[box type=’note’ fontsize=’16’] విలువలున్న మానవజాతికీ, క్షుద్రశక్తులున్న మాంత్రికులకీ…. అంటే మంచికి చెడుకి మధ్య జరిగే పోరాటాన్ని ఒక స్పేస్ ఒపెరా ఫాంటసీ సైన్స్ ఫిక్షన్ నవలగా అందిస్తున్నారు డా. చిత్తర్వు మధు. తెలుగు సేత: కొల్లూరి సోమ శంకర్. [/box]

అధ్యాయం 25: స్పేస్ షిప్: లెత్వాల్ రూజ్ (ఎర్ర నక్షత్రం)

[dropcap]ఇ[/dropcap]ది చాలా పెద్ద  వ్యోమనౌక, మేము ఆస్టరాయిడ్ బెల్ట్ ద్వారా గురుగ్రహం వైపు ప్రయాణిస్తున్నాం.

సమూరాతోనూ, అతని బృందంతోనూ వాళ్ళ కుట్రలకు సహకరించాలని నిర్ణయించుకున్నాక, ఇక చర్చించడానికేం మిగలలేదు.

చక్రవర్తి సమూరా కోరుకుంటున్న గురుగ్రహపు మంత్రదండం ఎక్కడుందో కనుగొనేందుకు మేమిప్పుడు గనీమీడ్ వైపు ప్రయాణిస్తున్నాం.

హనీ ఆమ్రపాలి అనబడే నేను అందుకు ఎంపికైన వ్యక్తిని.

లేదంటే అతను ప్రకృతి తండ్రి మహాని చంపుతానని బెదిరిస్తాడు లేదా చంపడానికి ప్రయత్నిస్తాడు లేదా వేగవంతమైన ఈ అంతరిక్ష నౌకలో మాతో పోరాడటానికి దిగుతాడు. దాంతో అందరం నాశనమైపోతాం.

కాబట్టి మేము అతనికి లొంగిపోయాం. మాకు అన్నపానీయాలు, నిద్రించడానికి అనువైన బంకర్ సీట్లు ఇచ్చారు.

వ్యోమనౌక యొక్క గుండ్రని కిటికీల గుండా, కొన్నిసార్లు మానిటర్ మీద నేను ఓడ చుట్టూ వేగంగా కదిలే అనేక గ్రహశకలాలు చూశాను. అయితే వ్యోమనౌకని అత్యంత లాఘవంగా నడపడంతో, పెద్ద గ్రహశకలాలను ఢీ కొట్టే ప్రమాదం నుంచి తప్పించుకున్నాం.

కొద్దిసేపటికే మేము ఆస్టరాయిడ్ బెల్ట్ దాటి, గురుగ్రహపు దిశలో ప్రవేశించాము.

గమ్మత్తైన విషయమేంటంటే భూమి కన్నా 2½ రెట్లు ఎక్కువ గురుత్వాకర్షణ కలిగిన గురుగ్రహం అత్యంత శక్తితో మా వ్యోమనౌకని తనవైపుకు లాక్కుంది.

ఇంతలో వ్యోమనౌక కమాండర్, తలపై నాలుగు యాంటెన్నాలు, పొడుచుకు వచ్చినట్టు ఉన్న చెవులు, మెరుస్తున్న కళ్ళను కలిగిన పొడవాటి గ్రహాంతరవాసి పొడవైన బయటకు వచ్చాడు. మా అందర్నీ చూస్తూ:

“గౌరవనీయులారా, మనం ఆస్టరాయిడ్ బెల్ట్ దాటాము, మరో ఎనిమిది గంటలలో బృహస్పతి కక్ష్యలో ప్రవేశిస్తాము. గురుగ్రహపు గురుత్వాకర్షణ నుండి మనల్ని మనం కాపాడుకోడానికి రెట్రో రాకెట్లు పేలుస్తాం. తరువాత మనం గనీమీడ్‌పై దిగేందుకు ప్రయత్నిస్తాము.

గనీమీడ్, యురోపా అనేవి గురుగ్రహానికి ఉపగ్రహాలని మీకు తెలుసు. వాటిల్లో భూగర్భ కాలనీలు ఉన్నాయి. గురుగ్రహంలో కాలనీలు లేవు, ఎందుకంటే అక్కడ హైడ్రోజన్ అధికంగా ఉంది, ఆమ్లజని లేకపోవడం వల్ల అది నివాసయోగ్యం కాదు.

ఇక్కడ స్పేస్ ప్లాట్‌ఫామ్ కూడా లేదు, గురుగ్రహం గురుత్వాకర్షణశక్తి కారణంగా అది నిలిచి ఉండదు, కదిలిపోతుంది. మనం రెట్రో రాకెట్లని పేల్చి, అధిక గురుత్వాకర్షణని అధిగమించి, గనీమీడ్‍పై దిగడానికి ప్రయత్నించాలి. అది అంత ఆహ్లాదకరంగా ఉండదు, మీరు కొంత స్పేస్ సిక్‌నెస్ పొందవచ్చు. తల తిరుగుడునీ, వికారాన్ని నియంత్రించడానికి మీరు మాత్రలు వేసుకోవచ్చు” అని చెప్పాడు.

ఈ విధంగా అతని సూచనల ప్రకారం మేము దిగడానికి సిద్ధమయ్యాం.

నేను ఏనిమాయిడ్‌కేసి చూశాను. అతనెందుకో తుంటరిగా నవ్వుతున్నాడు.

“మీ ఆవాసానికే వెళ్తున్నాం ఏనిమాయిడ్, ఈ ప్రాంతమంతా నీకు బాగా తెలుసనుకుంటా! మీ ప్రయాణాలెప్పుడూ ఇలాగే ఉంటాయా?” అడిగాను.

ఏనిమాయిడ్ ఎల్లప్పుడూ మితభాషి. కానీ అతను గుర్రుమంటున్నట్టుగా “అవును. మేము ఇక్కడ నుండి చంద్రుడి లా టెర్ పైకి లేదా బుధగ్రహంపైకి వెళ్ళేందుకు స్పేస్‌షిప్ ఉపయోగిస్తాం. ఇక్కడ గనీమీడ్ భూగర్భంలో అనేక కాలనీలు ఉన్నాయి.”

“మరి పైన ఏమున్నాయి?”

“సముద్రం, పర్వతాలు, శిలలు! ఇక్కడ ఆక్సిజన్ లేదు. కానీ గ్రావిటీ స్యూట్ ధరించి నడవవచ్చు. మేము మా నగరాలు, కాలనీలను ప్రేమిస్తాం.”

వాన్ కు జాక్ పళ్ళికిలిస్తూ… “ఇక్కడ మరి మీలాంటి జంతువులు ఏం చేస్తాయి?” అన్నాడు.

“ఓహ్! అతన్ని అలా అవవద్దు. అతను బాధపడతాడు” అన్నాడు చాంద్.

ఏనిమాయిడ్ మళ్ళీ గుర్రుమన్నాడు. “మేము జీవవాదులం. మేము కొన్ని శక్తులున్న తాంత్రికులం. మా రాజు జీవవాది కాదు. పాలక వర్గంలో ఉండేవారంతా మానవులు. మేం.. జీవవాదులం.. డ్రైవర్లు, పైలట్లు, వ్యవసాయ కూలీలుగా పనిచేస్తున్నాం. కొందరు ఇంద్రజాలికులు. వారు విషయాలు జరిగేలా చూస్తారు! నియమితకార్యాలు చేస్తాం.”

ఏనిమాయిడ్ సగం జంతువు, సగం శక్తులున్న మనిషి అని నాకు తెలుసు. సమూరా బృందం చేత హిప్నటైజ్ చేయబడి కుజగ్రహానికి వచ్చాడు; నాతో పాటు ఒలింపస్ పర్వత యాత్రలో పాల్గొన్నాడు. అతనికి ఇంకా శక్తులు పొందాలని కోరిక.

అతను స్పేస్‌షిప్‌లను, యుద్ధ విమానాలను నడపగలడు. సెక్యూరిటీ గార్డు వంటి పనులు చేయగలడు. ఎలాంటి పరిస్థితిలోనయినా అతను దొంగలను, దుష్టశక్తులు తరిమేయగలడు. గొప్ప తాంత్రికుడిగా ఎదగాలన్నది అతని ఏకైక కల.

“ఎవరూ ఏమీ మాట్లాడద్దు! దిగడానికి సన్నద్ధమవ్వండి. ఏనిమాయిడ్! మంత్రదండాన్ని పొందడానికి నువ్వు నాకు సహాయం చేస్తే నేను నా గెలాక్సీ సైన్యానికి నిన్ను అధిపతిగా చేస్తాను. నువ్వు శక్తులు పొందుతావు. లాగోస్ నీకు మరిన్ని విద్యలు బోధించేలా చూస్తాను, హనీ వలె నువ్వు కూడా శక్తులను మెరుగుపరుచుకునేలా చూస్తాను! సరేనా?”

తాంత్రిక చక్రవర్తి ఎల్లప్పుడూ మమ్మల్ని గమనిస్తునే ఉన్నాడు. మేము నిశ్శబ్దంగా ఉన్నాము.

అతన్ని చంపడానికి అవకాశం కోసం నేను వేచి ఉన్నాను. మొదట్లో బెదిరించేవాడు, ఇప్పుడు నా భార్యకీ, మా మామగారికి హాని చేస్తున్నాడు. అందరు చెడ్డ వ్యక్తుల్లానే అతనూ ఒక బ్లాక్‍మెయిలర్.

ఒక పెద్ద గర్జనతో, రెట్రో రాకెట్లను పేల్చారు. భారీ గురుగ్రహం అక్కడి ఆకాశంలో నాల్గింట మూడు వంతులు ఆక్రమించింది. మేము కిందకి దిగడం ప్రారంభించాం.

మా అందరికీ కడుపు తిప్పేస్తోంది, తల తిరగసాగింది, వికారంగా ఉంది. లైట్లు వెలిగి, ఆరి, వెలిగి మళ్లీ మెరవసాగాయి.

“నేను ధ్యానం చేస్తాను, మీరంతా కూడా చేయాలి” అన్నాడు సమూరా.

అతని పక్కన ఉండే ఆల్ఫా గ్రహాంతర తాంత్రికులు గుర్రుపెట్టి, తమ కళ్ళు మూసుకున్నారు.

ఒక గంట తర్వాత మా వ్యోమనౌక గనీమీడ్ మీద ఒక భారీ సముద్రంలోకి దిగింది. ఒకప్పుడు అది ఘనీభవించిన మంచుతో నిండివుండేది. అయితే మానవులు నివాసం కోసం అన్వేషించడం వల్ల మంచు కరిగిపోయింది. మంచు కరిగిన ఏర్పడిన నీటి నుంచి ఆక్సిజన్‍ను తయారుచేయడంతో, వందలాది భూగర్భ కాలనీలు నిర్మితమయ్యాయి, గనీమీడ్‌ తన సొంత నాగరికతను అభివృద్ధి చేసుకుంది. కానీ ఉపరితలంపై ఘనీభవించిన సముద్రం చాలా ఉంది. అయితే భారీ స్థాయిలో మంచు కరిగిపోవడం వల్ల ఇప్పుడు నీరు ద్రవ స్థితిలో ఉంది.

భారీ నీటి వనరులు ఉపయోగించి గనీమీడ్‌లో కొన్ని ప్రాంతాలలో టెర్రాఫార్మింగ్ జరిపారు. మరియు మిగతా నీటిని వ్యవసాయ ప్రయోజనాల కోసం టైటాన్‌కి, కుజగ్రహానికి కూడా పంపించారని విన్నాను. వాతావరణంలోని గ్రీన్‌హౌస్ వాయువులు, పలచని ఆక్సిజన్ ఈ బృహస్పతి ఉపగ్రహంలో వ్యవసాయానికి దోహదం చేసింది, కాలనీల స్థాపనలో సహాయపడింది.

