[శ్రీ పెద్దాడ సత్యప్రసాద్ రచించిన ‘చీకటి చూపును నేను’ అనే కవితని పాఠకులకి అందిస్తున్నాము.]
[dropcap]కా[/dropcap]లం కర్కశ పద ఘట్టనల మధ్య
నలిగిన మాపును నేను
రేపటి తీపిని తెంపుకుని
చెరిగిపోయిన రూపును నేను
గంటలు.. ఘడియలు.. రోజులు నెత్తినబడి
పాతాళ కుహరాలలోకి జారుకున్న మార్పు నేను
ఆశ అనే అవకాశాన్ని లేకుండా
చేసుకున్న చీకటి చూపును నేను
నేటిని నిన్నటి కన్నీటిలో కలిపేసుకుని
వలపుకే వగరైన వెరపును నేను
నా ఉనికి అజ్ఞాతవాసం
నా బతుకు నిశీధితో సహవాసం
అంధకార బంధురం నా జీవితం
ఏ కాలానికీ అందని విచిత్ర వైనం
