కుసుమ పరాగం

[శ్రీమతి ఏ. అన్నపూర్ణ రచించిన ‘కుసుమ పరాగం’ అనే కవితని పాఠకులకు అందిస్తున్నాము.]

[dropcap]పూ[/dropcap]ల తోటలో విరబూసిన
కన్నె కుసుమాన్ని నేను
నా అందానికి బందీలు కానివారు లేరు
కురులలో ముడుచుకునేరు
పచ్చని ఆకుల మధ్య
ఎన్నో రంగులతో అలరిస్తాను
పూల దండలలో ఒదిగిపోతాను
పుష్ప గుచ్చంలో మురిసాను
పెళ్లి మండపానికి కళలు తెచ్చాను
కనులకు విందుచేసాను
అన్నింటా నేనే
అలంకారానికి నేనే
మగువల మనసు దోచేది నేనే
ప్రేమికులకు బహుమానంగా మారి
ప్రతి ఇంటా విరియబూసాను
పూజకు నేను
పట్టాభిషేకానికి నేను
పెళ్లికి నేను
పండుగకు నేను
ఇంటి గుమ్మానికి తోరణంగా అమరి
అతిథులకు స్వాగతం చెబుతాను
దేవుని మెడలో హారంగా
పాదాలమీద
పవిత్ర పుష్పంగా తరించాను
ఆలుమగల మధ్య తలంబ్రాలై
శయ్యపై నలిగిపోయిన నా జన్మ ధన్యం
కంటికి ఇంపుగా
మనసుకి ఆహ్లాదంగా ఉండటమే నా ధ్యేయం
బాధను మరిపిస్తాను
ప్రేమను పుట్టిస్తాను
అందరి మనసులను అలరిస్తాను
నీటిలో తామరనై
నింగిలో వెన్నెల పూవునై
నీలో హృదయ కమలమునై
నిలిచిపోదును కలకాలము!