[శ్రీ మరింగంటి శ్రీకాంత్ రచించిన ‘క్రమశిక్షణ..’ అనే కవితని పాఠకులకు అందిస్తున్నాము.]
[dropcap]ప్రా[/dropcap]రంభమూ, ముగింపు రెండూ ప్రాధాన్యాలే
ఏదీ లోపభూయిష్టం కారాదు
రసవత్తర ఘట్టాలన్నీ రంజింప జేసేదంతా మధ్య లోనే
చావు పుట్టుకలన్నీ నిజాలే
నట్టనడిమి బతుకే ఓ నాటకము
పాత్రోచితంగా అభినయిస్తేనే ప్రేక్షక కరతాళ ధ్వనులు
పలువురి మన్ననలు
బాల్యం పెద్దల బుద్ధులతో గడిపినా
కౌమారం వివిధ శిక్షణ లతో అడుగిడినా
యవ్వనానికి మాత్రం పూర్తి స్వేచ్ఛనందించకు
అతుకుల, గతుకుల సవాలక్ష దారులన్నీ అగుపడుతుంటాయి,
రా.. రమ్మని పిలుస్తాయి
ఏ దారి నిన్ను గమ్యం చేర్చగలదో దాన్నే ఎంచుకోవాలి
గతాన్ని, భవిష్యత్‌ను బేరీజు వేసుకుని
వర్తమానపు బాటలో ముందడుగు వేయాలి
లక్షణమైన గుణంతో సలక్షణ జీవితం ముందుంది
ఆలోచించి అవలోకనం చేసుకుంటే
కన్నకలలతో కన్నవారికి పుత్రోత్సాహం కలుగు..