కానీ అక్కడున్న అతిపెద్ద సమస్య రేడియోధార్మికత. ఇది ఈ గ్రహం మీద అపారమైనది. దీనిని అధిగమించడానికి, కాలనీల వ్యవస్థాపకులు రేడియేషన్ స్యూట్లను ధరించి భూగర్భాన్ని తవ్వి, రేడియేషన్ లేకుండా ఉండే కాలనీలను నిర్మించారు.

మానవులు… ముఖ్యంగా తూర్పు ఐరోపా మరియు చైనాల నుంచి వచ్చి మానవులు ఇక్కడ స్థిరపడేందుకు ఎంతో సాహసం చేశారు, ఎంతో అన్వేషణ సాగించారు. వారికిది ఆవశ్యకత కూడా. బృహస్పతి యొక్క ఈ ఉపగ్రహం మీద చాలా ముడి ఇనుము ఉంది,  భూగర్భంలో అయస్కాంత ప్రవాహాలున్నాయి.

అయినప్పటికీ, ఇంత ప్రమాదకరమైన వికిరణ ప్రాంతాలలో, భూగర్భంలోని పెద్ద అయస్కాంత ప్రవాహాలతో ఈ ప్రజలు ఎలా నివసిస్తున్నారో తెలుసుకోవాలి.

“మనం ఎందుకు సముద్రం మీద దిగుతున్నాం?” సమూరాని అడిగాను అరుస్తున్నట్లుగా.

లోహపు రోబో తన మెటాలిక్ స్వరంతో చెప్పింది; “ఇది సరైనదే మాస్టర్! క్రాష్ అయ్యే అవకాశాలు తక్కువ. ఈ వ్యోమనౌక కూడా తేలుతుందని నేను నమ్ముతాను!”

సమూరా నవ్వాడు “హా! హా! ఇలాంటి చిన్న గ్రహాలనెన్నో చూశాను. సముద్రం మీద దిగడం ఎప్పుడూ సురక్షితం. లేదంటే అయస్కాంతానికి అతుక్కునే ఇనుప రజను వలె నేలకి కరుచుకుపోతాం. ఈ వ్యోమనౌక తేలుతుంది. మనకు పడవలు ఉన్నాయి, ఆపై వాటిమీద నేలమీదకి చేరుకోవడమే కాకుండా రోవర్స్ ద్వారా భూగర్భంలోకి ప్రవేశించవచ్చు! అక్కడ, ఏం చేయాలో మీ జంతు స్నేహితుడు తెలియచేస్తాడు” అన్నాడు.

“మనల్ని అనుమతిస్తారా? వీసాలు అవసరమా? “

సమారా నవ్వాడు.

“అది మీ సమస్య, హనీ అమ్రాపాలి. నీకు బాగా తెలుసు. నువ్వు మిషన్ కమాండర్‌వి. మీ నలుగురు స్నేహితులు ఎంతో శక్తివంతమైన తాంత్రికులు, పైగా మీరో తెలివైన రోబోని కలిగి ఉన్నారు. మంత్రదండం సాధించలేకపోతే, ఏం జరుగుతుందో నీకు బాగా తెలుసు, నీ ప్రేయసి, వాళ్ళ నాన్న నీకిక ఉండరు. సరేనా?”

నిజంగానే మేము గనీమీడ్ సముద్రం మీద ఒక మృదువైన బుడగాలా దిగాం. వ్యోమనౌక వెనుక నుంచి బయటకు తీసిన ఒక పడవను విడుదల చేయడంలో సిబ్బంది మాకు సహాయం చేశారు.

“మీకున్నవి ఏడు గనీమేడ్ రోజులు! ఇది ఏడు రోజుల ఒకసారి గురుగ్రహం చుట్టూ తిరుగుతుంది. ఆలోపు మీరు మంత్రదండంతో రావాలి! లేదా నీ భార్య, మామగారిని శవాలుగానే చూస్తావు!” అన్నాడు సమూరా. కాకిలాంటి స్వరంతో మళ్ళీ తనే మాట్లాడుతూ “ఖచ్చితంగా వస్తావు! ఈ పని చేయడానికి నువ్వే ఎంపికైన వ్యక్తికి అని నేను అనుకుంటున్నాను” అన్నాడు వెక్కిరింతగా.

“అయ్యా చక్రవర్తి గారు! నాపై మీరు పెట్టుకున్న నమ్మకానికి నేను మిమ్మల్ని గౌరవిస్తున్నాను. కానీ కనీసం మంత్రదండం ఉన్నట్లు నాకు కొన్ని ఆధారాలు ఇవ్వండి… చంద్రుడి కక్ష్య‌లోని సౌర ఫలకలలో అద్దం ఉందని చెప్పినట్టే! నేను వెండి కొవ్వొత్తిని సాధించి ఇచ్చాను కానీ మీరు దాన్ని చంద్రునిపై కోల్పోయి తిరిగి పొందారు. చోటు చెప్పండి, ఆధారాలు చూపించండి! అది తప్పక సాధించవలసినంతటి గొప్ప మంత్రదండమా?” అడిగాను.

“అవును” అన్నాడు సమూరా. “అది గనిమీడ్ యొక్క ముడి ఇనుముతోనూ ఇతర మిశ్రమ లోహాలతోనూ తయారైనది. బృహస్పతి యొక్క అయస్కాంత శక్తిచే సమృద్ధమైంది. అది దాని యజమానికి కట్టుబడి ఉంటుంది. దాంతో మీరు శక్తిమంతమైన ఒక పూర్తి సైన్యాన్నే సృష్టించవచ్చు లేదా ఒక ఆదేశం ద్వారా ఎలక్ట్రానిక్ శక్తితో కూడిన తుఫానును రప్పించవచ్చు.

సహజంగానే ఆదేశాలతో పాటు దానితో హెచ్చరికలూ ఉండవచ్చు. భూగర్భంలో నివసించే రాజు ఫెరియస్ యొక్క రాజధానిలోని రాజభవనంలో అది ఉందని నేను ఊహిస్తున్నాను. ఫెరియస్ ఎప్పుడూ ఆ మంత్రదండాన్ని ఉపయోగించలేడు. అతను మంగోలియన్ జాతికి చెందిన వ్యక్తి. ఇక్కడ నిజమైన తాంత్రికులు ఎవరంటే ఏనిమాయిడ్ వంటి జీవవాదులే. కాని వారు ఇక్కడ బానిసలు. కాబట్టి రాజభవనానికి వెళ్ళండి. ఈ బొమ్మ రోబోతో మంత్రదండం వెలువరించే రేడియేషన్ కోసం వెతకండి… విశ్వశక్తి యొక్క ఏ ప్రయోగంతోనైనా పోరాడండి, నాకా మంత్రదండం తీసుకురండి! వెండి కొవ్వొత్తిని నేను మళ్ళీ పొందాను, నువ్వు అందించిన సమాచారంతోనే నేను దుష్టులైన ఆ నరమాంస భక్షకులను హతమార్చాను, నీకు కృతజ్ఞతలు!” చెప్పాడు సమూరా.

“ఎంత సులభంగా చెప్పారు ప్రభూ?” అరిచాను. “నాకు సాయంగా కనీసం ఈ ఆల్ఫా వ్యవస్థకి చెందిన మంత్రగాళ్ళని పంపండి!” అన్నాను.

సమారా కోపంతో అరిచాడు.

“కుదరదు. వాళ్ళు నా స్నేహితులు. మీరు విఫలమైతే లేదా మరణిస్తే నేను వారిని వాడుకుంటాను! వారు దానిని ఖచ్చితంగా తెస్తారు, కానీ నేను రెండు గ్రహాలను వారికి వదిలేయాల్సి ఉంటుంది. ఇప్పుడు ఆలస్యం చేయద్దు. వెళ్ళండి…!” అన్నాడు.

మమ్మల్ని పడవలో నెట్టారు, పడవ తేలుతున్న స్పేస్‌షిప్ నుండి సముద్రపు నీటిలో పడటం జరిగింది.

***

ఇక నుంచీ మా పాట్లు మావి.

ఇక్కడ కూడా స్పేస్ సూట్లు, ఆక్సీజన్ అవసరమే. అయితే నీలి సముద్ర జలాలపై పడవలో ప్రయాణం చేస్తుంటే భూమి జ్ఞాపకాలు మళ్ళీ గుర్తొచ్చాయి. మేము ఇప్పటివరకు ఓ ఇరుకైన వ్యోమనౌకలో ఉన్నాం, ఘనీభవించజేసిన ఆహారం తిన్నాం, చివరికి కాలకృత్యాల తీర్చుకోడం కూడా కష్టంగా ఉండే చోట కూడా మాకు బెదిరింపులు తప్పలేదు.

మేము నిరంతరం ఒత్తిడికి గురయ్యాము. ఇప్పుడు అది ముగిసింది.

గనీమీడ్ ఒకప్పుడు ఘనీభవించిన గ్రహం. ఇప్పుడు మంచు కరిగిపోయింది, భూగర్భ మరియు ఉపరితల భూభాగంలో సాగు కోసం సముద్రపు నీటిని ఉపయోగించారు. కొంత నీటిని సమీప గ్రహాలకు ఎగుమతి చేశారని కూడా నాకు తెలిసింది.

ఏనిమాయిడ్‌కి ఈ ప్రాంతమంతా పరిచయమున్నదే.

“మనం తీరానికి వెళదాం. నాకు మాప్ ఇవ్వండి!” అన్నాడు. తీరం నుంచి భూగర్భ కాలనీలకు దారితోసే ప్రవాహలు ఉన్నాయి.

నాల్గవ సహస్రాబ్దిలో గ్రహాలు మరియు ఉపగ్రహాల కాలనీలలో విపరీతమైన పెరుగుదల ఉంది.

గురుగ్రహం, శనిగ్రహం యొక్క వివిధ ఉపగ్రహ గ్రహాలు చైనీయులు, మంగోలులు, తూర్పు ఆసియా ప్రజలు వంటి శక్తిమంతమైన మానవ జాతుల ద్వారా అన్వేషించబడ్డాయి.

శతాబ్దాలుగా ఈ వలసరాజ్యాలలోని సమాజాలలో అసమానతలు ఉండేవి. అధికార వర్గాలు ఏనిమాయిడ్ వంటి బలహీన జాతులపై జులుం చేసేవారు. దానిని బానిసత్వం అని పిలుస్తారు. ఇది గ్రహాలలో కొత్త సామ్రాజ్యవాదం ప్రభావమేనా?

అసలు ఏనిమాయిడ్ సంభవం ఎలా జరిగిందనేది రహస్యమే.

కొన్నాళ్ళ క్రితం, నేను యురేకస్ సహాయంతో ఐజినెట్‌లో దీని గురించి అధ్యయనం చేశాను.

ఇది జన్యువుల పరివర్తన లేదా పరిణామ ప్రక్రియ యొక్క సహజ ఎంపిక కావచ్చు. మానవ-జంతు జాతులు కూడా గనీమీడ్ వంటి ఉపగ్రహ గ్రహాలపై ఉద్భవించాయి, బహుశా యురోపా మరియు టైటాన్ వంటి ఇతర చిన్న ఏకాంత కాలనీలలో ఉండవచ్చు. ఈ వ్యక్తులు విశ్వశక్తిని ఉపయోగించగలరు. పశువులలో ఉండే సహజాతాలు, మానవులలోని ముఖ లక్షణ విజ్ఞానం వీళ్ళలో ఉంటాయి.

శారీరక శ్రమతో చేసే పనులకు, ఇతర నీచమైన పనులకు మానవజాతి వీరిని ఉపయోగకరంగా భావించింది. తాంత్రిక శక్తులున్న వారూ ఉండేవారు, అలాంటి వాళ్ళని అనుమానించి, సంశయవాదంతో వారి పట్ల జాతి వివక్ష చూపారు.

ఏనిమాయిడ్ గుర్రుమన్నాడు, ఒక కఠినమైన స్వరంలో మాట్లాడాడు.

