విలువలున్న మానవజాతికీ, క్షుద్రశక్తులున్న మాంత్రికులకీ…. అంటే మంచికి చెడుకి మధ్య జరిగే పోరాటాన్ని ఒక స్పేస్ ఒపెరా ఫాంటసీ సైన్స్ ఫిక్షన్ నవలగా అందిస్తున్నారు డా. చిత్తర్వు మధు. తెలుగు సేత: కొల్లూరి సోమ శంకర్.

అధ్యాయం 37: టైటాన్‌కి పయనం!

సమూరా లేకపోవడంతో, సయోని బాధ్యతలు తీసుకుంది. ఆమె శక్తివంతురాలైనప్పటికీ, పునరుజ్జీవనం పొందినప్పటికీ, ఆమెని చూడడమంటే ఒక అదో దయనీయమైన దృశ్యం. ఆమె తల సరైన స్థానంలో లేదు. ఆమె ఆహారం ఎలా తింటుంది, ఎలా జీర్ణించుకుంటుంది? తల ఒక దిశలో, శరీరం మరో దిశలో ఉంటే ఆమె ప్రపంచాన్ని ఎలా చూస్తుంది వంటి సందేహాలు నాకు లేవు. అదొక వింత మాయాజాలం! ఆల్ఫా సెంటారి తాంత్రికులచే భయంకరమైన పొరపాటు జరిగింది. కానీ ఆమె తన స్వంత బూడిద నుండి మళ్ళీ సృష్టించబడింది కాబట్టి ఎవరూ ఫిర్యాదు చేయలేరు. తల ఎటుంటేనేం, కనీసం ప్రాణాలతో ఉంది. “డిఎన్‌ఎ అయానిక్ రీకన్‌స్ట్రక్షన్” అనే పద్ధతిలో నక్షత్రాంతర తాంత్రికులు ఆమెని బ్రతికించారని యురేకస్ నాతో రహస్యంగా చెప్పింది.

అటువంటి సాంకేతిక పరిజ్ఞానం సాధారణ జీవ శాస్త్రాలలో కూడా లభిస్తోంది, అయితే అత్యంత వ్యయంతో కూడినది. మిలియన్ యూనివర్సల్ డిజిటల్ యూనిట్లు ఖర్చవుతాయి. బూడిదలో ఉన్న డిఎన్‌ఎ నమూనా నుండి శరీరం సృష్టించబడింది కానీ బాగా నైపుణ్యం అవసరమైన జటిలమైన విషయం ఏంటంటే గుండెకి జీవం పోయడం, దాన్ని స్పందించేలా చూడడం; నిక్షిప్తం చేసుకున్న అన్ని జ్ఞాపకాలను కూడగట్టుకుని మెదడు పనిచేసేలా చూడడం! ఈ ప్రక్రియ చాలా సున్నితమైన మరియు శక్తివంతమైన విద్యుత్ ఛార్జ్‌ని కలిగి ఉంటుంది, ఇది హృదయ స్పందనను క్రియాశీలకం చేస్తుంది. సంస్కరించబడిన మెదడును ఖచ్చితమైన సూచనలతో  సక్రియం చేస్తుంది.

ఆల్ఫా తాంత్రికులు సయోనిని పునర్జీవితురాలిని చేయడానికి అత్యంత శక్తివంతమైన విద్యుత్ ప్రవాహాన్ని వినియోగించారనేది సుస్పష్టం. చంద్రుడి చీకటివైపున తుపాను రేగిన కాలంలో ఈ ప్రక్రియని అమలుచేసి ఉంటారు. సయోనిని పునఃసృష్టించడం – 2వ సహస్రాబ్ది లోని 19వ శతాబ్దం నాటి నవలలో ‘ఫ్రాంకెన్‌స్టెయిన్’ పునరుజ్జీవనంలా ఉండదు. “ఎందుకంటే”, అంటూ ఒక రోబోలో అరుదుగా కనబడే ఉత్సాహంతో చెప్పింది యురేకస్, “పునర్నిర్మించిన జీవి యొక్క జీవన కాలం ఒక సంవత్సరం మాత్రమే ఉంటుంది. సయోని ఒక సంవత్సరంలో లేదా అంతకుమించి కొద్ది రోజులలో చనిపోతుంది. ఆమె కుజగ్రహంపై నివసించినందున, అది అక్కడి సంవత్సర కాలం భూమి మీద దాదాపుగా 700 రోజులకి సమానం. అయానిక్ రీకన్‌స్ట్రక్షన్ పద్ధతిలో సజీవులైన మృతులు – ఒక సంవత్సరం కంటే ఎక్కువ కాలం జీవించిన దాఖలాలు లేవు. అంతరిక్ష పరిభాషలో ఒక ఏడాది అంటే ఆ గ్రహం సూర్యుని చుట్టూ తిరిగేంత కాలమనే అనుకోవాలి.”

సమూరాని అధికారంలోకి తీసుకురావడానికి, అన్ని సౌర వ్యవస్థల కాలనీలకు, ఆపై గెలాక్సీ లోని ఇతర ఆవాస గ్రహాలకు చక్రవర్తి కావాలనే అతని కలని సాకారం చేయడానికి సయోని అన్ని పద్ధతుల ద్వారా ప్రయత్నిస్తుందని అర్థమైంది.

ప్రయాణం సుదీర్ఘమైనది. సౌర వ్యవస్థలో జనావాసం ఉన్న టైటాన్‌లోని ఓ కాలనీకి వెళ్తున్నామని స్పష్టమైంది. ఈ సుదీర్ఘ యాత్ర – ఆలోచించుకోడానికి, ఏం జరుగుతుందో గ్రహించడానికి నాకు సమయాన్ని ఇచ్చింది.

ఇప్పుడు నమూనా స్పష్టమైనది. సమూరా ఒకదాని తర్వాత మరొకటిగా అధికారాల్ని సాధిస్తాడు. అతనికి మరణం లేదు, శాశ్వతంగా ఉంటాడు. అతని కేంద్రం – అరుణ భూములు – కానీ అవి అతని నియంత్రణలో లేవు. అయితే అతను ఏడు అద్భుత వస్తువులు పొందిన తరువాత మళ్ళీ ప్రయత్నిస్తాడు. అతను శాశ్వతమైనవాడు కాబట్టి అతనికి బోలెడు సమయం ఉంటుంది.

