[dropcap]అ[/dropcap]నంతమైన కేన్వాసు మీద చిత్రకారుని ఆగిపోని కుంచె…
కనువిందు కలిగిస్తూ క్షణ క్షణం మారుతున్న దృశ్యాలు.
ప్రకృతి అందాలకు నిలయమై స్పందించే మనసుకు ఉల్లాసమై…
దివినుండి భూలోకానికి దిగి వచ్చిన సుందర స్వప్నం.
పచ్చని కొండల మీదుగా పయనించే తెల్లని మబ్బులు….
ఒయ్యారాల మలుపులతో మిడిసిపడే నదీ ప్రవాహాలు.
పడవలలో విహరించే యాత్రీకులు….
పరవశించిపోతారు తరంగాల గల గలలు వింటూ.
మబ్బులతో పోటీ పడుతూ విహరించే నంగనాచి విహంగాలు ….
అదునుచూసి చేపలను వేటాడుతాయి.
దేశాలకు సరిహద్దులు లేవంటూ స్నేహ హస్తం ఇస్తుంది….
అనంతమైన రవాణా రైలు బండి కూతపెట్టి పరుగులు తీస్తూ.
నది ఒడ్డున నా ఇంటినుంచి ప్రతిరోజూ కనిపించే ఈ దృశ్యాలు….
నా కవితలకు స్ఫూర్తిదాయకాలు భవితకు సోపానాలు.
మనసు పాట పాడునని కనులు మాటలాడునని ఎవరో అన్నారు …..
అది నిజమేనని ఇప్పుడు ఈ అనుభవం చెపుతోంది.
ఏనాడూ అనుకోలేదు నాకు ఇలాంటి అవకాశం వస్తుందని…..
అలాంటి అవకాశం ఇచ్చిన నా బంగారు తల్లికి ప్రేమతో.
ఇది సుందర దృశ్య కవిత. వాషింగ్టన్ స్టేట్ నుండి.
