[డాక్టర్ చక్రపాణి యిమ్మిడిశెట్టి రచించిన ‘హృదయాన్ని మీటిన రాగాలు’ అనే కవితని అందిస్తున్నాము.]
[dropcap]మ[/dropcap]నసుతోటలో విరబూసిన పూలు
వెదజల్లే పరిమళాలకు అవధి లేదు
ఎంత దూరాలవరకైనా పయనిస్తాయి
ఎంతకాలమైనా తాజాగా ఉంటాయి
హృదయాన్ని తాకే అనుభూతులు
పంచిన పరిమళాలకు కొదవ లేదు
గాఢంగా అద్దుకొని గుబాళిస్తాయి
జీవితమంతా మనతోనే పయనిస్తాయి
ఎదమీటిన స్నేహ బంధాలు ఆత్మీయతలు
అందించిన పరిమళాలకు అంతేలేదు
ఎన్నటికీ వీడని సుగంధ వీవెనలౌతాయి
తీయని జ్ఞాపకాలుగా మిగిలుంటాయి
మదిని కలవరపరిచే ముదిమి తలపులు
ఆధ్యాత్మిక పరిమళాలను స్వాగతిస్తాయి
వేదాంత భావనావీచికలు ఆఘ్రాణిస్తాయి
శేషజీవితం ప్రశాంతంగా గడవనిస్తాయి
గుండెగూటికి చేరిన సేవాభావాలు
మానవతాపరిమళాలు చిందిస్తాయి
మంచిచేతలు చందనగంధాలౌతాయి
మానవజన్మకు సార్ధకత చేకూరుస్తాయి