కానీ భూమిని, కుజ చంద్రగ్రహాలపై ఉన్న మానవ కాలనీలని ఎలా జయిస్తాడు?

గత సంఘటనలను బట్టి చూస్తే అతనికి – తాంత్రిక శక్తులున్న అనుచరులు అన్ని గ్రహాలలోను ఉన్నారు. వాళ్ళంతా అతనికి గుడ్డిగా విధేయులుగా ఉంటారు. వీళ్ళు ప్రతిచోటా… ప్రభుత్వంలోనూ, సైన్యంలోనూ, ఇమ్మిగ్రేషన్ వంటి ఉన్నత స్థానాల్లోనూ ఉన్నారు. సమయం వచ్చినప్పుడు, వారు తిరుగుబాటు చేసి, ఈ కాలనీలలో అధికారం కైవశం చేసుకోడానికి సమూరాకి సహాయం చేస్తారు. అతని ఆధ్వర్యంలో మాంత్రికుల ద్వారా ప్రభుత్వాలు, రక్షణ దళాలు, ఇంకా ఇతర అన్ని విభాగాలు అతని ఆధీనంలోకి వస్తాయి.

మూర్ఖంగా అనిపించవచ్చు, లాండిస్-2లో జరిగినది చిన్న ఘటనే కావచ్చు కానీ నిజంగా జరిగిన ఒక దృష్టాంతం.

ప్రకృతికీ, నాకు కలిపి ఒక బంకర్, డిమిట్రీ, ఏనిమోయిడ్‌కు మరో బంకర్ ఇచ్చారు.

మేమంతా స్పేస్‌షిప్‌లో తేలుతూ, మధ్యాహ్నం రాత్రి భోజన సమయంలో కలుసుకుంటున్నాం.

“ఘనత వహించిన మీ ఎర్త్ కౌన్సిల్ మాస్టర్స్ ఎక్కడున్నారు? వాళ్ళు మనల్ని కాపాడటం లేదు! మనల్ని ఈ పనికి నియమించిన గ్రహాంతర భద్రత అధికారులు; ఎర్త్ కౌన్సిల్ అధికారులు ఎక్కడున్నారు? వాళ్ళేమీ చేయలేరా? మనం వాళ్ళకి ఒక సంకేతం లేదా ఎస్.ఓ.ఎస్.ను పంపించలేమా?” అడిగింది డిమిట్రీ.

“మేడం! సందేశాలను పంపగలిగే నా సామర్థ్యం తీవ్రంగా దెబ్బతింది. బయటకు వెళ్ళే సందేశాలని వారు నిలిపివేస్తున్నారు. నేను నా మాస్టర్‌కి కూడా ఎలాంటి సందేశమూ పంపలేను అందుకే నేరుగా మాట్లాడుతున్నాను. భద్రత అధికారులు; ఎర్త్ కౌన్సిల్ అధికారులు మనమేం చేస్తున్నామో గమనిస్తున్నారు. అయితే మన మిషన్ మొదటి నుంచి రహస్యమైనదే కదా…” అంది యురేకస్.

“అవునా! అంటే ఏం జరిగినా వాళ్ళే గెలుస్తారన్న మాట! వారు మనల్ని కాపాడలేనప్పుడు మనకేం ప్రయోజనం? గనీమీడ్ మీద లేదా లాండిస్-2 పైన మనకి సహకరించడానికి ఏ గ్రహాంతర లేదా ఎర్త్ కౌన్సిల్ ఏజెంట్లు లేరు. మనంతట మనం విజయం సాధిస్తామో లేక మనంతట మనం మరణిస్తామో అని చూస్తారా?” కోపంగా అంది డిమిట్రీ.

“ఇద్దరు నిజంగానే మరణించారు” అన్నాను.

“ఇలా జరుగుతుందని నేను ఊహించలేదు. బ్లాక్‌మెయిల్, కుట్ర, రహస్యం, రాజకీయాలు… మనమేమో చదరంగం ఆటలో బంటుల్లా ఆడాం. ప్రభుత్వాలేమో – గత శతాబ్దాలలోని తీవ్రవాదుల వంటి ఈ మాంత్రికుల గురించి తమ పౌరులకేమీ తెలియకూడదనుకుంటాయి. వాళ్ళకి గుప్త, శక్తివంతులైన ప్రచ్ఛన్న అనుచరులు ఉంటారు.”

స్పేస్‌షిప్ గోడపై తగిలించిన టివి తెరలపై 24 గంటల ఛానల్లో వార్తలు చూశాము. అంతరిక్షంలో రాత్రి పగలు ఉండవు. ఆకలి, నిద్ర మరియు మెలకువని సూచించే జీవ గడియారం మాత్రమే ఉంటుంది. వార్తలు చూస్తూ మేమంతా ఒకరినొకరం విస్మయంగా చూసుకున్నాం.

గెలాక్టిక్ న్యూస్ క్యాప్సుల్‌లో – సౌరవ్యవస్థలోని వివిధ గ్రహాల మధ్య పరస్పర సహకారంతో ఆర్థిక వ్యవస్థ ఎలా వర్ధిల్లుతోందో చెప్పారు. మధ్యలో ఏదో మామూలు విషయాలన్నట్టుగా భూమి మీద జరిగిన ఓ దోపిడి గురించి, చంద్రునిపై విద్యుత్ తుఫానులు వంటి సాధారణ అంశాలను ప్రస్తావించారు. చంద్రుడి కక్ష్య లోనూ, గనీమీడ్‌లోను పవర్ స్టేషన్లు నాశనమవడం లేదా లాండిస్-2 యొక్క తేలియాడే కాలనీలో పేలుళ్లు, హత్యల గురించి చెప్పనేలేదు.

“దీనికంతటికీ కారణం నేనే. నేనసలు ఈ రహస్య ఆపరేషన్‌లో ప్రవేశించకుండా ఉండాల్సింది. ఎంపికైన వ్యక్తా… నా మొహం! ఇప్పుడు అంతరిక్షంలో మనల్ని బంధించిన వారి నుంచి ఎలా తప్పించుకోడం?” అన్నాను ఓడిపోయినట్లుగా.

