[dropcap]క[/dropcap]వులకు వాంతులవుతున్నాయి!
అరగక, లోపల ఇముడని దంతా వచ్చేస్తూంది
సోషల్ మీడియాలోకి బొళుక్కుమంటూ!
అదంతా పేరుకుపోయింది, డిలీట్ చేయలేనంతగా
దాని కంపు దుర్భరంగా ఉంది!
రెండు వందలు పంపిస్తే చాలు
ఏ చెత్తనైనా సంకలనం చేసేవారు రడీ!
పైగా అందమైన ప్రశంసా పత్రాలు! మెమొంటోలు!
సభలో స్వీయ కవితాగానం!
ఎవరూ వినను కూడా వినని అరణ్యరోదన!
వాట్సాప్ అయ్యింది వాంతులకు వేదిక
ఫేస్బుక్ అయితే చెప్పేదే లేదిక
స్వకుచమర్దనాలూ స్తనశల్య పరీక్షలు
బాగాలేదంటే పరుషపదాల దాడులు
చెత్తకుండీలవుతున్నాయి సామాజిక మాధ్యమాలు
కక్కుకునేది కాదు కవిత్వమంటే
హత్తుకునేది మెత్తగా చదువరి చిత్తాన్ని
ఎదలోపలి స్పందనలను మధురాక్షర రూపమిచ్చి
విదితంగా, విశదంగా, విరజాజుల పరిమళమై
అంతరంగాన్ని అలుముకునేదే కవిత్వం!
ఇతివృత్తాన్ని జీర్ణం చేసే సున్నితత్వగోళీలను
మింగితే బందవుతాయి ఈ అప్రయత్నవమనాలు
భావాన్నీ భాషనూ అందంగా పెనవేసి
పలికించండి కవిత్వాన్ని పరమ మనోహరంగా
మిగిలిపోకండి సాహిత్యంలో అజాగళస్తనాలుగా!