“మాస్టర్ హనీ! మనం తీరానికి చేరుకున్నప్పుడు భూగర్భంలోకి వెళ్ళాలి. భూగర్భ కాలనీలన్నీ రాజధాని నగరంలో ఉన్నాయి. అక్కడ రాజు నివసిస్తాడు. శిలలతో కూడిన, మానవులు జీవించలేని అడవి వృక్షాలున్న మేం… జంతువులం… నివసిస్తాం. కానీ మేము అక్కడే నివసిస్తున్నాం. మంత్రదండాన్ని పొందడానికి, మనం రాజ భవనంలోకి వెళ్ళాలి. మీరు విశ్వశక్తిని ఉపయోగించాలనుకుంటున్నారా? అదృశ్యరూపంలో వెళ్తారా? ఎలా?”

తీరం కనిపిస్తోంది… నేను ఆలోచిస్తున్నాను. కొండలు, శిలలు, రాతి నిర్మాణాలు కనిపిస్తున్నాయి.

ఒక వైపున సూర్యుడు ప్రకాశిస్తూ ఉన్నాడు, కానీ పశ్చిమ దిశలో మొత్తం ఆకాశం పూర్తిగా గురుగ్రహపు నీడతో నిండి ఉంది. అది చాలా పెద్దదిగా ఉంది, అత్యంత సమీపంలో ఉన్నట్టు అనిపించింది.

“నేను ఖచ్చితంగా చెప్తున్నాను, విశ్వశక్తిని ఉపయోగించను. మనం పర్యాటకులుగా వెళ్లి, సరైన సమయంలో అదృశ్యరూపంలో రాజభవనంలో ప్రవేశించాలి. విశ్వశక్తిని ఉపయోగిస్తే ఎలక్ట్రానిక్ అల్లకల్లోలం ఏర్పడి మనల్ని గుర్తించి, వెంబడిస్తారు” అన్నాను.

తీరం చేరాం… ఒకరొకరుగా మేము గట్టు మీదకి దూకాం.

గురుత్వాకర్షణ ఎక్కువగా ఉన్నందున మేము తేలలేదు. మేమంతా తలనొప్పితో బాధపడ్డాం.

డిమిట్రీ కిలకిలా నవ్వింది. “మనం మంచి ప్రదేశాలను చూస్తామని నాకు అనిపిస్తోంది.”

చాంద్, వాన్ కు జాక్ నిశ్శబ్దంగా ఉండిపోయారు.

మేము గనీమీడ్ నేల మీద పెద్ద గులకరాళ్ళపై నడుస్తుండగా, “అదిగో! భూగర్భ సొరంగానికి దారితీసే వంపుకట్టడం” అన్నాడు ఏనిమాయిడ్.

అది చాలా పెద్ద వంపుకట్టడం. దాని మీద వింత చిత్ర లిపిలో ఏదో రాసి ఉంది, ఏవేవో బొమ్మలున్నాయి.

మేము అక్కడకు వెళ్ళాం. కిందకి దిగేందుకు రాతి మెట్లు ఉన్నాయి. అక్కడంతా చీకటిగా ఉంది.

“ఎవరైనా కిందకి వెళ్ళవచ్చు! హా! హా!” అంటూ డిమిట్రీ మళ్ళీ నవ్వింది. “గార్డులు ఎక్కడున్నారు? సెక్యూరిటీ చెక్ ఎక్కడ?” అంది.

“గార్డులు, కస్టమ్స్ అధికారులు కింద ఉన్నారు. ఇమ్మిగ్రేషన్ చెక్ అక్కడ అవుతుంది. మనల్ని బాడీ రేడియేషన్‌తో ఇప్పటికే స్కాన్ చేశారు!” చెప్పాడు ఏనిమాయిడ్.

మేము కిందకి వెళ్ళాం. హఠాత్తుగా ఒక చోట పెద్ద వేదిక కనబడింది. ‘మిలీనియం రూజ్ గన్స్’ పట్టుకున్న, మెటాలిక్ యూనిఫామ్ ధరించిన ఇద్దరు గార్డులు కనబడ్డారు. వారు మమ్మలి ఆగమని సైగ చేసి, వింత భాషలో ఏవేవో ప్రశ్నలు అడిగారు.

మేము అజ్ఞానం వ్యక్తం చేశాం. ఇప్పుడు లోపల నుండి ఇంకో వ్యక్తి బయటకు వచ్చాడు, గట్టి ఉచ్ఛారణలో డిజిటల్ భాషలోనూ ఇంగ్లీష్‌లోనూ మాట్లాడాడు.

“మాకు మీ గుర్తింపుకార్డులు, పాస్‌పోర్ట్‌లు, వీసాలు చూపించండి! మీరు నేను ఊహిస్తున్న గ్రహం నుండి రాలేదు. మీ పత్రాలు లేకపోతే, మీరు జైలు శిక్షను పొందుతారు!”

ఏనిమాయిడ్ వెంటనే స్పందించి, ముతక యాసలో, మాకు తెలియని భాషలో ఆ అధికారితో మాట్లాడాడు.

“మీ వద్ద డబ్బు, పాస్‌పోర్ట్‌లు ఉంటే, ట్రాన్సిట్ వీసాకి దరఖాస్తు చేసుకోండి” అన్నాడా అధికారి.

“నేను భూమి నుండి వచ్చిన హనీ ఆమ్రపాలిని” అని చెప్పి నా డిజిటల్ ఐడిని, ఇంటర్ గెలాక్టిక్ యాత్రలకి చెల్లుబాటయ్యే పాస్‌పోర్ట్‌‌ను ఇచ్చాను. వాళ్ళ వద్ద మొత్తం సమాచారం ఉన్న, ప్లాటినంతో తయారుచేసిన డిజిటల్ డిస్కులు ఉన్నాయి.

“మేము ట్రాన్సిట్ వీసాలకు దరఖాస్తు చేసుకుంటాం. మీకు డిజిటల్ కరెన్సీలో చెల్లిస్తాం. మేమొక ప్రైవేట్ చార్టర్ స్పేస్‌షిప్ వచ్చాం. వాళ్ళిక్కడ మమ్మల్ని సముద్రంలో విసిరి వెళ్ళిపోయారు, మమ్మల్ని మోసం చేశారు. అవును, మాదే తప్పు! ఖర్చు తక్కువని, అసలైన ఖర్చులో సగమేనని ఆలోచించి – చంద్రుడి మీద ఆ స్పేస్‌షిప్ ఎక్కాం. మేము ఇక్కడ కాలనీని చూడాలనుకుంటున్నాము” అన్నాను.

ఆ అధికారి మా డిజిటల్ ఐడిలను సేకరించాడు, మమ్మల్ని లోపలికి పిలిచాడు.

“ఓ రైలు వచ్చే సమయమైంది. మీరు ఏ రకం పర్యాటకులు? ఫీజు తదనుగుణంగా విధించబడుతుంది. మీరు మా రాజధానిలో అంతర్ గ్రహ బ్యాంకు వద్ద చెల్లించాలి. మీరు భూమి నుండి వచ్చారు కాబట్టి నగదు బదిలీ సమస్య కాదు; లేకపోతే మీరు యూనివర్సల్ కరెన్సీ యూనిట్లలో ఇక్కడే నగదు చెల్లించవలసి ఉంటుంది “.

ఇప్పుడు మా యజమాని చక్రవర్తి సమురా మాకు నగదు లేదా బంగారం లేదా ప్లాటినం లేదా ఏ ఇతర మెటల్ కరెన్సీలో మాకు డబ్బు ఇవ్వలేదు. గనీమీడ్ కస్టమ్స్ ఫీజు ఎలా చెల్లించాలో నిజంగా నాకు అర్థం కాలేదు.

“యురేకస్, నువ్వు డబ్బు బదిలీ ఏర్పాటు చేయగలవా? లేదా డబ్బు పంపమని చక్రవర్తి సమూరని అడగవా?” అన్నాను యురేకస్‌తో.

యురేకస్‌ మాతోనే ఉన్నాడు.

“మాస్టర్! మీ ఖాతాలో ఇద్దరు వ్యక్తులకు మాత్రమే సరిపోయే డబ్బు ఉంది. సమూరాతో ఎలా మాట్లాడాలో నాకు తెలియదు. మెయిల్ ఐడి, ఐజి నెట్ ఐడి ఇవ్వలేదు. నలుగురు వ్యక్తులు, ఇంకా నాకు… రోబో కోసం మీరు పదివేల యూనివర్సల్ కరెన్సీ యూనిట్లను చెల్లించాలి. పైగా నా లాంటి రోబో బీమా కోసం రెండువేలు అదనం” చెప్పింది యురేకస్.

ఇంతలో పెద్ద కూత వినబడింది. కొన్నిక్షణాలలో నాలుగు బోగీలున్న ఓ రైలు ప్లాట్‌ఫాం మీదకు వస్తూ కనబడింది.

“మీరు మీ బ్యాంక్ నుంచి చెల్లిస్తారా లేదా డబ్బులిస్తారా? సమయం లేదు” అన్నాడా అధికారి.

“ఏ పద్ధతిలోనూ మేము చెల్లించలేము. అందుకని మేం పారిపోతున్నాం! మిత్రులారా రైలులోకి గెంతండి!” అన్నాను నేను అరుస్తూ. యురేకస్‌తో పాటుగా మేమంతా మెరిసిపోతున్న, మెత్తని సీట్లున్న లోహపు బోగీలోకి దూకాం. అందులో ఒకే ఒక ముసలి ప్రయాణీకుడున్నాడు.

దిగ్భ్రాంతికి గురైన అధికారి మొబైల్ ఫోన్ లాంటి పరికరాన్ని త్వరితగతిన తీసుకుని మాట్లాడటం మొదలుపెట్టేసరికి బోగీ తలుపులు మూసుకున్నాయి.

రైలు వేగం అందుకుంది. గనీమీడ్ రాజధాని వైపు పరుగుపెట్టింది.

అధ్యాయం 26: గనీమీడ్: సితె ది ఓరియన్

నేను తీవ్రమైన ఒత్తిడికి గురయ్యాను. నాలో ఏదో మార్పు వచ్చింది. వేగవంతమైన జరిగిపోతున్న సంఘటనలు, ఒత్తిళ్లు, ఇంకా ప్రతి దశలో ఎదురవుతున్న అడ్డంకులు నాలో ఉద్విగ్నతను తీవ్రతరం చేస్తున్నాయి.

ప్రకృతిని బందీని పట్టుకొని నన్ను బెదిరించే దుష్ట సమారా ఉండనే ఉన్నాడు.

నా శరీరమంతా కోపం, నిరాశలతో నిండిపోయింది.

నలుగురు శక్తివంతమైన తాంత్రికులు చాంద్, వాన్ కు జాక్, డిమిట్రీ, ఇంకా స్థానికుడైన ఏనిమాయిడ్ నాకు సహాయం చేయడానికి ఎప్పటికీ సిద్ధంగా ఉన్నారు, ఇంక నేను ఎవరికి భయపడాలి?

ఇది ఒక వింత పరాయి గ్రహం.

ఆ ఒంటరి రైలు బోగీలో ఉన్న ఏకైక ప్రయాణీకుడు మాకేసి భయం నిండిన కళ్ళతో చూస్తున్నాడు. అతని తలమీద ఉన్న యాంటెన్నా కదులుతోంది. జంతువు చర్మంలాంటి అతని చర్మం అతని వణుకుని తెలియజేస్తోంది. నోరు తెరిచి అతనేదో గుర్రుమన్నాడు. కానీ ఏనిమయిడ్ స్థానికభాషలో మాట్లాడి అతన్ని కుదుటపరిచాడు. దాంతో అతను నిశ్శబ్దంగా ఉండిపోయాడు.

నేను అరిచాను, “ఏనిమాయిడ్! ఎవరికీ హాని ఉద్దేశం మనకి లేదని ప్రతి ఒక్కరికీ చెప్పండి. ఇప్పుడు దాని కోసం పరుగెడదాం. మనం రాజభవనంలోకి ప్రవేశించడానికి మన శక్తులను ఉపయోగిద్దాం. మంత్రదండాన్ని దొరకబుచ్చుకుని, వెనక్కి వచ్చేద్దాం. దాన్ని తీసుకోడానికి సమూరాని పిలుద్దాం. యురేకస్, సమూరా వ్యోమనౌక కమ్యూనికేషన్ ఛానల్ తెరిచి ఉంచు. సరేనా?”