మూడవ రోజున, లెత్వాల్ రూజ్ ప్రధాన కమాండ్ సెంటర్‌లో సమావేశానికి మమ్మల్ని పిలిచారు. అది విస్తృత వృత్తాకార ప్రాంతం. లోపల మానిటరింగ్ పానెల్స్, రాడార్ తెరలు ఉన్నాయి. గాజు అద్దాల గుండా ఆకాశం, నక్షత్రాలు కనిపిస్తున్నాయి.

టేబుల్ వద్ద తల మాకు కనిపించేలా వెనక్కి తిరిగి కూర్చుంది సయోని.

“హనీ!” అంటూ ఆమె గట్టిగా కేకపెట్టింది. “మనం ఈ ఆపరేషన్ చివరి రెండు దశలకి చేరుకున్నాము. మనం టైటాన్‌ని సమీపిస్తున్నాం. నా తండ్రి, చక్రవర్తి సమూరా నా ద్వారా ఆదేశాలు జారీ చేస్తాడు. నీకు మళ్ళీ చెప్పాల్సిన అవసరం లేదు, ఇప్పుడు మాకు కావలసిన దాన్ని గుర్తించు. అంతేకాకుండా, నువ్వు టైటాన్ స్థానికురాలైన డిమిట్రీని వెంట తీసుకువెళ్ళు. టైటాన్‌లో ఆమె తన తండ్రి, సోదరుడు ఉన్నారు, ఆమెకి సొంత ఇల్లు ఉంది. టైటాన్‌కి వెళ్ళడానికి మీకు వీసాలు, ఇతర పత్రాలను ఇస్తాము. ఈసారి మీరు పర్యాటకులవలె చట్టబద్ధంగా వెళ్ళవచ్చు. రెండు శనిగ్రహపు రోజులలోగా నువ్వా వస్తువుని తెచ్చివ్వాలి. పరుగులు తీయద్దు, అది నువ్వు తప్పించుకోవడానికి ప్రయత్నిస్తునడానికి అది సూచన. అయినా మా జాగ్రత్త కోసం ప్రకృతిని బందీగా ఉంచుకోవలాని నిశ్చయించాను” అంది.

“అయ్యో, వద్దు!” అన్నాను నేను అరుస్తూ.

అలా అరుస్తుంటే ఒకటో రెండో మెరుపులు నా కళ్ళ లోంచి బయటకు వచ్చాయి.

“నా భార్యను మీకు బందీగా ఇవ్వడం కంటే ఇక్కడే నేను మీతో పోరాడి చనిపోతాను. వద్దు! వద్దు! వద్దు! ఆమె నాతో రావాలి లేదా నేను అసలు వెళ్ళనే వెళ్ళను!” అన్నాను.

నిశ్శబ్దం.

సయోని నా నిజాయితీని అర్థం చేసుకున్నట్లుంది.

“అయితే ఏనిమాయిడ్‌ని ఉంచండి! నువ్వు తిరిగి వస్తావన్న నమ్మకం ఏమిటి?”

“వద్దు! ఏనిమాయిడ్ వద్దు. అతను మా నావిగేటర్. అతను విశ్వంలో ఏ వాహన్నానైనా నావిగేట్ చేయగలడు. అతను నా స్నేహితుడు. నేను అతనిని కోల్పోలేను. మీరు మమ్మల్ని నమ్మకతప్పదు లేదా మేము వెళ్లలేము” చెప్పాను.

“అవును! అవును! మేము మా మాస్టర్‌కి మద్దతు తెలుపుతున్నాం! బెదిరిస్తే మేము వెళ్ళం!” అంది ప్రకృతి.

డిమిట్రీ నవ్వింది. “అవును. మేము అంగీకరిస్తున్నాం. ఇకపై మీ దుష్టకార్యాలలో మీకు సాయపడం. మమ్మల్ని మా ఇళ్ళకి పంపేయండి” అంది.

దెయ్యంలా నవ్వింది సయోని. ఆమె పక్కన ఉన్న పొడవాటి అస్థిపంజరాల్లాంటి ఆల్ఫా సెంటారి తాంత్రికులు కూడా విచిత్రంగా, ఎగతాళిగా నవ్వారు.

స్పేస్‌షిప్ గోడపై మాకు ఎదురుగా ఉన్న తెర ఒక్కసారిగా జీవం పోసుకుంది. తెర మీద మొదట చెదురుముదురుగా ఉన్న చిత్రం క్రమంగా స్పష్టంగా కనిపించసాగింది. అందులోని వ్యక్తుల ఆకారాలు, నేపథ్యం రూఢిగా తెలుస్తున్నాయి.

“అయ్యో! వద్దు!” అరిచింది డిమిట్రీ భయంతో.

గడ్డంతో, ముడతలు పడిన ముఖంతో ఉన్న పొసయిడన్‌ని తెరపై చూసి గుర్తించగలిగాను. ఇనుప గొలుసులతో కట్టుబడి, తీవ్రమైన నొప్పితో చాలా బాధ పడుతున్నాడు. అతని పక్కన గిరజాల జుట్టు, తలపై యాంటెన్నాలతో ఎరుపు రంగులో ఉన్న ఒక పొడవాటి యువకుడు ఉన్నాడు. కానీ అతని కళ్ళు మూసుకుని ఉన్నాయి. అతను డిమిట్రీ యొక్క అంధ సోదరుడు జూలియస్ అని పోల్చుకున్నాను.

అస్థిపంజరాల్లా ఉన్న గడ్డం వ్యక్తులిద్దరు చేతులలో మెరుస్తున్న కత్తులతో ప్రత్యక్షమయ్యారు. కత్తులని పొసయిడన్‌, జూలియస్‌ల మెడలపై ఉంచగానే, అవి ఎరుపు రంగు లేజర్‌లా మారాయి.

ఆపుకోలేని వికటాట్టహాసాల మధ్య, దెయ్యంలా భీకరంగా ఉన్న సయోని అడిగింది “ఇప్పుడేమంటారు? వెళ్తామంటరా? వెళ్ళం అంటారా?”

ఈ మంత్రగత్తె మరణాన్ని ఎంతలా కోరుకున్నాను? చనిపోయినా మళ్ళీ బ్రతికి వచ్చింది. పునర్జన్మ పొందిన ఈ దుష్టురాలిని ఎలా నాశనం చేయాలి?

