[వి. నాగజ్యోతి గారు రచించిన ‘అంతరంగావలోకనం’ అనే కవితని పాఠకులకు అందిస్తున్నాము.]
[dropcap]ఒ[/dropcap]కింత తెరిపిన పడనీ
రోజూ పరుగుల జీవితమే
నాకోసం నన్ను ఆలోచించుకోనీ
నాఇల్లు నావాళ్ళనే బంధంలో
నన్ను నేను మరిచానెపుడో
ఎందరివో జీవిత కథలు చదివాను
ఎన్నో జీవితపాఠాలు నేర్చాను
ఏదో చేయాలనుకున్నాను
నానుంచి నాఆలోచనలు ఎప్పుడు
దూరమయ్యాయే తెలుసుకోలేకపోయా
నా అంతరంగంలోకి నేనెప్పుడు
తరచి చూడలేదు
చిత్రంగా అది నామాట
ఈరోజు వినటంలేదు
నాకు ఎదురు తిరుగుతోంది
నిన్ను నువ్వు తెలుసుకోవాలంటోంది
కాస్త విశ్రమించా అంతే
భావాల ఉప్పెన చుట్టుముట్టింది
మనోభావాలను వ్యక్తం చేస్తూ
ఒకింత తెరిపిన పడమంది