“అలాగే! అలాగే మాస్టర్!” అంది యురేకస్ “సమూరా నాకా వివరాలు ఇచ్చాడు”.

నేను ఆజ్ఞాపించాను, “డిమిట్రీ, నువ్వు సైనికులతో పోరాడు, బుల్లెట్లను ఎదుర్కో. సరేనా? వాన్ కు జాక్ నువ్వు వెనుక నుండి మమ్మల్ని కాపాడటానికి నకిలీ మంటల హోలోగ్రామ్స్, కృత్రిమ గోడలను సృష్టించాలి; చాంద్ నువ్వు చంద్రగ్రహానికి చెందిన గొప్ప తాంత్రికుడివి. వారు ఏకాగ్రత కోల్పోవడానికి చల్లని మరియు పొగమంచును సృష్టించు!

ఇక ఏనిమోయిడ్! ఈ భవనం స్థలాకృతి నీకు తెలుసు, నువ్వు మాకు దారి చూపాలి.

యురేకస్! నువ్వు ఎలక్ట్రానిక్ వ్యవస్థలని సమన్వయం చేయ్. పటాలు చూసి మాకు దిశను తెలపాలి.

నేనేమో మంత్రదండం కోసం వెతుకుతాను!”

“అలాగే” అని గట్టిగా అంటూ డిమిట్రీ అరిచింది. “అవును, మిస్టర్ హనీ, నీవు చాలా అమాయక మరియు స్వచ్ఛమైన శక్తివంతమైన విజర్డ్. ఎంపికైన వ్యక్తివి! హా! హ!”

ఆమె ఎగతాళి చేస్తోందో మెచ్చుకుంటోందో చెప్పడం కష్టం.

రైలు ఆగింది. తలుపులు తెరుచుకున్నాయి.

రాజధాని నగరం స్టేషన్ పేరు మెరుపు దీపాల అక్షరాలతో సితె ది ఓరియన్ (ఓరియన్ సిటీ) – అడ్మినిస్ట్రేటివ్ సెంటర్ అని గోడలపై ఏర్పాటు చేయబడింది.

పాలరాయితో ఏర్పాటు చేసిన ప్లాట్‌ఫాం జారుతోంది, పసుపు దీపాలలో మెరుస్తోంది. తుపాకీలు ధరించిన, తలలపై యాంటెనాలు, చర్మంపై బొచ్చుతో డజన్ల కొద్దీ సైనికులు నిలుచుని ఉన్నారు.

ఇది ఊహించినదే అయినా నాకు ఆశ్చర్యం కలిగింది.

“ఇంత త్వరగానా…!”అని నేను అరుస్తూ, “అదృశ్యరూపంలో ఉండండి. అదృశ్యమయ్యే మీ శక్తిని ఉపయోగించండి. కిందకి దూకి, నిష్క్రమణ మార్గంపై పరిగెత్తండి. నేను స్టేషన్ వెలుపల తిరిగి ప్రత్యక్ష్యం అవుతాను. మీరంతా మీ వాకీ-టాకీ కమ్యూనికేషన్‌ ద్వారా నన్ను లేదా యూరేకస్‌ని సంప్రదించాలి” అని చెప్పాను.

“ఇప్పుడే చేద్దాం!” అరిచాను. నేను అపారమైన ఒత్తిడికి గురయ్యాను మరియు తీవ్రమైన ఏకాగ్రతతో అదృశ్యమయ్యే మంత్రం చదివి క్రిందకి దూకాను.

గాలిలో చల్లదనం ఉంది. సైనికులు మాకోసం అన్ని బోగీలను వెతుకుతూ ఉన్నారు. వారు మమ్మల్ని చూడలేరు కానీ ఐదుగురు తాంత్రికులు ఒకేసారి ప్రయోగించిన విశ్వశక్తిని గుర్తించారు.

అప్పుడు ఒక పెద్ద చప్పుడుతో ప్లాట్‌ఫాం మీద భారీ మంటలు చెలరేగాయి. అందరు సైనికులు చెల్లాచెదురయ్యారు.

వాళ్ళ దృష్టిని మళ్ళించటానికి వాన్ కు జాక్ సృష్టించిన హోలోగ్రామ్ అదని నాకు వెంటనే అర్థమయ్యింది.

ఈ గందరగోళం మధ్య మేము టికెట్లు తనిఖీ చేసే ప్రాంతం నుండి, ఇమ్మిగ్రేషన్ తనిఖీ ప్రాంతం నుండి అదృశ్యరూపంలో బయటకు నడిచాం. అక్కడంతా అప్రమత్తమయ్యరు, అగ్నిమాపక యంత్రాలని పిలిపించారు, ఆరోగ్య సిబ్బంది, ఇంకా అనేకమంది భద్రతా సిబ్బంది పరుగులు పెడుతూ అక్కడికి చేరుకున్నారు.

అయితే దీనికి పూర్తి భిన్నంగా స్టేషన్ వెలుపల వాతావరణం ప్రశాంతంగా మరియు నిశ్శబ్దంగా ఉంది. సైనికులు రైల్వే స్టేషన్ లోపల కేంద్రీకృతమై ఉండడంతో మాకు కొంత ఉపశమనం లభించింది.

నేను నా వాకీ-టాకీని తీసుకొని దానిలో మాట్లాడాను.

“మనకున్న ఏకైక మార్గం ఏదైనా వాహనాన్ని హైజాక్ చేసి నేరుగా రాజభవనానికి వెళ్ళడమే. ఏనిమాయిడ్, ఈ పని నువ్వే చేయాలి. మేము మిమ్మల్ని అనుసరిస్తాము. లోపలకి ప్రవేశిస్తే మనం ‘గురుగ్రహపు మంత్రదండం’ కోసం వెతుకుదాం. త్వరపడు! మన శక్తి పూర్తిగా ఖర్చయిపోడానికి కొన్ని గంటలు మాత్రమే మిగిలి ఉన్నాయి. లేదంటే వాళ్ళు మనల్ని పట్టుకుంటారు.”

ఏనిమాయిడ్ గుర్రు స్పీకర్లలో వినిపించింది. యురేకస్ కూడా మాట్లాడుతున్నాడు.

“నిష్క్రమణ మార్గానికి కుడి వైపున 300 మీటర్ల దూరంలో చిన్న రోవర్ క్రాఫ్ట్ లాంటి వాహనాన్ని నేను గుర్తించాను.”

ఏనిమాయిడ్ స్వరం కూడా వాకీ-టాకీలో వినబడింది. “దాని కోసం వెళ్తున్నాను. కానీ మంత్రడండం దొరికాకా, ఆ ప్రాంతం నుంచి ఎలా తప్పించుకోవాలి? మీరు స్పేస్‍షిప్‌కి చేరగలరా? మీరు మళ్ళీ ఎలా ఎగరగలరు?”

నిజం చెప్పాలంటే, నేను వీటి గురించి ఆలోచించలేదు.

నన్ను ఎల్లప్పుడూ దుష్ట్ర గ్రహాంతరవాసులు వెంటాడుతునే ఉన్నారు, లేదా పీడకలలు వెంటాడాయి. కొన్నిసార్లు నా మెదడు అసాధారణ రీతిలో పని చేసింది. కొన్నిసార్లు అది స్తబ్దుగా ఉండిపోయింది.

మా నుండి మంత్రదండాన్ని తీసుకునేందుకు సమూరా దగ్గర ఖచ్చితంగా ఏదో ఒక ప్రణాళిక ఉంటుంది. అతను నా భార్యను చంపుతానని బెదిరించడం ద్వారా నన్ను ఒత్తిడిలో ఉంచాడు.

యురేకస్ నా చెవిలో అరిచాడు. “మాస్టర్! సముద్రపు ఒడ్డు నుండి 200 కిలోమీటర్ల దూరంలో సముద్రంలో తేలుతున్న స్పేస్‌షిప్ ఫ్రీక్వెన్సీ దొరికింది. నేను చక్రవర్తితో ఫోన్‌లో మాట్లాడగలను. దాన్ని నాకు ఆ వ్యోమనౌక యొక్క సిబ్బంది ఇచ్చారు. కానీ మీరు నాకు ఆదేశం ఇవ్వాలి! “

“ఇది మొత్తం ప్రణాళికకి సరిపోతుంది యురేకస్! ఆయన కూడా మనల్ని గమనిస్తూ ఉంటాడు. మన దగ్గర ఏ పడవ లేదా విమానము లేకపోతే, మనం గనీమీడ్ సముద్రంలో తేలుతున్న ఆ వ్యోమనౌకని ఎలా చేరుకుంటాం?”

“ప్రణాళిక కోసం అతనిని అడగనా?”

దీని గురించి ఆలోచించాను. నాకు ఏ పథకాన్ని చెప్పనప్పటికీ, సమూరాకు తప్పనిసరిగా కారణం ఉండాలి.

అది నాకు అర్థమైంది.

మంత్రదండం. మంత్రగాడి అంతిమ కోరిక ఈ గురుగ్రహపు మంత్రదండం. ఏం చేయాలన్నా, అదే నాకు అన్ని సౌకర్యాలను కల్పిస్తుంది, పద్ధతులను సృష్టిస్తుంది. బహుశా సమూరాని ఎలా చేరుకోవచ్చో ఆ మంత్రదండమే నాకు తెలియజేస్తుంది.

“అవసరం లేదు. రాజభవనంలో ప్రవేశించడానికి ఒక ప్రణాళిక తయారు చేద్దాము! అన్ని స్థలాకృతులను, కో-ఆర్డినేట్లను పొందండి” అన్నాను.

నేను మైక్రోఫోన్‌లో మాట్లాడాను: “డిమిట్రీ ముందు నడుస్తావ్. వాన్ కు జాక్, చాంద్ నా పక్కగా ఉంటారు. నేను రోబోతో మీ వెనుక ఉంటాను. దీన్నే పాటిద్దాం.”

ఉపగ్రహ గ్రహం గనీమీడ్ యొక్క రాజధాని నగరం ‘సితె ది ఓరియన్’ భూఉపరితలం అడుగున నిర్మించబడింది. భూమి, చంద్ర గ్రహాల నుంచి పంపిన 3డి రేఖాచిత్రాలతో వారు భవనాలను రూపొందించి, నగరాన్ని అభివృద్ధి చేశానని నేను విన్నాను. శతాబ్దాలుగా గనీమీడ్ రాజకీయ సంక్షోభాన్ని, తిరుగుబాట్లను చూసింది. రాచరిక పాలకవర్గాలచే ఏనిమాయిడ్లు, హ్యుమానాయిడ్లు దోచుకోబడ్డారు. గత సహస్రాబ్దిలో మంచు కరిగిన తరువాత, భారీ సముద్రం కలిగి ఉన్నందువల్ల ఈ గ్రహం యొక్క ఆదాయ వనరు ఆక్సిజన్ అయ్యింది. ఇంకా తాజా నీటిని సమీపంలోని కాలనీలకు అమ్మడం ద్వారా ఆదాయం సమకూర్చుకుంటోంది.

కానీ విపరీత వ్యక్తులుగా పిలవబడే పిసియుఎఫ్‌లు లేదా తాంత్రికులు ఉన్నారు. తమ తలలపై కొమ్ముల వంటి యాంటెనాలు, ముఖంపై దట్టమైన పెదవులు, చదునైన ముక్కు, గిరజాల జుట్టుతో ఉన్నారు. వారు ఎక్కువగా మూలుగులతోనూ, తమ భాషకు గల అతి తక్కువ ఏకాక్షరశబ్దాలను ఉచ్చరిస్తూ మాట్లాడుతారు. వారు జంతు ప్రవృత్తి కలిగి ఉన్నారు. పైలట్లు, మెకానిక్‍ల వలె పనిచేసేందుకు తగిన అయస్కాంత శక్తిని కలిగి ఉన్నారు. అలాగే సాంప్రదయాక పద్ధతిలో వస్తువులను సృష్టించగలరు, గాలి కదలికలని నిర్దేశించగలరు, ఇంకా చిన్న మాయలు చేయగలరు. వీటన్నింటినీ నాగరికమైన కులీనులు ‘నీచమైనవి’గా పరిగణిస్తారు. ఏనిమాయిడ్ స్వయంగా ఒక గొప్ప తాంత్రికుడు కావాలని ఆశపడ్డాడు. అతని మెదడుపై సమూరా చేసిన మాయ వల్ల కుజగ్రహానికి వచ్చాడు. అమృత ఔషధాన్ని తీసుకురావడం కోసం నియమించబడ్డాడు.

