[box type=’note’ fontsize=’16’] “నీలి నీడలు” అనే ఖండకావ్యంలో మొత్తం ఏడు ఖండికలు ఉన్నాయి. ప్రతి ఖండికలో ఆణిముత్యాల వంటి పద్యాలు ఉన్నాయి. ‘చేతన’ అనే కలం పేరుతో ప్రస్తుత సమాజాన్ని పట్టి పీడిస్తున్న దురాచారాలను ప్రజలకు తెలిపి, జాగృతపరుస్తారు కవి మేడిపల్లి వేంకట లక్ష్మీ నారాయణ. ఇది మూడవ ఖండిక ‘జూదము’. [/box]
[dropcap style=”circle”]జూ[/dropcap]దము – ‘నీలి నీడలు’ ఖండకావ్యంలోని మూడవ ఖండిక.
***
భారతదేశ కీర్తికిని భంగముగల్గెడి రీతినింబ్రజల్
భారమనంగ నిద్ధరకు భాసుర మార్గమునందు నిల్పకే
కారణమౌచు చెడ్డకును కందుగ జేసెడి జూదక్రీడకున్
చేరువగా మెలగుంచును శ్రేయముబొందక గుందుచుండిరే. (1)
కాలక్షేపమటంచు కొందరును, కాక్షంజేసి యుంగొందరున్
కేళీలోలత చేత కొందరును, జంకే లేక యింకొందరున్
మేలౌ డబ్బును గోరి కొందరును, నేవులెంచక గొందరున్
నేలంధార్మిక బుద్ధి గొందరును, బత్నీచాత్ములై కొందరున్. (2)
మోదము గూర్చునంచుగడు మూర్ఖపు భావనతోడ మానవుల్
జూదమునాడి పూర్వమున సొమ్ములు గోల్పడి రిక్తహస్తులై
ఖేదము జెంది సంతతము క్లేశములందుచు గ్రుంగిపోవుచున్
వేదన పొందినారు పృథివీస్థల మందున నెందరెందరో. (3)
నలుడుగోలుపోయె నిలవైభవమంబును
ధర్మరాజు వీడె దనదు పదవి
శిష్టులెల్లరోసె దుష్టపద్ధతియైన
జూదమందునోడి, చోద్యముగను. (4)
ధరను సప్త వ్యసనముల వరుసయందు
ప్రథముగ జెప్పబడుచుండి ప్రజలకెపుడు
హాని గల్గించుచుండెడి యథమగుణము
జూదమే యని దెల్పిరి వేదవిదులు. (5)
మాయపాచికలాటనే మహినియెల్ల
ఎంచుచుండ్రి జూదంబుగ నింతదనుక
ఇంతకన్నను ఘోరమై యిండ్లు గూల్చు
ఆటలెన్నేనిగల నరసిచూడ. (6)
పౌరుషంబది యెంతయో ప్రకటితమవ
పెచ్చుపెరిగెడి రోషాన రెచ్చిపోయి
పందెములపైన పందెముల్పరగవేసి
మేదినిని యాడునాటను జూదమండ్రు. (7)
కోడి పందేలు, పేకాట, మూడు ముక్క
లాట, పొట్టేళ్ళ పందేలు, లాటరీలు
మట్క జూదంబు, కాటను మార్కెటులును
అరయ గుఱ్ఱపుంబందేలు ననగజెల్లు
ధాత్రి జూదంబులివి యని తద్దరీతి. (8)
మాయమోసాలతో గూడినముజెపుడు
అధికమొత్తంబువచ్చునంచహరహంబు
మభ్యపెట్టెడి స్కీములున్మహిని గాంచ
జూదసమమని జెప్పిరి వేదవిధులు. (9)
పాలకుండు మొదలు, పాలితులైనట్టి
పేదవాని వఱకు, వెఱ్ఱితోడ,
జూదమాడుచుండ్రి చోద్యంబుగా నేడు
కష్టములను గోరి కలియుగాన. (10)
రాజిల్లుచుండెడి రాజ్యరమలు పోయె
కోటపేటలు పోయె, గొప్పపోయె.
అధికారములు పోయె, నందలంబులు బోయె
వైభవంబులు బోయె, వాసి పోయె.
అంతస్తులనుబోయె, నాస్తిపాస్తులు బోయె
మాన్యంబులుంబోయె, మడులు బోయె.
ఠావు దర్పముబోయె, ఠేవచేవయు బోయె
నగల డాబు బోయె, నెగడు బోయె.
