[నెల్లుట్ల సునీత గారు రచించిన ‘ఆవిష్కృతి’ అనే కవితని పాఠకులకు అందిస్తున్నాము.]
[dropcap]ఆ[/dropcap]మె ఉనికి కోసం
మనుగడ కోసం
కళ్లెం వేసి నియంత్రించిన
కట్టుబాట్ల బంధనాలను
తెంచుకొని
తనను తాను ప్రతినిత్యం
చెక్కుకుంటూనే ఉంది
రెప్పల చాటున
దాగిన స్వప్నాల్ని
సాకారం చేసుకుంటూ
దిగంతాలను ఆవహించిన
శూన్యాన్ని ఛేదిస్తూ
ఖగోళ విస్ఫోటనమై
ప్రకంపిస్తూ
గగనతలానికి బాటలు వేసింది
ఆలోచన సాగరమై
ఆశయమే ఆలంబనగా
ప్రగతి రథచక్రాలు
చేతబూని
విజయ బావుట ఎగరవేసింది
ఆటుపోటుల అగ్ని పరీక్షల
సాములో పునీతమై
అన్నిరంగాల్లో అభినివేశమై
ఆకాశంలో సగమైన ఆమె
తనను తాను సరికొత్తగా
ఆవిష్కరించుకుంటుంది.
