సీ. 1
బాధ, సంతోషము, భక్తి, పరవశము
ఆగ్రహావేశములన్ని తెలుప;
మంచి, మర్యాదలు మరియు గౌరవమును
ప్రేమ, దయయు, మైత్రి కోమలముగ;
తెలుపగలము సుమ్మి తెలుగునందు మిగుల
మాతృభాష కనుక మక్కువగను:
అట్టి భాష మనము అరసికాపాడగా
పూనుకొనవలయు పుణ్యమదియె.
ఆ.వె.
అమ్మభాషయనిన యమృతమువంటిది,
గ్రోలుకొలది తీపి గోముగాను
ఎన్నియైన నేర్వ యితరభాషల నీవు
మరువవలదు నీదు మాతృభాష!
* * *
సీ. 2
భారతమ్ము మరియు భాగవతమ్ములు
రామాయణమువంటి రచనలెల్ల;
పరమభాగవతులు బమ్మెర పోతన
నన్నయాదికవుల వెన్నమనకు!
కథలు, గల్పికలును కావ్యనాటకములు,
నవల,రూపకములు నవ్యరుచులు;
కృతులు, కీర్తనలును, గేయములెన్నియో
సాహిత్యరూపున సంపదలివె.
ఆ.వె.
కాచుకొనవలయును కమ్మని నిధులను
అక్షరముల వ్రాసి లక్షణముగ
దోషరహితముగను భాష పలుకవలె
మాతృభాష పట్ల మమత కలిగి!