గనీమీడ్ మీద ఇటువంటి జంతుజీవులు జీవిక కోసం ఏం చేస్తారు? వారు కూలీలుగా, సేవకులుగా, డ్రైవర్లుగా, చిన్న విమానాలు లేదా రైళ్లను నడిపే పైలట్లుగా పని చేస్తారు. మరికొంత మంది భూఉపరితలం పైన ఉండే టైటాన్ లేదా వీనస్ స్పేస్ కాలనీలలోని దుష్ట ‘ఆత్మల’ను పారద్రోలేందుకు ‘విశ్వశక్తి’ని ఉపయోగించి ఇంద్రజాలికులుగా జీవనోపాధి కోసం ఇతర గ్రహాలకి వెళ్లారు.

సౌర వ్యవస్థ యొక్క ఈ ప్రాంతం శుక్ర, శని గ్రహాల ఉపరితలంలో తేలియాడే కాలనీలకు,  టైటాన్, గనీమీడ్ లోని భూగర్భ కాలనీలకు ప్రసిద్ధి చెందింది.

శుక్రగ్రహం యొక్క మొత్తం ఉపరితలం వందలాది మైళ్ల తుఫానులు మరియు మేఘాలతో నిండిపోయింది, జీవించడానికి అనువుగా ఉండదు. వారు శుక్రగ్రహానికి సుమారు 400 కిలోమీటర్ల దూరంలో ఒక ప్లాట్‌ఫాంపై ఉన్న కాలనీలు, గృహాలు మరియు వ్యవసాయ క్షేత్రాలు, గింజలు మరియు కూరగాయలు పండించుకుంటున్నారు. ఇదే రకమైన కాలనీలు శనిగ్రహం పైనా ఉన్నాయి. అయితే శాస్త్రవేత్తలు, లోతైన స్థలంలో సాహసాలను కోరుకునేవారు, ఇంకా అసాధారణ అన్వేషకులు ఇక్కడ నివసిస్తారు. సౌర వ్యవస్థ లోని మానవ కాలనీల గురించి నేను అధ్యయనం చేసిన విషయాలను గుర్తు చేసుకున్నాను.

కానీ గనీమీడ్ రాజు? అతను ఎవరు? ధనవంతుడైన నియంతా? డబ్బుని సంపదనీ ఎలా పొందాడు?

ప్రజాస్వామ్యం లేదా నియంతృత్వం కంటే, రాచరికం ఎప్పుడూ నన్ను అడ్డుకుంది. వెయ్యి సంవత్సరాలలో రాజులు ఉన్నారు. బ్రిటీష్ చక్రవర్తులు, రోమన్ చక్రవర్తులు, ఈజిప్షియన్ ఫరోలు, భారతీయ మొఘలులు మొదలైన వారిని దైవిక హక్కులు కలిగి ఉన్నట్టుగా భావిస్తారు. కొంతమంది రాజులు 4 వ సహస్రాబ్దిలో కూడా తమ పాలనను కొనసాగించారు.

ఇతర రాజ్యాలను లేదా పాలితులను దోచుకోకపోతే ఏ రాజు గొప్పగా ఉండడని నేను అనుకున్నాను. కానీ నా విరోధి, నన్ను వేధించేవాడైన సమూరా వంటి మాంత్రికులు కూడా రాజులు, చక్రవర్తలవ్వాలని కోరుకుంటారని తెలిసింది. ఈ మహత్వోన్మాదులు ఇతరుల శరీరాలను, సంపదను, మనస్సులను కూడా పరిపాలిస్తారు.

మేము అదృశ్యరూపంలో, భూగర్భ కాలనీ యొక్క రాతి గోడలలో నిర్మించిన పెద్ద ద్వారాల గుండా రాజు నివసించే రాజభవనంలో ప్రవేశించాము. ఈ నిర్మాణాలు గాభరాపెట్టేలా ఉన్నాయి – రాతిగోడల మధ్యగా చిన్న వంతెనలు మరియు నడక కారిడార్లు కట్టబడి ఉన్నాయి. లోతుగా భూగర్భ స్టేషన్లకు, ప్లాట్‌ఫారాలకు దారితీసే గోడలు నిర్మించబడ్డాయి.

“ది కింగ్‌డమ్ ఆఫ్ గనీమీడ్ రాయల్ ప్యాలెస్ – సితె ది ఓరియన్.” అని తలుపుల మీద బంగారు అక్షరాలతో వ్రాసి ఉంది. ఉపగ్రహ కాలనీ యొక్క చిత్ర లిపిలోనూ, యూనివర్సల్ డిజిటల్ భాషలోనూ, ఆంగ్లంలోనూ వ్రాసి ఉంది.

రాజు గారి శిరస్సు ముద్ర బంగారంతోనూ, మణులతోనూ రూపొంచించినది అక్కడ ఉంది. దాని కింద రాజు ఫెరియస్ – 3450 – గురుగ్రహాల రాజ్యాల విజేత అని చెక్కబడి ఉంది. బహుశా అది అతని గౌరవ ప్రత్యయం. ద్వారానికి ఇరు వైపులా ఇద్దరు భద్రతా సిబ్బంది ఉన్నారు. వారు ఎర్ర బారెల్స్ మరియు బటన్లతో భూమి యొక్క ‘మిలీనియం రూజ్’ తుపాకుల వంటి ఆయుధాలు కలిగి ఉన్నారు.

డిమిట్రీ “ఒవ్రె  లే పోర్త్!” అని మంత్రోచ్చారణ చేయసాగింది. శరీరాన్నిబిగించి, చేతులను ముందుకు చాచి, కురులు జారుతుండగా, ఛాతి పొంగి, పెదాలు వణుకుతున్న డిమిట్రీని చూస్తుంటే… ఆమె అంతటి అందమైన మంత్రగత్తె ఎక్కడా లేదని అనిపించింది నాకు.

మంత్రప్రభావంతో ద్వారాలు తమంతట తాముగా తెరుచుకున్నాయి. తమ ప్రమేయం లేకుండా తలుపులు ఎలా తెరుచుకున్నాయో అర్థం కాక గార్డులు తెల్లమోహం వేశారు. మేము అదృశ్యరూపంలో రాజభవనంలోకి నిశ్శబ్దంగా ప్రవేశించాం. గార్డులు తమ తుపాకులను గాలిలోకి గురిపెట్టడం చూసిన డిమిట్రీ వెనక్కి తిరగకుండానే “ఫెర్మే! ఫెర్మే!ఫెర్మే!” అంటూ మరో మంత్రాన్ని ఉచ్చరించడంతో తలుపులు మూసుకుపోయాయి.

సైనికులు, శిల్పాలు ఉన్న మెట్లని ఎక్కి పెద్ద హాలులోకి ప్రవేశించాం. వజ్రాల రంగు చాండిలియర్ వేలాడుతున్నా కూడా అక్కడ వెలుతురు బాగా తక్కువగా ఉంది.

“యురేకస్, నాకు రాజభవనము యొక్క లోపలి ప్రదేశాల మ్యాప్ ఇవ్వు. మేము ఎక్కడికి వెళ్ళాలి?” అన్నాను.

యురేకస్ నా ఇయర్‌ఫోన్‌లో చెప్పింది “మాస్టర్! మొదట హాల్స్ చూడండి. తరువాత  ప్రజల సభ అసెంబ్లీ గదికికి వెళ్లండి. ఆ తరువత రాజమందిరంలో రాజుగారి లివింగ్ రూమ్, బెడ్ రూములు మరియు అతని భోజనశాలలు వెతకాలి. భోజనశాల ప్రక్కన పూజ గది ఉంది. అవును, నేను లోపలి ప్రాంతమంతా స్కాన్ చేయగలను. ఇక్కడ విగ్రహాలు, స్తంభాలు మరియు స్థూపాకార వస్తువులు ఉన్నాయి. కమ్యూనికేషన్ పరికరాలున్న మరొక గదిలో అరడజనుమంది అధికారులు స్క్రీన్ ముందు కూర్చొని ఉన్నారు.”

యురేకస్ శరీరంలోపల ఒక అంతర్నిర్మిత ఎక్స్- రే స్కాన్, ఇన్‌ఫ్రా-రెడ్ కెమెరా ఉన్నాయి. అవి గోడలలోంచి సైతం చొచ్చుకుపోగలవు. దాని ఛాతీ ఉన్న స్క్రీన్ మీద మ్యాప్‌లు చూడవచ్చు, 3డి లో ప్రింట్ చేయవచ్చు. దాని ప్రకారం నేను నా జట్టు సహచరులకు మార్గదర్శకత్వం చేయగలను.

“డిమిట్రీ, నిశ్శబ్దంగా పరిగెత్తు! మంత్రాలు చదవద్దు. రాజుగారి శయనమందిరం కుడి వైపున ఉన్న గదికి వెళ్ళు! అది పూజగది లేదా విలువైన వస్తువులను కలిగి ఉండే గది కావచ్చు. మనం అక్కడ శోధిద్దాము!” అన్నాను.

ఇలా మేము అదృశ్యంగా నడవాసాగాం. కింగ్ ఫెరియస్ లేదా అతని సిబ్బంది, సైనికులు తాంత్రికులై ఉండరని ఆశించాను. వారు మా పై విరుగుడు మంత్రాలు ప్రయోగించరని అనుకున్నాను.

వాస్తవానికి గనీమీడ్‌లో జంతువుల విభాగానికి చెందిన జంతురూపులైన మానవులు మాత్రమే విశ్వశక్తిని ఉపయోగించగల సామర్థ్యాన్ని కలిగి ఉన్నారని నాకు తెలుసు.

కాబట్టి మేము అదృష్టవంతులం.

భోజనశాల బంగారు మరియు గాజు బల్లలతో, విలక్షణంగా చెక్కిన చెక్క కుర్చీలతో విశాలంగా ఉంది, ఈ బల్లలు, కుర్చీలు చాలా ఖరీదైనది కావచ్చు, బహుశా భూమి నుండి దిగుమతి చేసుకుని ఉంటారు, ఎందుకంటే టేకు అక్కడ సమృద్ధిగా లభిస్తుంది, ఇలాంటి కాలనీలలో అది అలభ్యం.

పడక గది! నేను తన పట్టపురాణులతో పెద్ద మంచం మీద నిద్రిస్తున్న రాజుని చూశాను, ఇద్దరు స్త్రీలు అతనికి ఇరువైపులా ఉన్నారు.

అతను పొడుగ్గా, నల్లగా మరియు కండలు తిరిగిన శరీరంతో ఉన్నాడు, అతని కేశాలు భుజాల వరకు వ్యాపించి ఉన్నాయి. అతను ధరించిన రాత్రి దుస్తులు విచిత్రంగా ఉన్నాయి. మహిళలు నిద్రిస్తున్నారు, వాళ్ళ పక్కగా ఉన్న బల్లలపై ఖాళీ గాజు జాడి మరియు పొడవాటి వైన్ గ్లాసులు ఉన్నాయి. మద్యం సేవించి ఆ మత్తులోనే నిద్రించారని అర్థమవుతోంది…

డిమిట్రీ నెమ్మదిగా మునివేళ్ళపై నడిచి వెళ్ళి విలువైన వస్తువులను ఉంచిన గది తలుపులు తెరిచింది.

ఇప్పుడు వాన్ కు జాక్, చాంద్, వారి వెనుకగా ఏనిమాయిడ్ లోపలికి ప్రవేశించారు. తరువాత యురేకస్ నిశ్శబ్దంగా లోపలికి వచ్చింది.

నేను ఆ విశాలమైన గదిలోకి ప్రవేశించాను. చీకటిగా ఉన్నా పైకప్పు దీపాలతో మెరుస్తున్నది.

