[2024 క్రోధి నామ సంవత్సర ఉగాది సందర్భంగా వి. నాగజ్యోతి గారు రచించిన ‘మరో ఉగాది’ అనే కవితని పాఠకులకు అందిస్తున్నాము.]
[dropcap]ప[/dropcap]రుగుల జీవనంలో
వచ్చే ఎన్నో పండుగలు.
ఇల్లాలి వంటింటి మెనూలో
భాగమౌతూ తరలి పోతాయి
మొక్కుబడి పూజలో మరొక నైవేద్యంలో
ఆరురుచులను కలిపే క్రమంలో
వేపపువ్వు ఏటికొకసారి
గ్రామ దేవతలా వెలిగిపోతుంది
తెలుగు సంవత్సరాల పేర్లు తెలియకున్నా
ఉగాది పేరుతో ఆ ఒక్కరోజు
కొత్త సంవత్సరం పేరు మాత్రం
రామనామం కన్నా మిన్నగా
రాష్ట్రం నలుమూలలా వినిపిస్తుంది.
ఆ ఒక్కరోజు రాశిఫలాలు
లూజు కనెక్షన్ వున్న బల్బులా
కొందరికి ఉన్నతమైన వెలుగుని
మరికొందరికి చీకటి దృశ్యాన్ని
కొందరికి నిరాశ నిస్పృహలతో
తర్కించుకునే అవకాశాన్ని
తాత్కాలిక జాగ్రత్తలను కలగచేస్తుంది
ఏ ఏడు పేరు మారినా మా జీవితాలు
మారవంటూ రైతన్న
తన కన్నితల్లి కన్నా మిన్ననైన తల్లికి
చమటతో స్నానమాడించి
ఆనందంగా ఆమెను చూసి
మురిసిపోతాడు
రక్త సంబంధం వెలవెలపోయేలా
కాడెడ్లు తోడుగా నిలిచి
మూగజీవుల ప్రేమ ఎంత గొప్పదో
తెలియచేస్తాయి.