దిగ్భ్రాంతికి గురై ఒక నిమిషం నిశ్శబ్దంగా ఉన్న తరువాత, “సరే అను హనీ! నాకీ ప్రపంచంలో ఉన్నది వాళ్ళిద్దరే. వాళ్ళని నేనెంతగానో ప్రేమిస్తాను!” అంది డిమిట్రీ.

చేసేదేం లేక “సరే” అన్నాను. ఓ కొత్త గ్రహానికి మరొక యాత్రకి అంగీకరించాను. టైటాన్ నిజానికి శనిగ్రహానికి ఉపగ్రహం. టైటాన్‌లో మానవులుండే భూగర్భ కాలనీ ఇప్పుడు మా గమ్యం.

అధ్యాయం 38: టైటాన్ మానవ భూగర్భ కాలనీ

టైటాన్ శనిగ్రహపు మూడవ అతి పెద్ద ఉపగ్రహం. 20వ శతాబ్దం నుండి మానవులు టైటాన్‌కి వలసరావడం గురించి కలలుగన్నారు. ఇక్కడ భూగర్భ జలాలు ఉన్నాయి, వాతావరణంలో కార్బన్ డయాక్సైడ్, మీథేన్ పుష్కలంగా ఉన్నాయి. వీటి నుండి ఆక్సీజన్‌ని తయారు చేయవచ్చని, భూగర్భ కాలనీలు నిర్మించవచ్చని భావించారు. కానీ సమస్యల్లా వాతావరణంలో హైడ్రోజన్ క్లోరైడ్ అధికంగా ఉండడమే. ఇది మానవులకు హానికరం.

శనిగ్రహం చుట్టూ అంతరిక్ష వేదిక నిర్మించబడింది, 21వ శతాబ్దంలో అప్పటి స్పేస్ ప్రోబ్ స్టేషన్ పేరిట “క్యాసిని” అని పేరు పెట్టబడింది. సాంకేతికత అభివృద్ధి చెందడంతో మానవ బృందాలు తరలివచ్చాయి, అంతరిక్ష వేదికపై నివసించాయి. తర్వాత ఉపగ్రహాలైన టైటాన్‌, ఎన్‌సెలాడస్ లలో భూగర్భ కాలనీలు నిర్మించుకున్నారు. ఆక్సీజన్‌ని తయారుచేసుకునేందుకు భారీ రసాయన కర్మాగారాలు, భారీ సౌర విద్యుత్ గ్రిడ్లను నిర్మించుకుని నీటిని, ప్రాణవాయువుని సరఫరా చేయటం ద్వారా భూగర్భంలోని కాలనీలను తయారు చేశారు. ఇది ఐదు వందల సంవత్సరాల క్రితం జరిగింది. గనుల తవ్వకం ద్వారా విలువైన లోహాలు, హైడ్రోకార్బన్లు, ఖనిజాలను విక్రయించడం ఆదాయ మార్గం.

కాలంతో పాటు శనిఉపగ్రహాలమీద నాగరికతలు ఏర్పడ్డాయి, నశించాయి. ప్రజాస్వామ్య ప్రభుత్వాలు, రాజ్యాలు ఏర్పడ్డాయి. విలక్షణ జాతుల జీవులు అక్కడ నివసిస్తున్నారు. సాధారణ మానవులు, తలమీద యాంటెన్నాలతో ఉండే యంత్రమానవులు, విశ్వశక్తిని వినియోగించగల మానవులు అక్కడ నివసించారు. అయితే మంత్రగాళ్ళుగా ముద్రపడిన వ్యక్తుల పట్ల చులకనగా వ్యవహరించారు, సాధారణంగా పాలకవర్గంతోనూ, సమాజంతోనూ వేధింపబడినవారు. డిమిట్రీ, ఆమె తండ్రి పొసయిడన్, సోదరుడు జూలియస్ అటువంటి వేధింపులకు గురైన మాంత్రికుల తరగతికి చెందినవారు. తుఫానులు, మెరుపులు, ఉరుములను సృష్టించగల పొసయిడన్ శక్తుల గురించి నాకు తెలుసు. కుజుడి మీద మేము  జనరల్ గ్యానీ అంగారాక్ దళాల నుండి తప్పించుకుంటున్నప్పుడు అతని శక్తులని స్వయంగా చూశాను.

ఈ వివరాలన్నీ ఇప్పుడు నేను యురేకస్ యొక్క హార్డ్‌డిస్క్‌లో ఐజి నెట్ వేగవంతమైన బ్రౌజింగ్ ద్వారా తెలుసుకున్నాను. సౌర వ్యవస్థ, విశ్వం ఎంత విస్తారమైనవంటే గ్రహాలు, ఉపగ్రహాలపై కాలనీల చరిత్ర గురించి ఎవరికీ తెలియదు. ఈ సమాచారం అపారమైనది, అనంతమైనది. నేను నా మిషన్ కోసం అవసరమైన మేరకే తెలుసుకున్నాను.

శనిగ్రహపు క్యాసిని స్పేస్ ప్లాట్‌ఫాంపైన దిగాం. ఇది లా టెర్ స్పేస్ ప్లాట్‌ఫాం కన్నా చాలా పెద్దది. శని ఉపగ్రహ కాలనీలకు వెళ్ళే వ్యోమనౌకలు ఇక్కడ ఆగుతాయి. ఇతర సౌర వ్యవస్థలకు; సుదూర నక్షత్రాంతర కాలనీలకు ప్రయాణం యొక్క హైపర్ స్పేస్ రవాణా వ్యవస్థల వాహనాలకు ఇమ్మిగ్రేషన్ చెక్‌లకు ఉపయోగించబడుతుంది.

తలనీ, మెదడునీ వ్యత్యయంగా అమర్చినా పునర్జీవితం గడుపుతున్న సయోని ప్రతిదీ బాగా ఆలోచించింది. అయానిక్ అవతారానికి శరీరధర్మ శాస్త్రంతో పట్టింపు లేదేమోనని అనుకున్నాను.

నకిలీవైనా చెల్లుబాటయ్యే వీసా పత్రాలు, ఐడిలు, యూనివర్సల్ డిజిటల్ యూనిట్లలో నగదు అందజేసింది.