అక్కడ అసంఖ్యాక వస్తువులు ఉన్నాయి. దేవతల బంగారు విగ్రహాలు, చెక్కిన వెండి కుర్చీలు, వెండి పూల కుండీలు, గంధపు చెక్కలతో తయరైన మంచాలు, బల్లలు, నల్ల చెక్క ఫ్రేములలో బిగించిన అద్దాలు, పురాతన ఫర్నిచర్ ఉన్నాయి.

వీటికి కొద్దిగా దూరంలో, ఒక్క ఉన్నత పీఠంపై ఒక పూలకుండీలో నిటారుగా నిలబెట్టి ఉన్న దానిని చూడగలిగాను – ఇనుము, దారువుతో రూపొందించిన 4 అడుగుల ఎత్తున్న మంత్రదండం! దాని కొన వద్ద అన్యదేశ జంతువు యొక్క ఎర్ర వెంట్రుకలు ఉన్నాయి. అది నీలం రంగులో ప్రకాశిస్తోంది.

‘ది వాండ్ ఆఫ్ జూపిటర్!’

నేను గొణిగాను, ఆపై బిగ్గరగా అన్నాను.

“మేము దానిని చూడలేము, నువ్వు స్వచ్ఛమైన తాంత్రికుడివి!” అంది డిమిట్రి గొణుగుతూ, నవ్వుతూ.

“నేను దానిని పట్టుకుంటాను, వెంటనే ఈ స్థలం విడిచిపెడదాం!” అన్నాను. నేను అప్పటికే ఆ మంత్రదండాన్ని దాని స్థానం నుండి వెలికితీసి నా చేతిలో పెట్టుకున్నాను.

“జాగ్రత్త మాస్టర్! భవిష్యవాణి కోసం వెతకండి!” అంది యురేకస్ నా ఇయర్‌ఫోన్‌లో.

ఖచ్చితంగా వెతకాల్సిందే. మంత్రదండం అడుగున దొరికిందది. ఇది నాకు చిరపరిచితమైన చర్మపత్రం. దాని మీద బంగారు అక్షరాలతో ఏదో రాసి ఉంది.

“ఓ స్వచ్ఛమైన, నిస్వార్థమైన అదృష్టవంతుడైన మాంత్రికా! ఇక్కడిదాకా వచ్చి పవిత్రమైన గురుగ్రహపు మంత్రదండాన్ని పొందిన తాంత్రికా! దీన్ని చేత పట్టుకుంటే మీ శక్తులు రెట్టింపు అవుతాయి. ఏకాగ్రతను నిలుపుకొని సూచించండి, దాంతో మీరు ఏదైనా చేయవచ్చు!

కాని మీరు అమాయకులను, స్త్రీలను, పిల్లలను చంపలేరని హెచ్చరిస్తున్నాము. అలా మీరు చేస్తే, చేసిన ప్రతిసారీ మీ శక్తి మీ సగమైపోతుంది. ఇది వృద్ధ మాంత్రికల సంఘం ఆదేశం.”

మంత్రదండాన్ని గట్టిగా పట్టుకుంటూ “నిజమే మరి!” అనుకున్నాను. వెనువెంటనే నా శరీరంలో ఏదో అద్భుతశక్తి ప్రవేశించినట్లు గ్రహించాను.

భవిష్యవాణి నిజమైతే నేను ఇప్పుడు 2000 నక్షత్రాల స్థాయి మాంత్రికులకు ఉండేంత శక్తిని సంపాదించుకున్నాను.

“ఇక వెళ్దాం. సైనికులు, గార్డులు రావడానికి ముందే ఇక్కడ్నించి తప్పించుకోవాలి!” అన్నాను.

***

రాజుగారి శయన మందిరాన్ని దాటుతూ, లోపలికి చూశాను. రాజు ఇంకా నిద్రిస్తునే ఉన్నాడు. అతని నల్లని పొడవాటి చెయ్యి తన భార్య ఎత్తైన ఎదపై వేసి ఉంది.

గురుగ్రహపు మంత్రదండం నాకు చాలా శక్తిని, ఆత్మవిశ్వాసాన్ని ఇచ్చింది.

దాన్ని నా ముందు పెట్టి, “ప్రయాణం చేయడానికి మాకొక రోవర్ క్రాఫ్ట్ లభించుగాక!” అన్నాను.

మేము అదృశ్యంగా ఉన్నాము, కానీ ఇంకెంతో సేపు ఉండలేం. మా శక్తులు క్షీణిస్తున్నందున మేము కొన్ని గంటలు మాత్రమే అదృశ్య రూపాన్ని ఉపయోగించుకోగలము. ఇప్పటికే డిమిట్రీ, వాన్ కు జాక్ పరిగెట్టడం నాకు కనబడుతోంది.

మేము రాజభవనం నుండి బయటకు వచ్చాము. మెట్ల దిగి వీధిలోకి పరిగెత్తాము.

ఉన్నట్టుండి ఆ మంత్రదండం మెరుపులను వెదజల్లింది. నా శరీరమంతా వణికిపోయింది.

పైన గాజు గోపురంతో కూడిన రోవర్ క్రాఫ్ట్ వంటిది, ఐదుగురికి సరిపోయే చిన్న కారు మాకెదురుగా ఉంది. అప్పటికే దాని ఇంజన్ ఆన్ చేసి ఉంది.

“దాంట్లో ఎక్కండి!” అని అరుస్తూ ఆదేశించాను. యురేకస్‌తో సహా మేమంతా కార్లోకి ఎక్కాం. కంట్రోల్ ప్యానెల్ పట్టుకుని వాహనాన్ని నడిపిస్తున్న ఆనందం ఏనిమాయిడ్ ముఖంలో స్పష్టంగా కనిపిస్తోంది.

“మాస్టర్ హనీ! ఇదంతా పూర్తయ్యాకా, ఈ గురుగ్రహపు మంత్రదండాన్ని నాకిస్తారా? దీన్ని పొందాలని ఎంత కాలం నుంచో ఎదురుచూస్తున్నాను” అన్నాడు ఏనిమాయిడ్.

దాన్ని పొందడం అతనికి ఎంత ఉత్తేజకరంగా ఉంటుందో నాకు తెలుసు.

“సరే!” అన్నాను.

“ముందు మనం తిరిగి వెళ్లి, సమూరాకు దీన్ని ఇవ్వాలి. ప్రకృతిని విడిపించాలి. అతనింకా ఏమేమి అడుగుతాడో తెలియదు” అన్నాను

రోవర్ ఒక తేనేటీగలా సొరంగంలో ఉన్న భూగర్భ వీధుల గుండా వేగంగా ప్రయాణిస్తోంది, రాజమందిరం మెట్ల నుంచి ప్రయాణించి, గ్రహం ఉపరితలంపైకి వచ్చాం. అక్కడ కొద్దిసేపు వెతికాక, మార్గాన్ని నిర్ధారించుకుని, గనీమీడ్ సముద్రం వైపుకి దూసుకుపోయాం.

నా ఇయర్‌ఫోన్‌లో చప్పుడయింది. “మాస్టర్… సమారా మాట్లాడుతున్నాడు” యురేకస్ అంది. “అతను నా ద్వారా ఐజి నెట్ ఫోన్లో ఉన్నాడు!”

కొన్ని క్షణాల తర్వాత, ఒక చెవిలో కీచుమనే స్వరం వినిపించింది.

“హనీ ఆమ్రాపాలి, నీకది దొరికిందా? ‘వాండ్ ఆఫ్ జూపిటర్’ లభించిందా?”

“దొరికింది! ప్రభూ! దాన్ని గుర్తించి, తీసుకున్నాను. మేము తిరిగి సముద్రం వైపుకు వస్తున్నాం. దయచేసి మమ్మల్ని ఇక్కడ్నించి తప్పించండి! ఈ మంత్రదండానికి కొన్ని శక్తులున్నాయి. నేను దాని సహాయంతో ఒక రోవర్ క్రాఫ్ట్‌ని పొందాను. కానీ మిమ్మల్ని చేరుకోవటానికి సముద్రంలో ఎలా ప్రయాణించాలో నాకు తెలియదు” అన్నాను

“హా! హా! గురుగ్రహపు అద్భుతమైన మంత్రదండమంటే స్వయంగా దైవం బృహస్పతే. మీరు సముద్రం దగ్గరికి రాగానే ఒక వేగవంతమైన పడవని సృష్టించండి – దాని సహాయంతో మీరు ఏమైనా చేయగలరు! అప్పుడు యురేకస్ నుంచి కో-ఆర్డినేట్స్ తీసుకోండి. నా ఐజి నెట్ ద్వారా నేలపై మీరున్న స్థానం నాకు తెలుసు. మీరు గనీమీడ్ సమయంలో ఒక గంటలో చేరవచ్చు! శీఘ్రం! సురక్షితంగా ఉండండి! త్వరలో వాళ్ళొస్తారు!” చెప్పాడు సమూరా.

కాసేపటికే గనీమీడ్ సముద్రం యొక్క నీలి జలాలు దర్శనమిచ్చాయి. అదే సమయంలో నేను మా వెనుకగా లేజర్ గన్ పేలుస్తున్న శబ్దాలు, ఏవో వాహనలు అత్యంత వేగంగా వస్తున్న ధ్వనులు విన్నాను.

ఎర్రని దీపాలతో వెలుగుతూ, వేగంగా కాల్పులు జరుపుతూ వస్తున్న నాలుగు పసుపురంగు రోవర్లు కనబడ్డాయి.

“పసుపు గురుగ్రహం, గనీమీడ్‌ల రంగు. వాళ్ళు గార్డులు. మనల్ని చొరబాటుదారులుగా గ్రహించారు. ఇమ్మిగ్రేషన్ నుండి మనల్ని వెంటాడుతున్నారు. గరిష్ట వేగంతో వెళ్ళండి!” లోగుంతుతో సూచించింది యురేకస్.

“అలాగే” అన్నాడు ఏనిమాయిడ్.

భయానకంగా ఉన్న గనీమీడ్ ప్రకృతిదృశ్యాలను దాటుతున్నాం. గాజు గోపురం సూర్యరశ్మిని రోవర్ లోకి పంపుతోంది, ఉల్కాపాతం వల్ల కలిగే నష్టాన్ని నివారిస్తోంది, ఇప్పుడది గార్డుల లేజర్ బుల్లెట్ల వర్షం నుండి మాకు రక్షణ కల్పిస్తోంది.

నేను తీవ్రంగా ఆలోచించాను. సముద్రాన్ని చేరుకున్నాకా ఏం చేయాలి?

ఇప్పుడు ప్రతి క్షణం నా మంత్ర శక్తులకు పరీక్ష. నా ఉనికి మొత్తం – అతీత కార్యాలను చేయడానికి – అవసరమైన 2000 నక్షత్ర స్థాయిని పొందింది. ఇది నాకు సౌకర్యవంతంగా లేదు. కానీ అది వాస్తవం.

“ఈ రోవర్ సముద్రపు నీటి మీద ప్రయాణించలేదు. నేను ఒక వేగవంతమైన పడవని సృష్టించాలి” అనుకున్నాను.

వేగంగా ప్రయాణిస్తున్న ఆ రోవర్‌లో ఉన్న ఇరుకైన ప్రదేశంలోనే నా ముందు ఆ మంత్రదండాన్ని ఉంచుకుని నా శక్తితో సంకల్పించాను.

“స్పేస్‌షిప్‌ని చేరుకోవడానికి ఒక వేగవంతమైన పడవ ఉండుగాక”.

ఒక్క క్షణం పాటు ఏమీ జరగలేదు. ఆ తరువాత మంత్రదండం తీవ్రంగా కదిలిపోయింది, మెరుపులు వచ్చాయి.

“హనీ! జాగ్రత్త… నా వీపు కాలిపోతుంది…” హాస్యమాడింది డిమిట్రీ ఎప్పటిలానే.

“చాలా వేగవంతమైనది కావాలి! 300 కిలోమీటర్ల దూరంలో ఉన్న స్పేస్‌షిప్‌ని అత్యంత వేగంతో చేరుకునే పడవ కావాలి. వాళ్ళొచ్చేస్తున్నారు” అన్నాడు వాన్ కు జాక్.

