[సుగుణ అల్లాణి గారు రచించిన ‘నీలో నీవై..’ అనే కవితని పాఠకులకు అందిస్తున్నాము.]
[dropcap]గుం[/dropcap]డె అట్టడుగు పొరలను తట్టి చూడు
మమతల వెల్లువ ఉప్పొంగి పారదా!
అనుమానపు ముల్లును పెకిలించి చూడు
కళ్ల ముందు పచ్చనిపూల పల్లకి కనిపించదా!
మనుస్సు నొప్పించకుండా మాటాడి చూడు
స్నేహపు తోట నీ ముంగిట విరియదా!
అర్థించే చేతులకు ఆసరా ఇచ్చి చూడు
ఆనందమంతా నీ మదిలోనే నిలిచిపోదా!
నాదను స్వార్థాన్ని విడనాడి చూడు
అంబరమంత అభిమానం నీదై పోదా!
నీలోని అసూయను ఆవలకు నెట్టి చూడు
అవని అంతా నీకు అనుకూలమై పోదా!
ఎదనిండా ప్రేమను నింపుకుని చూడు
మది గదినిండా వెన్నెల వెలుగులే కదా!
ఒకసారి నీ అంతరంగం లోకి తొంగిచూడు
వన్నె తేలిన వ్యక్తిత్వం నిను పలకరించదా!