“డిమిట్రీ, ఇది నీ స్వస్థలం. నువ్వు హనీకి మార్గనిర్దేశం చెయ్యి! నీ తండ్రి, అంధుడైన సోదరుడంటే నీకెంతో ఇష్టమని నాకు తెలుసు. నేను నిన్ను ప్రతిసారీ బెదిరించడం అవసరం లేదు. ఇప్పుడు హనీని చూడు, అతను మాతో ఇష్టపూర్వకంగానే సహకరిస్తాడు… “

ఆమె వాక్యాన్ని పూర్తి చేయలేదు. ఆమె ఉద్దేశమేంటే నాకు తెలుసు. నాకు కోపంగా ఉంది. “సమయం వచ్చినప్పుడు నేను మిమ్మల్నిద్దరినీ చంపుతాను. నేను నిన్ను మళ్ళీ అయాన్లుగా మార్చి కరిగించేస్తాను” నాలో నేను అనుకున్నాను.

ఇక, ఒక చిన్న డిసెంట్ వెహికల్‌లో మేము క్యాసిని స్పేస్ ప్లాట్‌ఫాం మీద దిగాం, ఇమ్మిగ్రేషన్ చెక్ సజావుగా సాగిపోయింది.

టైటాన్ యొక్క స్పేస్ డ్రోంకు వెళ్ళేందుకు స్పేస్ షటిల్ కోసం మేము ఎదురుచూస్తున్నప్పుడు, డిమిట్రీ అకస్మాత్తుగా ఏడవసాగింది.

“హనీ! మా తండ్రీ, సోదరుడి గురించి నాకు భయంగా ఉంది. వాళ్ళు అడిగిన పనులు చేయలేదని నాన్నని వాళ్ళు జైల్లో పెట్టారు. చాలాకాలం క్రితం మెరుపులను ప్రయోగించి నా సోదరుణ్ణి అంధుడిని చేసి శిక్షించారు. వాళ్ళు చెడ్డవాళ్ళు” అంది.

“అసలేం జరిగింది?”

“అదో పెద్ద కథ. సమూరా ఏజెంట్లు ఎన్‌సెలాడస్‌లో రాజుని చంపడానికి ఒక మెరుపు తుఫానును సృష్టించమని నాన్నని అడిగారు, కానీ నాన్న ఒప్పుకోలేదు. వాళ్ళు నాన్న కలల్లోకి, తన టివిలోకి, కంప్యూటర్ మానిటర్‍లోకి వచ్చి బెదిరించారు, వ్యక్తిగతంగా వచ్చి గట్టిగా కోరారు. అయినా నాన్న నిరాకరించాడు. ఇది యాభై సంవత్సరాల క్రితం సంగతి. కాబట్టి వాళ్ళు గత్యంతరం లేక తుఫాను సృష్టించడానికి మరొక మాంత్రికుడిని ఎన్‌సెలాడస్‌‌కి పంపారు. అప్పటికి చిన్న కొడుకు ఉన్న మా నాన్న పొసయిడన్‌పై మెరుపులతో దాడి చేశారు. హానికారక కిరణాలనుంచి రక్షణ కల్పించే కవచాలతో నాన్న తనని తాను కాపాడుకున్నాడు; కానీ రెండేళ్ళ వయస్సు ఉన్న జూలియస్ అంధుడయ్యాడు. అప్పుడు నేను రాజధానిలో చదువుకుంటున్నాను. మాకు చిన్నప్పటి నుంచి అమ్మ లేదు, మమ్మల్ని మా నాన్నే పెంచాడు” చెప్పుకొచ్చింది డిమిట్రీ.

చెప్పేందుకు ప్రతిఒక్కరికి ఒక కథ ఉంది, అది కూడా వ్యథాభరితమైనది.

లా టెర్ లానే క్యాసిని కూడా ప్రయాణీకులతో రద్దీగా ఉంది. నేను మార్షియన్ మనుషులను, భూమికి చెందిన మానవులను, యజమానులతో ఉన్న రోబోలను గుర్తించాను, కొంతమంది గ్రహాంతరవాసులన్నా, వారు ఎక్కడ నుండి వచ్చారో గ్రహించలేకపోయాను. చాలామంది డిమిట్రీ లానే తలపై యాంటెన్నాలు, వలల్లాంటి కాలి వేళ్ళు, కోసు చెవులతో ఉన్నారు. బహుశా వాళ్ళు టైటాన్‌కి చెందినవారై ఉంటారు.

ప్రయాణం సజావుగా సాగింది.  టైటాన్ యొక్క స్పేస్‌పోర్టు నుండి బయటకు వచ్చాము, అధికారులు అందజేసిన ప్రెజర్ స్యూట్లు, ఆక్సీజన్ మాస్క్‌లు ధరించి బయటకు నడిచాం. సాధారణ పీడనం, ఆక్సీజనేడ్ వాతావరణం ఉన్న భూగర్భ కాలనీకి చేరుకునేంత వరకూ ఇవి మమ్మల్ని సురక్షితంగా ఉంచుతాయి.

టైటాన్ యొక్క భూభాగం కనబడుతోంది. ఆ వాతావరణంలో ఇప్పటికీ విషపూరితమయిన హైడ్రోజన్ క్లోరైడ్ ఉంది. టైటాన్‌లో కొండలు, శిలలు, లోయలు, బండరాళ్లు ఉన్నాయి. టైటాన్‌కున్న గొప్ప ప్రయోజనం ఏంటంటే అక్కడి మంచు నుంచి ఏర్పడిన భూగర్భ జలాలు.

అక్కడఉపరితలంపై భారీ టెర్రాఫార్మింగ్ ప్లాంట్లను, రసాయన రియాక్టర్లు నిర్మించారు. విశాలమైన, భారీ విద్యుత్ గ్రిడ్లని సౌరశక్తి నుండి విద్యుచ్ఛక్తిని ఉత్పత్తి చేయడం కోసం లక్షలాది చిన్న సౌర ఫలకలను అమర్చారు. అవి పగటి వెలుగులో ప్రకాశిస్తున్నాయి.

