~
[dropcap]చీ[/dropcap]కటి నుంచీ వెలుగనుకునే కలుగు లోకి
లోలోకి చొచ్చుకుని పోతున్నపుడల్లా
ఇంత చీకటిలో ఎలా ముందుకొచ్చామో అని
వెనుతిరిగి చూసినపుడల్లా భయాస్పద ఆనందమే
మనమేనా ఇలా రాగలిగామన్న సందేహమే
అంతా చీకటి వెలుగుల అడుగుల ప్రహసనమే
ఈ జీవితం వెనుకా ముందూ కూడా
కలుగులా వున్నదారి రహదారిలా మారింది
సింహాలూ పులులూ తోడేళ్ళూ గద్దలూ రాబందులూ
వీటన్నిటినీ పోలిన మనుషులూ కూడా ఎదురయ్యారు
జంతువులను వెంటాడి వేటాడాం కానీ
మనుషులకే మనం భయపడ్డాం
భయపడుతూనే పరిగెడుతున్నాం
ఒకప్పుడు అందరిదీ ఐన నేల
ఇపుడు మనది కాదు
నింగీ మనది కాదు
కొండా కోనా మనది కాదు
ఇక సరిహద్దుల మాటంటావా
అన్నీ వాడివే
వాడి గోళ్ళ వేటకుక్కలాటి వాడివి
పలుకుబడీ పరపతీ కలవాడివి
కోటలు మాత్రమే వున్న వాడివి
మనమొచ్చిన దారీ
మనకు తెలిసిన దారీ అంతా అనుమానమే
తెలియక మన ముందున్న దారీ అనుమానమే
అయినా పోదాం
సాహసం సేయరా డింభకా అంటూ
ముందుకూ అలానే
చీకటే కొన్నిసార్లు వెలుగై
కనిపించీ కనిపించని వెలుగే
వున్నట్టుండి చీకటై
నిన్న మన చేయిని వూతంగా తీసుకున్న వాడే
నేడు పళ్ళికిలిస్తున్న శత్రువై
ఐదు కళ్ళతో ఎదురుపడే మరో భూతమై
హోరుమని చుట్టుముట్టే నిశ్శబ్దపు సొరంగమై
ఎదురైనా సరే
ఏ చీకూ చింతా లేని నవ్వుతో
పోదాం పోతూనే వుందాం
ఏదో ఓ నాటికి నికాల్సయిన వెలుగూ చూడక పోం
చీకటినీ రాకాసి మనుషులనీ జయించకా పోం
