[సత్యగౌరి మోగంటి గారు రచించిన ‘నవజీవన రాగం..!!’ అనే కవిత పాఠకులకి అందిస్తున్నాము.]
[dropcap]అ[/dropcap]దేంటో..
ఈ ప్రేమ —
కాలంతో పాటు,
మరింత చిక్కబడుతూ ఉంటుంది
మొగ్గలా వికసించి —
పరిమళాలు వెదజల్లినట్టు!
రెండు హృదయాలదీ
ఒకటే శబ్దం.. ఒకటే గానం ,
ఓ భావోద్వేగం.. అందమైన ఆశ్చర్యం
చల్లని మలయ సమీరమే..!
ప్రతి క్షణం మూటకట్టిన –
గంధపు పరిమళం.
గుప్పెడంత గుండెకు అదే ప్రాణం
అనుక్షణం పిలిచే నీ పిలుపే
నాకు జీవన సాఫల్యం..!
నీ కళ్లు నా కలల వాకిళ్లు,
అణువణువూ నవజీవన రాగం,
నీ మృదుమధురమైన స్పర్శే-
నాలో ఊపిరైన నవ చైతన్యం!
నేనెక్కడ అలసిపోతానోననే నీ భయం,
నేను ఎక్కడున్నా నిలబెట్టే ధైర్యం!
సూర్యుడి ప్రకాశంలా.. తారకల మెరుపులా,
మన ప్రేమ నిరంతరం ఊరే నీటిచలమనే..!!