కుజుడిపై నేనొక్కడినే ఒక రోవర్‌లో ప్రయాణించినట్లుగా కాకుండా, మేము ఒక చిన్న రోవర్ క్రాఫ్ట్‌లో ప్రయాణిస్తున్నాము. స్పేస్‌డ్రోమ్ వద్ద అద్దెకు తీసుకున్న ఒక రోవర్లోనే అందరం ప్రయాణిస్తున్నాం. ఈ స్పేస్‌డ్రోం మొత్తం – టైటాన్ ఉపరితలం

 మీద వ్యోమనౌకలు దిగేందుకు వీలుగా పొడవాటి రన్‌వేలతో, ఇంటర్నల్ ఆక్సిజన్, సాధారణ గురుత్వాకర్షణ వంటి సౌకర్యాలతో నిర్మించబడింది.

రోవర్ క్రాఫ్ట్ టైటాన్ఉపరితలంపై ప్రయాణిస్తుండగా, జరిగినదంతా ఒకసారి జ్ఞాపకం చేసుకున్నాను. ఒక ప్రకాశవంతమైన ప్రకృతి దృశ్యం, కానీ ఎక్కడో చీకటి జీవులు ఉన్నారనిపిస్తోంది. వాస్తవానికి కుజుడి అరుణభూములు వారి ప్రధాన కేంద్రం. కానీ ప్రతిచోటా వాళ్ళకి రహస్య ఎజెంట్లు, స్లీపర్ సెల్స్ ఉన్నారు. ప్రతి కాలనీలోనూ ప్రతి కేంద్రంలోనూ సమూరాకు సహాయపడే రహస్య కేంద్రం ఉంది. ఎర్త్ కౌన్సిల్, విజర్డ్ మానిటరింగ్ సెల్స్, ఇంటర్ గెలాక్టిక్ పోలీస్‌లకు ఏమైంది?

ఇమ్మిగ్రేషన్ వద్ద మమ్మల్ని తనిఖీ చేసినప్పుడు వాళ్ళు – మేం విశ్వశక్తిని కలిగి ఉన్నామో లేదో నిర్ధారించుకోడానికి మా చుట్టూ ‘కాంతివలయం’ యొక్క ప్రసరణం కోసం వెతికారు. మేము మా శరీరాన్ని నిశ్చలంగా ఉంచి, ఆలోచనలను తటస్థంగా చేశాము. మా అందరికీ మా గ్రహాలలో ఇచ్చిన ధ్రువపత్రాలోనూ, పాస్‌పోర్టులలోనూ మేం విశ్వశక్తి సాధకులమని ప్రస్తావించారు. కాని ఇక్కడ మాలాంటి వారి రాకపోకలపై ఎలాంటి నిషేధమూ లేదు.

డిమిట్రీ టైటాన్ పౌరురాలు. నేను, ఏనిమోయిడ్ తక్కువ స్థాయి విశ్వశక్తిని కలిగి ఉన్నాం, కానీ మానిటరింగ్ సెల్ వాళ్ళు మమ్మల్ని అనుమతించారు. అయితే, వీళ్ళు లెత్వాల్ రూజ్‌లోని సయోని బృందంచే మోసగింపబడ్డారు.

మేము భూగర్భ ఆవాసాలకు దారితీసే మెట్లతో ఉన్న విశాలమైన ప్రాంతాన్ని చేరినప్పుడు.. ఒక బోర్డ్ మీద ఇలా రాసి ఉంది.

“టైటాన్ రాజధాని నగరం మంద గేట్ 1 కు స్వాగతం”

‘మంద’ అంటే సంస్కృతంలో శనికి మరో పేరు.

మేము వాహనం దిగాం. డిమిట్రీ మాకు మార్గనిర్దేశం చేస్తుండగా మెట్లు దిగి కిందకి నడిచాం.

“ఆహా, అద్భుతమైన కాలనీ! ఇప్పుడు మీ గ్రావిటీ స్యూట్‌లను తీసేయచ్చు. ఇక్కడ సాధారణ పీడనం, ఆక్సిజన్ ఉన్నాయి” చెప్పింది యురేకస్.

***

నాల్గవ సహస్రాబ్ది యొక్క గ్రహ కాలనీలు విపరీతమైన సాంకేతికతకు నిదర్శనాలు. సైన్స్, మెటలర్జీ, స్పేస్ సైన్స్, బయాలజీ, ఇంజనీరింగ్, ఐడియాలజీ పురోగతికి ఉదాహరణ. ఇతర సందర్శకులతోపాటు సుమారు అర కిలోమీటరు దూరం మెట్లు దిగాకా, టైటాన్ రాజధాని నగరంలోని విశాలమైన ప్రాంతాన్ని మేము చూడగలిగాము. పొడవాటి ఇరుకైన వీధులకి ఇరువైపులా చతురస్రాకారాల ఆకారంలో ఉండే ఇళ్ళు ఉన్న ఒక టౌన్‌షిప్ ఇది. మేము ఇప్పుడు మళ్ళీ రోవర్ క్రాఫ్ట్ ఎక్కాల్సి వచ్చింది. అయితే ఇది ఓపెన్ నమూనాది. వాహనం డ్రైవర్ మా గ్రావిటీ సూట్లు, ఆక్సీజన్ మాస్కులు తీసేయమని అభ్యర్థించాడు. ఈ రోవర్ ఆరు చక్రాలతో పెద్దగా ఉంది, బహుశా సౌరశక్తిపై పనిచేసే మోటార్‌ని కలిగి వున్నట్లుంది. ఇది నేలపైన కదిలే రోవర్‌క్రాఫ్ట్ వలె లేదు.