“నేను ఖచ్చితంగా చెప్పలేను” అన్నాను. “దీనికి ఎంత వేగం అవసరం? కానీ ఎవరైనా వాళ్ళ దృష్టి మళ్ళించాలి! చాంద్, వాన్ కు జాక్… మీరు వాళ్ళతో పోరాడాలి, వారిని దారి మళ్ళించవలసి ఉంటుంది. చెయ్యగలరా?”

“చేయగలం. వాహనాన్ని ఆపండి!” అన్నాడు చాంద్.

వాన్ కు జాక్ గుర్రుమన్నాడు.

నేను రోవర్‌ని ఆపమని ఏనిమాయిడ్‌కి చెప్పాను, వెంటనే ఇద్దరూ దిగిపోయారు.

మేము మా రోవర్‌ని స్టార్ట్ చేశాం. “అరగంట పాటు వాళ్ళని నిలువరించండి. తరువాత సముద్రం మీదకి వచ్చేయండి! సురక్షితంగా ఉండండి!” చెప్పాను వాళ్ళతో.

మనం సముద్రం వైపుకి దూసుకుపోయాం. చంద్రగ్రహానికి చెందిన చాంద్, కుజగ్రహానికి చెందిన వాన్ కు జాక్ – సమర్థులైన మాంత్రికులిద్దరూ – గనీమీడ్ భద్రతాదళాలపై తమ శక్తులను ప్రయోగించడం ప్రారంభించారు.

ఈ పోరాటంలో విశ్వశక్తి ప్రయోగం ఒక వైపు, లేజర్ తుపాకుల మరో వైపు.

నిజమైన మరియు అద్భుత కాల్పనిక అగ్నిగోళాలు ఇరువైపులా ప్రయోగించబడుతున్నాయి.

రోవర్‌లో నేను, డిమిట్రీ, ఏనిమాయిడ్ వేగంగా సముద్రం వైపు దూసుకు వెళ్లి వెనుక నుంచి వస్తున్న బుల్లెట్లను తప్పించుకున్నాం.

“తొందరగా రండి! హనీ, మంత్రదండం ఉంది కదా?” అంటూ రోబో యురేకస్ ద్వారా సమూరా యొక్క క్రూర స్వరం అరిచింది.

“ఉంది, ఉంది! కానీ మేము ఇబ్బందుల్లో ఉన్నాం. మమ్మల్ని వెంబడిస్తున్నారు. చాంద్, వాన్ కు జాక్ బుల్లెట్లను ఎదుర్కుంటున్నారు. వాళ్ళని రక్షించడానికి మీ శక్తిని ఉపయోగించండి!” అన్నాను.

కొంత నిశ్శబ్దం తర్వాత సమూరా అరిచాడు. “నాకనవసరం! ఇది నీ మిషన్. నువ్వు రాకపోతే నీ భార్య, నీ మామ చనిపోతారు. రా!”

అక్కడంతా గందరగోళంగా ఉంది.

గురుగ్రహం యొక్క చిన్న ఉపగ్రహంలో నీలి సముద్రం. ప్రాణాలు కాపాడుకోడానికి నేను ఒక వెర్రి చిన్న రోవర్‍లో ప్రయాణం చేస్తున్నాను. నా ఇద్దరు సహచరులను గ్రహాంతర సైనిక దళాల బుల్లెట్లతో వెంటాడుతున్నారు.

దూరంగా శిలలు, కొండలతో చెట్లతో చుట్టూ ఉన్న ప్రకృతిదృశ్యం భయానకంగా ఉంది.

అప్పుడు నేను వేదనామయమైన కేక ఒకటి విన్నాను.

చాంద్ తన ఛాతీ పట్టుకొని పడిపోయాడు.

ఒక గ్రహాంతర సెక్యూరిటీ గార్డుఅతనిగుండెలో కాల్చాడు.

అతన్ని కాపాడటానికి వెనక్కి వెళ్ళాలా? చాంద్ నిర్జీవుడయ్యాడు. నాకది కోలుకోలేని దెబ్బ. వేదన! దాదాపు వంద గజాల దూరంలో తేలుతున్న సమూరా స్పేస్‌షిప్ ‘ఎత్వాల్ రూజ్’ యొక్క మసక దీపాలు చూడగలిగాను. మేము స్పేస్‌షిప్‌కు చేరువలో ఉన్నాము.

వెంటనే మరో తూటా చప్పుడు ఇయర్‌ఫోన్‌లో మరింత స్పష్టంగా వినబడింది. ఇక్కడ వాతావరణం లేకపోవడంతో నా చెవుల్లో ప్రతిధ్వని వస్తోంది.

వాన్ కు జాక్ పడిపోయాడు.

“అతని చేతులపై కాల్చారు. అతను సజీవంగానే ఉన్నాడు!” అరిచింది యురేకస్. “విశ్వశక్తి ఉపయోగించి మన వద్దకు ఎగిరి రమ్మని అతనికి సందేశం పంపుతున్నాను” అంది.

మేము సమూరా యొక్క ‘ఎత్వాల్ రూజ్’ దగ్గరకు వచ్చాము… యాభై గజాలు…

చుట్టూ అంధకారం. ఉన్నట్టుంది వాతావరణంలో ఆకస్మిక చల్లదనం మొదలైంది.

విశ్వశక్తి ఉపయోగించబడుతుందని నాకు తెలుసు. వాన్ కు జాక్‌కి రక్తం కారుతోంది, కాని గాల్లో ఎగరడానికి విశ్వశక్తిని ఉపయోగించాడు. గాయపడి రక్తమోడుతున్న పక్షిలా అతను ఆకాశంలోఎగురుతున్నాడు. ఈతగాడిలా గాలిలో ఒక చేతిని కదిలిస్తూ వస్తున్నాడు.

వ్యోమనౌకకి ఇరవై గజాలు! వాన్ కు జాక్ నౌకని చేరుకోగలడని గ్రహించాను. పడవ వేగాన్ని తగ్గించాలని చూశాను. “వేగం తగ్గించు” అని ఏనిమాయిడ్‌కి చెప్పాను.

మేము స్పేస్ షిప్ యొక్క ‘డాక్ ఇన్ పోర్ట్’ చేరగానే, వాన్ కు జాక్ మా పైన ఎగురుతూ కనబడ్డాడు. నేను కొద్దిగా గాల్లోకి ఎగిరి, అతన్ని క్యాబిన్ లోకి లాగాను. అతనిపై ప్రయోగించిన మరొక లేజర్ బుల్లెట్ వచ్చి వ్యోమనౌకని తాకి ఎరుపు రంగు మెరుపుల్లా మారిపోయింది.

“బానే ఉన్నారా?” అని మేమంతా అరుస్తూ లోపలికి వెళ్ళాం. స్పేస్‌షిప్ పోర్ట్ తెర్చుకుని, డాకింగ్ మొదలవగానే మా రోవర్ లోపలికి వెళ్ళింది.

“నేను గాయపడ్డాను, ప్రస్తుతానికి పర్వాలేదు. కానీ… చాంద్ మరణించాడు” అంటూ అరిచాడు వాన్ కు జాక్.

నా మిషన్‌లో మొదటి ప్రాణనష్టం. చంద్రగ్రహం నుండి వచ్చిన చాంద్ లేకుండా లోపలికి వెళ్తుంటే మనసు భారమైంది. కనీసం అతని శరీరాన్ని తిరిగి ఎలా తేవాలో నాకు తెలియదు, తన కుటుంబానికి లేదా తన గ్రహంలోని బంధువులకు ఎలా పంపించాలో కూడా నాకు తెలియదు.

యుద్ధం ఎల్లప్పుడూ నేరమే. నాల్గవ సహస్రాబ్దిలో కూడా యుద్ధానికి ఏ సానుభూతి లేదా ఓదార్పు తెలియదు…

ముఖ్యంగా సామ్రాజ్యాలు కోల్పోయి వాటిని తిరిగి పొందడానికి ఏదైనా చేసేందుకు సిద్ధమయ్యే దుష్ట చక్రవర్తులతో ఇదీ మరీ కష్టం.

ప్రాణనష్టం వాళ్ళకి కేవలం ఓ పెట్టుబడి లాంటిది.

అధ్యాయం 27: లెత్వాల్ రూజ్-2

స్పేస్‌షిప్ కంపించింది, అదిరింది. తరువాత గట్టిగా గర్జించి గనీమీడ్ సముద్రం నుండి అంతరిక్షంలోకి దూసుకుపోయింది.

నేను, డిమిట్రీ, ఏనిమాయిడ్ చెమటతో పూర్తిగా తడిసిపోయాం. ఒత్తిడి నిండిన పలాయనం వలన, సహచరుడు చాంద్‌ని కోల్పోవడం వలన ఒక రకమైన విభ్రాంతి స్థితిలో క్యాబిన్‌లో నిలబడిపోయాం.

ఈ స్పేస్‌షిప్‌ని ఒక విమానం లాగా ప్రయాణించటానికి అనువుగా రూపొందించారు. మామూలు విమానంలా గాల్లోకి లేచి, దాని రాకెట్లను పేల్చడం ద్వారా స్పేస్‌షిప్‌ని అంతరిక్షంలో నిర్ధారిత పయన పథంలో లేదా ఒక గ్రహం చుట్టూ కక్ష్య లోకి ప్రవేశపెడతారు. ఈ ప్రక్రియకి ఒక గంట సమయం పడుతుంది. అప్పటి వరకు ప్రోటోకాల్ నిబంధనల మేరకు మేము సీటు బెల్టులు పెట్టుకుని, ఆక్సీజన్ మాస్కులు ధరించి మా సీట్లలో కూర్చోవాలి.

ఇంతలో సమారా సేవకులు వచ్చారు. మగ నర్సులు మా తడి శరీరాలను తుడిచి, మా వణుకును తగ్గించేందుకు పొడి దుస్తులను ఇచ్చారు. మాకు వేడి చాక్లెట్ పానీయం, వెచ్చని రొట్టె రొట్టెలు మరియు కూరగాయల మసాలా సూప్ ఇచ్చారు.

మా దురవస్థ గురించి ఆలోచిస్తుండగా, అప్పుడు వచ్చాడు సమూరా. ఆ భారరహిత స్థితిలో అతనెలా ఉన్నాడంటే ఓ అస్థిపంజరం మానవరూపంలో దెయ్యంలా తేలుతున్నట్టుగా ఉంది. అతనితో పాటే ఆల్ఫావ్యవస్థకి చెందిన – తలలు సాగినట్టుండే వింత, ముసలి మాంత్రికులు కూడా వచ్చారు.

తర్వాత వచ్చింది ప్రకృతి. ఆమె ముఖం పాలిపోయినట్టుగా ఉంది, మొహంలో ఆదుర్దా ఉంది. ఆమె ఎప్పుడూ ధరించే చీరలకు భిన్నంగా తనిప్పుడు ధరించిన దుస్తులామెకి చాలా బిగుతుగా ఉన్నాయి.

“హనీ!” అంటూ అరిచింది. “నీకేం కాలేదు కదా?”

సమూరా బొంగురుగొంతుతో అరిచాడు.

“ముందు నాకు ఆ మంత్రదండాన్ని ఇవ్వు. అప్పుడే ప్రకృతిని పంపుతాను”

నేను నా పొడవైన వదులుగా ఉండే దుస్తులలో గురుగ్రహపు మంత్రదండాన్ని దాచిపెట్టాను. నా శరీరం యొక్క పై ఉన్న ముందరి దుస్తుల లోపలి నుండి మంత్రదండాన్ని బయటకు తీశాను.

“ఇదిగోండి చక్రవర్తీ! మీ మంత్రదండం! ఇది చాంద్ జీవితాన్ని బలిగొంది, వాన్ కు జాక్‌ని గాయపరిచింది. దీని కోసం మా విశ్వశక్తిలో చాలా భాగం వ్యయమైపోయింది. మేము పునరుత్తేజం పొందేవరకూ ప్రాణంలేనివాళ్ళమే! కనీసం ఒక వారం రోజుల వరకూ మేము ఏ మాయలు ప్రయోగించలేం!” అన్నాను మంత్రదండం అందిస్తూ.

