా మనసు నమ్మకంగా చెప్పింది,
‘నిన్ను పొడిచిన అన్ని వెన్నుపోట్ల ఫలితం అది’
నా కడుపు తీవ్రమైన మంటతో విలవిల్లాడింది
ఈమధ్య ఏర్పడిన అసిడిటీ వల్ల అనుకున్నాను
కాని నా మనసు నమ్మకంగా చెప్పింది,
‘సమాజం నీలో నింపిన నెగటివిటీ ఫలితం అది’
నా అవయవాలు బాధతో మూలిగాయి, నేను చిరాకుతో భుజాలెగరేస్తూ
మీద పడుతున్న వయసుపై నింద మోపాను.
కాని నా మనసు నమ్మకంగా చెప్పింది,
‘ఋజువర్తన కోసం నువ్వు తిన్న అన్ని గట్టి దెబ్బల ఫలితం అది’
నేను నా ఆత్మని అడిగాను, జవాబిచ్చింది ఉదాసీనంగా
‘విశ్వాసం ఉన్న చోట, వెన్నుపోటుంటుంది;
సానుకూలత ఉన్న చోట; ప్రతికూలత కూడా ఉంటుంది;
‘నిజాయితీ ఉన్న చోట, అన్యాయపు పీడన ఉంటుంది.’
ఇంకా చెప్పింది, ఆనందంగా, ‘గుర్తుంచుకో
ఇతరులు అనుమానించినప్పుడు నువ్వు నమ్మావు;
ఇతరులు మూర్ఖంగా ఉన్నప్పుడు నువ్వు హేతుబద్ధంగా ఉన్నావు;
ఇతరులు స్వార్థంతో ప్రవర్తించినప్పుడు, నువ్వు సత్యం కోసం నిలిచావు.’
‘అందుకే, సదా సంతోషాన్ని ఎంచుకో, చెడుని విస్మరించు;
నీకు ఎదురైన మంచికంతటికి కృతజ్ఞత చూపించు.
వాంఛనీయమైన ఈ వైఖరి, అంత సులువుగా అలవడదు;
అలవర్చుకుంటే, శారీరక బాధ – నీ హృదయంలోని పరమానందం ముందు దూదిపింజయి పోతుంది.’
~
ఆంగ్ల మూలం: డా. చెళ్లపిళ్ల సూర్య లక్ష్మి
అనువాదం: కొల్లూరి సోమ శంకర్.