“ఇది రాజధాని నగరం. మేము 10,000 మంది పౌరులం, రాజభవనంలో నివసిస్తున్న రాజు ఉంటాం ఇక్కడ. ఈ రాజధాని నగరం చుట్టుపక్కల, వివిధ పేర్లతో పిలువబడే అనేక చిన్న కాలనీలు ఉన్నాయి, వాటి గుర్తింపు కోసం డిజిటల్ సంఖ్యలు కూడా ఉన్నాయి. టైటాన్‌లో దాదాపు 20,000 మంది నివసిస్తున్నారు. అయితే మేం మాత్రం జనాలకి బాగా దూరంగా ఉండే చోట జీవిస్తున్నాము. మాంత్రిక శక్తులున్న మాది ఒక ప్రత్యేక తెగ. మేము నీరు ఉన్న చోట ఉంటాం. సముద్ర తీరంలో భూగర్భంలో మేము పెద్ద ఇల్లు నిర్మించాము. మా ఇంటిలో చెట్లున్నాయన్నా, మా తోటలో పువ్వులు పూస్తాయాన్నా మీరు నమ్మడం కష్టం. టైటాన్ భూగర్భ సముద్ర జలాలు – నీటికి, ఇతర ఆర్గానిక్స్‌కి విస్తృత వనరులు. ‘మెర్ నోర్డ్’ తీరంలో మా నాన్న తుఫానులను సృష్టించడాన్ని సాధన చేసేవాడు.” అని చెబుతూ డిమిట్రీ ఒక్కసారిగా మౌనం వహించింది. ఆమెకి దుఃఖం ముంచుకొచ్చింది. వెక్కిళ్ళు పెడుతూ, “మా ఇంటి చుట్టూ విద్యుచ్ఛక్తితో ఉన్న రక్షణాత్మక కంచె అమర్చారు. మా నాన్నని తన స్వంత ఇంట్లోనే ఎలా బందీగా చేశారో నాకు అర్థం కావడం లేదు” అంది.

“ప్రస్తుతం మనం హోటల్‌కి వెళ్దాం” అన్నాను. “ఏం చేయాలో అక్కడ నిర్ణయిద్దాం. వాళ్ళని వదలం!” చెప్పాను.

‘హోటల్ ప్లాజా టైటానిక్’ వీధి చివరలోనే కనబడింది. ఇది ఒక ప్రకాశవంతమైన సైన్ బోర్డు కలిగి ఉంది.

సాధారణ తంతులన్నీ ముగించి, మేం హోటల్లోకి ప్రవేశించాం.

ఏనిమాయిడ్, డిమిట్రీ తమ తమ గదులకి వెళ్తుండగా “భోజన సమయంలో కలుద్దాం” అన్నాను.

***

“రెండు విషయాలు నా మనసులో ఉన్నాయి” అన్నాను, భోజనంలో రుచికరమైన ‘ప్వాసాన్తీసుకుంటూ. “ప్వాసాన్ఫ్రీత్.”

అంటే ‘కాల్చిన చేప’ అని అర్థం.

డిమిట్రీ తండ్రి పొసయిడన్‌ను, ఆమె అంధ సోదరుడు జూలియస్‌ని రక్షించడం మొదటి కర్తవ్యం. రెండవది ఆ అద్భుత ‘వస్తువు’ ఎక్కడుందో తెలుసుకోవడం. సయోని గానీ, సమూరా గానీ అదేం వస్తువో, ఎక్కడ దాచిపెట్టారో తెలుసుకునేందుకు ఎటువంటి ఆధారాలు ఇవ్వలేదు.

కాకపోతే ఇప్పుడు నాకు పద్ధతి తెలుసు. అదొక మెరిసే వస్తువుగా ఉంటుంది. నాకూ లేదా సమూరా వంటి నిపుణులైన మాంత్రికులకి మాత్రమే కనిపిస్తుందది. దానితో పాటు దాని ఉపయోగాన్ని కొన్ని పరిస్థితులకు పరిమితం చేసే ఒక భవిష్యవాణి ఎల్లప్పుడూ ఉంటుంది. ఎన్‌సైక్లోపీడియా గెలాక్టికాలో చెప్పినది నిజమే అయితే, ఇక రెండు వస్తువులు మాత్రమే ఉన్నాయి – ఇక్కడ టైటాన్‌లో ఒకటి, ఇంకెక్కడో మరొకటి. అది బుధగ్రహంలో ఉండదు, ఎందుకంటే అది సూర్యునికి చాలా దగ్గరగా ఉంటుంది, చాలా వేడిగా ఉంటుంది, పైగా దానికి ఉపగ్రహాలు లేవు. ఒక్కో గ్రహంలో ఒక్కో వస్తువుని దాచారని అనుకున్నా… చివరి అద్భుత వస్తువు శనిగ్రహం లేదా ఉపగ్రహాలలో ఉండాలి. శనిగ్రహం కూడా ఆవాసయోగ్యం కాదు.

టైటాన్‌లో ఒక అద్భుత వస్తువుని దాచగల అవకాశం ఉంది కాబట్టి నన్నిక్కడికి పంపారు. ఆ మరో అద్భుత వస్తువు ఎన్‌సెలాడస్ మీద లేదా శని యొక్క మరో ఉపగ్ర్రహం మీద ఉండి ఉండవచ్చు.

నేను వాటి కోసం ప్రయత్నించనా? ఈ వస్తువులని సాధించి భూమికి లేదా చంద్రుడికి మీదకి పారిపోయి వాటిని ఎర్త్ కౌన్సిల్‌కి లేదా అమృతా కాలనీకి అప్పగించనా? కానీ ఎలా? నేను క్యాస్సిని ప్లాట్‌ఫాం వద్ద సుదూర ప్రయాణాలు చేయగల అంతరిక్ష నౌకని హైజాక్ చేసి, దానిని భూమికి మళ్ళించమని ఒత్తిడి చేస్తాను. నేను నా శక్తులను ఉపయోగించాలి.

ఇది సాధ్యం కావచ్చు. ఏమైనా నేను ఇలా ఎంతో కాలం వేచి ఉండలేను. నా ప్రయత్నాలు విఫలమైతే నేను చనిపోతాను, ప్రకృతినీ చంపేస్తారు. ఖచ్చితంగా చంపేస్తారు. పొసయిడన్‌ని రక్షించి, ఆ అద్భుత వస్తువుని అన్వేషించాలి.

నేను నిద్రపోయాను. ఆ రహస్యమైన అద్భుత వస్తువు ఎక్కడుందో తెలిపే కల వస్తే బాగుండు! కలలు నా జీవితాన్ని మార్చాయి. స్వప్నాలు నా దిశను మార్చాయి. ఇదంతా ఒక అందమైన అమ్మాయి, మార్షియన్ యువరాణి నా కలలోకి రావడంతో ప్రారంభమైంది. కానీ అది నా దిశగా మార్చింది, నాలో దాగి ఉన్న సామర్థ్యాన్ని వెలికితీసి ఎన్నో సూదూర ప్రాంతాలకు నన్ను నడిపించింది.

