[‘చిట్టితల్లి’ అనే మకుటంతో శ్రీమతి వి. నాగజ్యోతి ఆటవెలదులలో బాలబాలికల కోసం అందిస్తున్న పద్య శతకం.]
71.
సద్విమర్శ సతము సంభవించినపుడె
యశము నాకసమ్ము నందుకొనును
కమ్మటమ్ము వలన కనకమ్ము ప్రభలొందు
చెప్పుచుంటి వినుము! చిట్టి తల్లి!
~
72.
గంగ నీరు తోడి కడలిలో కలిపినన్
కడలి యుప్పదనము సడల దెపుడు
మూఢమతుల మార్చ మూర్ఖత్వమే యౌను
చెప్పుచుంటి వినుము! చిట్టి తల్లి!
~
73.
వినుటకిష్టపడక పెద్దల పలుకులు
దూరముంచ వలదు భారమనుచు
బంధములను నిలుపు వారధి వారమ్మ
చెప్పుచుంటి వినుము! చిట్టి తల్లి!
~
74.
సౌఖ్యమున్నదనుచు సంతసమ్ము వలదు
బద్దకమ్ము బెంచు బాటయదియె
కష్టపడుట మేలు కాయమున్న వరకు
చెప్పుచుంటి వినుము! చిట్టి తల్లి!
~
75.
చిన్న తప్పుకెపుడు శిక్షవేయతగదు
కలత కలుగజేయ ఫలము రాదు
మేలు పల్కులెపుడు మేలొనగూర్చును
చెప్పుచుంటి వినుము! చిట్టి తల్లి!
~
76.
పెడసరంపు మాట పెంచును వైరమ్ము
పరుల గించపరుచఁ బాడికాదు
పలకరింపు నందె తెలియును నీప్రేమ
చెప్పుచుంటి వినుము! చిట్టి తల్లి!
~
77.
నిశ్చయమ్ము జేయ నీరసించవలదు
కడగు నీదు దారి కఠినమైన
విజయ మొసగు నీదు వేసట శస్త్రమై
చెప్పుచుంటి వినుము! చిట్టి తల్లి!
~
78.
కులము పేరు చెప్పి క్రూలదోయవలదు
మానవత్వమున సమానమైన
గుణము మానవునకు ననిశ ముండవలెను
చెప్పుచుంటి వినుము! చిట్టి తల్లి!
~
79.
తక్కువ కులమంచు తలదంచ వలదమ్మ
తూలనాడ తగదు తోటివార
నంతరమ్ము వలనె యాగడమ్ముపెరుగు
చెప్పుచుంటి వినుము! చిట్టి తల్లి!
~
80.
మంచిపనుల నీవు నెంచిచేయునపుడు
పరుల మెప్పు కొఱకు ప్రాక తగదు
ఆచరించు పనుల నవసరమ్ముల జూడు
చెప్పుచుంటి వినుము! చిట్టి తల్లి!
(ఇంకా ఉంది)