ఎముకలతో ఉన్న పొడవాటి చేతిని ముందుకు చాచి మంత్రదండాన్ని అందుకున్నాడు. భీతావహమైన ఆనందం వ్యక్తమవుతున్న పుర్రె లాంటి ముఖంలోని నోట్లోంచి దంతాలు బయటకి కనిపించేలా చిత్రంగా నవ్వాడు. “హా! హా! హా! అద్భుతమైన గురుగ్రహపు మంత్రదండం! ఇది నాది. దీనితో నేను వస్తువులను సృష్టించగలను. విశ్వశక్తిని సృష్టించగలను. పోరాడగల సైనికులను సృష్టించగలను. తుఫానులు సృష్టిస్తాను, దేన్నయినా ఆపుతాను” అన్నాడు.

“మీరు హాని చేయకూడదు, అమాయకులను చంపకూడదు, లేదా బెదిరించకూడదు. భవిష్యవాణి చెప్పింది!” అన్నాను వినయంగా.

“హ! హా! ఒక మూర్ఖపు షరతు ఎల్లప్పుడూ ఉంటుంది, కాదంటావా? అన్ని అద్భుత వస్తువులను పొందడానికి, ఇది ఒక నియమం. పర్వాలేదు. ఇప్పుడు..” అంటూ ప్రకృతిని నాపైపు తోశాడు. “ఇదిగో మీ ప్రియమైన భార్య! సజీవంగా, ఆరోగ్యంగా ఉంది. ఇంకా భూమి మీద మీ మామ కూడా విడుదలయ్యాడు. నీవు నీ మాట నిలబెట్టుకున్నావు, నేను నా మాట…!” అన్నాడు.

ప్రకృతి పరిగెత్తుకొచ్చి నన్ను హత్తుకుంది. నా బుగ్గల్లో వెచ్చని రక్తం ప్రహహించింది. ఏకకాలంలో నాకు ఆనందం మరియు అసహ్యం కలిగాయి. మంత్రతంత్రాలు, విశ్వశక్తి, దుష్ట తాంత్రికులు… అన్నిటిపై ద్వేషం కలిగింది. ఎర్త్ కౌన్సిల్ తమ పథకంలో భాగంగా నన్నూ, పకృతినీ పావులుగా వాడుకుంటోంది.

‘ఎంపికైన వ్యక్తినా, నా మొహం!’ అనుకున్నాను.

ఒక్క క్షణం ఆలోచించి, బిగ్గరగా చెప్పాను. “నేను ఎంపికైన వ్యక్తిగా ఉండాలనుకోవడం లేదు. ఓ సాధారణ మానవుడిగా, నేను నాలా ఉండాలని, నా సొంత విశ్వవిద్యాలయంలో పనిచేస్తూ, మిగిలిన జీవితంలో ప్రకృతితో హాయిగా బతకాలని కోరుకుంటున్నాను!”

ప్రకృతి కూడా ఏడుస్తోంది. వెక్కిళ్ళ మధ్య చెప్పింది “హనీ! వాళ్ళు చెప్పిన పని పూర్తి చేసినందుకు ధన్యవాదాలు. నాతో పాటు మా నాన్ననీ కాపాడావు. ఇక నువ్వు ఇటువంటి సాహసాలు చేయడం నాకిష్టం లేదు!” అంది.

మగ నర్సులు గాయపడిన వాన్ కు జాక్‌ని ‘సిక్ బే’ కు తీసుకువెళ్ళి అతనికి చికిత్స చేయసాగారు. అది 21వ శతాబ్దపు ‘స్టార్ వార్స్’ టివి చిత్రాలలో చూపించిన స్టార్‌ఫ్లీట్ వంటి అంతర్ గ్రహ స్టార్‌షిప్ రకానికి చెందిన పెద్ద స్పేస్ షిప్. చాలా పెద్దది కానీ అవసరాన్ని బట్టి చిన్నదిగా లేదా పెద్దగా మారిపోతుంది.

కమాండ్ కాబిన్‌లో పెద్ద మానిటర్లున్నాయి, గాజు కిటికీలున్నాయి. సిబ్బంది, ప్రయాణీకులు, ఇంకా మాలాంటి ఖైదీల కోసం వివిధ రకాలైన గదులు ఉన్న కారిడార్లు ఉన్నాయి

సమారా నా దగ్గరికి వచ్చి, “హనీ, ప్రకృతి – మీకు ప్రయాణీకుల ప్రదేశంలో గది కేటాయించాం. మీరు వెళ్ళి విశ్రాంతి తీసుకోండి. మీ స్నేహితులను కూడా జాగ్రత్తగా చూసుకుంటాం. మీరు హాయిగా నిద్రపొండి. మనం ఇంకా చాలా దూరం ప్రయాణం చేయాలి” అన్నాడు.

“ఇంకానా? ఎందుకు ప్రభూ? దయచేసి మమ్మల్ని భూమికి పంపించండి. మేమిద్దరం బాగా అలసిపోయాము. నేను మిషన్‍ని వదిలేస్తాను!” అంటూ వేడుకొన్నాను.

చక్రవర్తి సమూరా తన నల్లటి దుస్తులతో నిటారుగా నిలిచాడు. పుర్రె లాంటి ముఖాన్ని చిట్లించాడు.

“అవును! నా లక్ష్యం సగం పూర్తయింది. నేను అమృత ఔషధం, వెండి కొవ్వొత్తి, యూనివర్సల్ మిర్రర్, ఇదిగో ఇప్పుడు ఈ మంత్రదండం పొందాను. తదుపరి దశలు వీనస్, టైటాన్‌లపై ఉంటాయి. ఇంకో రెండు వస్తువులు సాధించాలి. అప్పుడు నా కుజగ్రహంలోని అరుణభూములకు తిరిగి వెళ్ళి – ఆ ద్రోహి మీరోస్ నుండి నా రాజ్యాన్ని నేను తిరిగి పొందాలని అనుకుంటున్నాను. ఇవన్నీ అయ్యాకనే మీ సంగతి…. కాని నేను నిన్ను చంపను. అద్భుత వస్తువులను గుర్తించడం కోసం మరియు సౌర వ్యవస్థలోనూ, గెలాక్సీలోనూ మాంత్రికుల రాజ్యం ఏర్పాటు చేసేందుకు ఎంపికైన వ్యక్తికి నువ్వు… హా! హా!” అంటూ తనదైన బొంగురుగొంతుతో నవ్వాడు సమూరా.

“ఆ భవిష్యవాణిని వృద్ధ మాంత్రిక సంఘంలోని ఏ మూర్ఖ దుర్బలుడు రాశాడో నాకు తెలియదు. అసలు వాళ్ళెవరో కూడా తెలియదు. గ్రహాలు కాలనీలుగా మారని కాలంలో వాళ్ళు గ్రహాల చలనాన్ని లెక్కించి ఉంటారు. ఒకానొక ప్రాంతంలో ఒకానొక సమయంలో జన్మించినవాడు మాంత్రికుల గెలాక్టిక్ సామ్రాజ్యాన్ని ఏలుతాడని రాశారు. నా మొహం! దీనంత హాస్యాస్పద విషయం విశ్వంలో మరొకటి లేదు! ఆమ్రపాలి గ్రామంలో ఒక అనాథ అయిన హనీ అమ్రాపాలి, కేవలం 75 నక్షత్రాల స్థాయి శక్తి ఉన్న ఓ సాధారణ బయోమెడికల్ ప్రొఫెసర్ ‘ఎంపికైన వ్యక్తి’ అట! ఎలా? ఇవి భూమి యొక్క గుహలలో లేదా అడవులలోని కుటీరాలలో వేలాది సంవత్సరాలుగా ఖాళీగా కూర్చున్నోళ్ళు ఏవేవో ఊహించి రాసిన భవిష్యవాణి! ఆ కట్టుకథలనే మూర్ఖంగా తరతరాలుగా అందించారు.”

ఒక లోహ స్వరం ఇప్పుడు అభ్యంతరం చెప్పింది “కానీ ప్రభూ, నా మాస్టర్ వస్తువులను సరిగ్గా గుర్తించారు. ప్రస్తుతం విశ్వశక్తి ప్రయోగంలో 1000 నక్షత్రాల స్థాయి పొందారు. ఆయన గాలిలో ఎగరగలరు, నీటి మీద నడవగలరు. ఇవన్నీ జరుగుతున్నాయి!”

“నువ్వు నోరు మూసుకో! నేను అనేక శతాబ్దాల పాటు సౌర వ్యవస్థ యొక్క గ్రహాలను పరిపాలించాను, అయితే ప్రతి గ్రహంలో మాంత్రికుల కాలనీలు మాత్రమే నా అధికారంలో ఉండేవి. నేను పాలపుంత గెలాక్సీలో మూడు వందల కాలనీలను మాత్రమే పాలించాను. ప్రత్యేకమైన కాలనీలు నాపట్ల విధేయతను, విశ్వాసాన్ని చూపాయి, మొత్తం గ్రహాలు కాదు. పాలపుంతలో కూడా కోట్లాది గ్రహాలు మరియు వ్యవస్థలు ఉన్నాయి. రెండువైపులా దాదాపుగా వంద వేల కాంతి సంవత్సరాలు ఉన్నాయి. నేనా 300 రాజ్యాలని  కోల్పోయింది తిరుగుబాటుల వల్లా లేదా రాజకీయ సంక్షోభం, యుద్ధం కారణంగానే. నాకు సౌర వ్యవస్థ అంతటా అభిమానులు, అనుచరులు ఉన్నారు. కాని నేను కుజగ్రహంలోని అరుణభూములలో స్థిరపడ్డాను. నేను  కుజగ్రహపు మానవులను కూడా గెలవలేకపోయాను.

కాబట్టి ఏ ఒక్క వ్యక్తి గెలాక్సీ లేదా సౌర వ్యవస్థలను పాలించడం అసాధ్యం. కానీ ‘మాంత్రిక చక్రవర్తి సమూరా కొత్త సామ్రాజ్యం’ అనే నినాదంతో దీన్ని సుసాధ్యం చేయడం కోసం ప్రయత్నించమని నా అనుచరులను ప్రోత్సహిస్తున్నాను.

నాలాంటి వేల సంవత్సరాల వయస్సున్న తాంత్రికుడికే ఇది కష్టంగా ఉంటే, ఈ అల్ప మానవుడు ఎంపిక చేయబడిన వ్యక్తి ఎలా అవుతాడు? ఈ కట్టుకథ కాస్త నిజం, కాస్త అబద్ధం. కానీ నేను మిమ్మల్ని వీనస్ మీద వదిలివేస్తాను. హనీ, నువ్వు తిరిగి భూమికి వెళ్లి నీ భార్యతో జీవితాన్ని గడపవచ్చు, ఉద్యోగమూ చేసుకోవచ్చు. హా! హా! టైటాన్‍లో నాకు డిమిట్రీ సహాయం చేస్తుంది. అక్కడ ఏ వస్తువు ఉందో నేను మీకు చెప్పలేను. కానీ ఒరే బాబూ – నువ్వెంత మూర్ఖంగా అనిపించినా, సౌర వ్యవస్థలో అన్ని కాలనీలను తిరిగి పొంది, పాలించే నా ప్రయత్నాలలో నాకు ఆటంకం కలిగిస్తావనే నాకనిపిస్తోంది.”

ఈ ముసలి చక్రవర్తి అంత సుదీర్ఘంగా మాట్లాడడం మునుపు నేను చూడలేదు. అతనలా మాట్లాడుతూనే ఉన్నాడు. స్పేస్‌షిప్ ముందుకు పోతూనే ఉంది. తర్వాత మమ్మల్ని మా విశ్రాంతి గదికి వెళ్ళమన్నాడు, మేము వినమ్రంగా ఒప్పుకున్నాం. స్పేస్‌షిప్ ‘లెత్వాల్ రూజ్’ గురుగ్రహపు ఉపగ్రహం గనీమీడ్‌ని విడిచి శుక్రగ్రహం వైపు సాగిపోయింది.

***

(సశేషం)