మాంత్రికులకి ఉండే అతీంద్రియ శక్తులలో దూరదృష్టి, దూరశ్రవణం కూడా భాగమే.

అయితే వాటిని నియంత్రించగలిగితే, సమయానుకూల ప్రయోజనాలు పొందవచ్చు.

సంక్షోభం సమయంలో నేను నా తల్లిదండ్రులను, ఆమ్రపాలి కొండమీద ఉండే భైరవుడిని ప్రార్థిస్తాను.

కానీ ఇప్పుడు అది ఏ ఫలితాలను ఇవ్వలేదు.

నేను ప్లాజా టైటానిక్ హోటల్ యొక్క చల్లని గదిలో పడుకుని, నా మెదడుని ఆదేశించాను.

“చూడు, వెతుకు, ఆ అద్భుత వస్తువును గుర్తించు! అది టైటాన్‍‌లో ఎక్కడ దాచబడి ఉందో నాకు చెప్పు. నేను ఎంపికైన వ్యక్తిని!”

అయితే నేను కోరుకున్నప్పుడు మాత్రం శక్తులు అరుదుగా పని చేస్తాయి. నేను నిజమైన సంక్షోభంలో పడినప్పుడు మాత్రమే నాకా శక్తులు ఉపయోగపడ్డాయని ఊహిస్తున్నాను.

ఇప్పుడు ఇది సంక్షోభం. టైటాన్ వంటి పెద్ద ఉపగ్రహంలో ఏ లక్షణాలు తెలియని ఒక వస్తువుని శోధించడం ఎలా?

నేను దృష్టి కేంద్రీకరించి ధ్యానం చేస్తూ నిద్రలోకి జారుకున్నాను. అయితే అది కలత నిద్ర.

నా కళ్ళ ముందు అనేక చిత్రాలు కదలాడుతున్నాయి. రాతి భూభాగం, కొండలు, ఎండిన భూమి, భూగర్భ వీధులు సుడులు తిరుగుతూ పైకొచ్చి ప్రధాన భూభాగంలో కలవడం కనబడుతోంది, తరంగాల హోరు వినిపిస్తోంది, అక్కడ నీలి ఆకాశం తెల్లటి మెరిసే తరంగాలను తాకుతోందా అన్నట్టుంది. ఆకాశంలో మెరుపులు!

అప్పుడు కనబడ్డారు సముద్ర రాక్షసులు. నలుగురున్నారు. పొడుగ్గా, శరీరమంతా బొచ్చుతో వికారమైన రూపం వాళ్లది. ముళ్ళ కొరడాని ఆయుధాలుగా పట్టుకున్నారు, వాళ్ళ కళ్ళల్లోంచి నిప్పురవ్వలు వెలువడుతున్నాయి.

నాకు పరిచితమైన పొడవాటి, బలిష్టుడైన నిడుపాటి గడ్డం కలిగిన ఓ ముసలాయన చుట్టూ వాళ్ళు నిలబడి ఉన్నారు. తుఫానుల దేవుడి పేరుపెట్టుకున్న ఆయనే పొసయిడన్. తుపానులను సృష్టించగల సామర్థ్యం ఉన్న ఆయన డిమిట్రీ యొక్క తండ్రి. ఆయన పక్కన ఓ పదహారేళ్ళ కుర్రవాడు చెదిరిన గిరజాల జుట్టుతో ఉన్నాడు. ఆ అబ్బాయి నిలబడి ఉన్నాడు, పరిసరాలను చూడలేని అంధుడతను. ఆ అబ్బాయి డిమిట్రి యొక్క సోదరుడైన జూలియస్. ఇద్దరినీ భారీ ఇనుప గొలుసులతో కట్టేసి ఉంచారు. సముద్ర రాక్షసులు వారిద్దరి చుట్టూ తిరుగుతూ తమ ఆయుధాలతో వారిని బెదిరిస్తున్నారు.

అది పెద్ద కోట వంటి ఇల్లు. గోడలపై వివిధ చిత్రాలు ఉన్నాయి, ముఖ్యంగా నేను గుర్తించలేని వస్తువుల చిత్రాలు. అధివాస్తవిక కాలంలా బొమ్మలు ఒకసారి స్పష్టంగానూ, మరోసారి మసకగానూ కనబడుతున్నాయి.

నా మెదడు ఏకాగ్రమైంది, శోధనపై కేంద్రీకృతమైంది, నేను పొసయిడన్‌తో మాట్లాడుతున్నానని భావించాను.

“హనీ, హనీ! నిన్ను మళ్ళీ చూసినందుకు సంతోషంగా ఉంది! కుజగ్రహం మీద ఆనాటి పలాయనం తరువాత మళ్ళీ ఇదే చూడడం!”

“హాయ్! పొసయిడన్! కానీ నిన్నిలా చూడడం బాలేదు. వాళ్ళు సమూరా అనుచరులని నాకు తెలుసు. నువ్వు వాళ్ళపై దాడి చేయలేవా?”

“హా! హా! నేను వేచి ఉన్నాను. రండి. వచ్చి నాకు సహాయం చెయ్యండి. నేను వాళ్ళని చంపడానికి మీ కోసం ఎదురు చూస్తున్నాను. కానీ అది ముఖ్యం కాదు. నేను ‘డూప్లికేటర్’ను కాపాడాలి!”

“డూప్లికేటర్… డూప్లికేటర్! సయోని కోరుకునేది ఇదేనా? అది ఏమి చేస్తుంది?”

జవాబు చెప్పడానికి పొసయిడన్ నోరు తెరిచాడు. కానీ సముద్ర రాక్షసులు అతన్ని కొడుతుంటే నొప్పితో బాధపడ్డాడు.

“రా” అతను అరిచాడు. “నీ మెదడును అనుసరించు, అదే నీ జిపిఎస్. డిమిట్రీకి చెప్పు అది ‘మెర్…’ … “

అప్పుడు అక్కడంతా చీకటయ్యింది. నా శరీరం మునిగిపోయేంత చల్లటి చెమటతో నేను మేల్కొన్నాను.

నేను ఇప్పుడు నా సహజ జ్ఞానాన్నే అనుసరించాల్సి ఉంది. నా మెదడే ఒక గ్లోబల్ పొజిషనింగ్ సిస్టం.

(సశేషం)