[శ్రీరామనవమి సందర్భంగా శ్రీ గొర్రెపాటి శ్రీను రచించిన ‘ఆదర్శప్రాయుడు శ్రీరాముడు’ అనే కవితని పాఠకులకి అందిస్తున్నాము.]
[dropcap]తం[/dropcap]డ్రి మాట జవదాటని సుపుత్రుడు
అడవులు బాట పట్టిన వీరుడు!
సహోదరుల పట్ల
అమిత వాత్సల్యంతో
మసలుకున్న ఉత్తముడు!
కట్టుకున్న భార్యను
రావణుడనే రాక్షసుడు అపహరిస్తే
సముద్రాన్ని నిలువునా చీల్చి
వారధిని నిర్మించి
లంకకు చేరి
దశకంఠుడిని సంహరించిన అజేయుడు!
రామభక్తితో
సదా రామనామ స్మరణతో
దగరైన ఆంజనేయుడిని గుండెలకి హత్తుకున్న
సాక్షాత్తు శ్రీమన్నారాయణ స్వరూపం!
భక్తితో ఎంగిలి పండ్లను సమర్పించిన శబరికి
మోక్షాన్ని ప్రసాదించిన
మహిమాన్వితుడు సద్గుణ సంపన్నుడు!
రాతిని నాతిగా మార్చి
ఇలలో జనులచే కీర్తించబడిన
రఘువంశ ఘనుడు!
‘శ్రీరామ’ అంటూ మనస్సున తలిస్తే
సకల పాపాలను తొలగించి
మనసంతా భక్తి పారవశ్యాన్ని నింపే
ఆనందకారకుడు శ్రీరాముడు!