కృతయుగము నుండి కలిని ప్రస్తుతముదనుక
విస్తరించిన చరితల వెదకి జూడ
ఎంతనాశంబు జరిగెనో యెంచలేము
అధమమైనట్టి జూదంపుటాట వలన. (11)
మానవత్వము పోవు, మమకారమునుబోవు
మంచిచెడులు బోవు, మమత పోవు
నీతిరీతులు బోవు, నిర్మలత్వము బోవు
శాంతగుణము బోవు, దాంతిపోవు
భక్తిరక్తులు బోవు, బంధుప్రేమయుబోవు
ఆలోచనాశక్తి యసలుబోవు
గౌరవంబును బోవు, గరుణభావము బోవు
పాండిత్యమునుబోవు, పరువు బోవు
కలుషములకును నెలవైన కలియుగాన
ప్రళయనర్తన జేయుచుబ్రబలునట్టి
చేటుగలిగించు జూదంపుటాటవల్ల
మందబుద్ధులు దుఃఖింత్రు మహిని మిపుడు. (12)
మంచి బుద్ధి పోయి వంచనంబును వచ్చు
సంతసమును బోయి వంతగలుగు
మానవత్వము బోయి దానవత్వము వచ్చు
వసుధ జూదమాడు ప్రజలకెపుడు. (13)
ఆలుబిడ్డల పట్ల ననురాగమును బోవు
తల్లిదండ్రుల పట్ల ధ్యాస తగ్గు
బంధుజాలంబుపై పట్టును గోల్పోవు
హితుల వాక్యంబులు హేయమగును
ఇంటి బాధ్యతలకునెంతో దూరమునౌను
నీతిసూక్తులనిన రోత గలుగు
ఆలోచనా జ్ఞానమంతరించసాగు
పాపపు పనులపై చూపు గలుగు
రోష భావంబు హెచ్చు సద్భాషలుదుగు
పాడు యలవాట్లు జేరును బాధ లొడవు
ఆర్తి కలుగును జగతిని కీర్తిదొలగు
దుష్ట జూదంబునాడిన ధూర్తులకును. (14)
కోడి పందేలలో దాడివేడియు రేగి
కయ్యాలకేనది కారణంబు
పొట్టేళ్ల పందేల బట్టుదలలు హెచ్చి
దానవత్వంబుకు దారితీయు
గుఱ్ఱపుపందేలు గోర్కులంబెంచును
సర్వముంగోల్పోవు స్థాయి దెచ్చు
మూడు ముక్కుల యాట, ముందర మురిపించి
వెనువెంట ధనమంత చనగజేయు
మట్క జూదంబు డబ్బుపై మరులు గొలిపి
ఆశలంబెంచి సతతంబు హానినిచ్చి
ఇల్లు గుల్లగ జేసి యిక్కట్లు గూర్చు
తినగ తిండి కరువగు తీరు రెచ్చు. (15)
ఆహారనిద్రలు అను మాట లేనట్టి
తీరును కల్పించి దీనుజేసి
పవలురాత్రిళ్లను భావమెంచగనీక
అనిశంబు నాడగ నాశగొల్పి
ఇల్లాలు పిల్లలునేమౌదురోయను
తలపైనరానీక తులువజేసి
ఇంటి పనుల నెపుడునే మాత్రమేనియు
పట్టించుకొననట్టి ఫణితినిచ్చి
ఆస్తులను అమ్ముకొనునట్టి యవసరమును
వింతరీతిగ గల్పించి, విభవమంత
తరిగిపోయెడి విధమును తనరజేసి
ఇలను పేకాట మనుజుని హీనుజేయు. (16)
తక్కువ ఖర్చుతో నెక్కుడు మొత్తమున్
పొందవచ్చనియెడి పూన్కెనిచ్చి
కాలాదికాలాననె కోట్లాది ధనమును
బడయగవచ్చను వాంఛ బెంచి
ఎంతమాత్రంబేని సుంతైన శ్రమ లేక
కోట్లు కూడగబెత్తు కోర్కెనిచ్చి
అత్యంత విలువైన అపరంజి వస్తువుల్
సులువుగా బొందెడు తలపునిచ్చి
ఆశ మితి మీరి కరము దురాశ హెచ్చు
నటుల జేసియు మనుజుల నవనియందు
మోసములుకును గురిజేసి యాసడుల్చు
మాయ లాటరీల్‌స్కీములు మహితరీతి. (17)
మోసములోన బుట్టియును, మోసము తోడుత వృద్ధి బొందుచున్
మోసముజేసి కొంపలను ముంచుచు గోట్లకు “ఐపి” బెట్టుచున్
మోసముచెత మానవుల మోదమడంచుచు ఖేదమిచ్చుచున్
గాసిలజేయుచున్మిగుల గ్రాలెడి స్కీములు నివ్వియిద్ధరన్. (18)
జూదమాడువాడు క్షోణీతలంబున
మంచిచెడ్డలెపుడు నెంచలేడు
ఉచ్ఛనీచములను నూహింపగాలేడు
ఒప్పుతప్పులరయుచుండ లేడు. (19)
కావున నిట్టి జూదముల గాలిని గూడను సోకనీయకన్
ధీ వినుత ప్రభావులగు దిట్టలతోడ మెలంగుచున్కడున్
భావనజేయుచున్మదిని భాసిలు మంచిని నెల్లవేళలన్
జీవితయాత్ర జేయవలె బెన్నగు రీతిని నెప్డు మానవుల్. (20)
పోరాడు జూదమాడగ
ఆరాటము చెందరాదు నధిక ధనముకై
తేరగ లాభార్జనమును
గోరుచు, మనుజాళి కరముకందురు రిలలోన్. (21)
ఇట్టి దుష్ట జూదమింక మీదటనైన
ధరణి తలమునుండి తరలిపోవు
నట్లు జేయమిగుల యత్నింపకున్నను
నరుల జీవితాలు నాశమగును. (22)