నీతో దేవుడికేం పని?

[dropcap]దే[/dropcap]వుడిని అదీ ఇదీ కావాలని అడగకు
కోరికల చిట్టా చుట్టచుట్టి పక్కన పెట్టు
దాని వల్ల ఒరిగేది నకారమే.
నీ ‘కర్మ’తో ఆయనకేం పని?
ఆయనేమీ ‘గ్రీవెన్స్ సెల్’ నడపడం లేదు
నీ మొక్కుబడులతో, పూజలతో
ఆయన్ను ప్రలోభపెట్టాలని చూడకు
నీ బలహీనతలన్నీ ఆయనకూ ఆపాదించకు
నీవు మొక్కులు తీర్చకపోతే, సందర్శించకపోతే
ఆయనకు కోపం వస్తుందనీ, అనర్థం జరుగుతుందనీ
అనుకుంటే అంతకంటే మూర్ఖత్వం లేదు.
తన పేరు పెట్టలేదని, బారసాల నాడు
చంటిపాప నేడ్పించేవాడు
దేవుడెలా అవుతాడు?
కోపాలకూ, ప్రతిచర్యలకూ,
కృతజ్ఞతకూ, కృతఘ్నతకూ
అతీతమైనదే దైవత్వం
నీ చేతలూ తలపోతలే నీ తలరాతలు
అవే నీ సంతోషాన్ని, నిశ్చింతనూ నిర్ణయిస్తాయి.
దేవుడు కానే కాదు.
నీ విధి నీవు చిత్తశుద్ధిగా నిర్వర్తించు
పనిలోనే భగవానుని చూడు
సేవ, సహాయాలే ఆయన కిష్టమైన పూజా విధానాలు
స్వర్గం నరకం అనేవేవీ ఉండవు
ఉంటే గింటే, అవి నీలోనే వున్నాయి
నీ సంతోషమే స్వర్గం, నీ దుఃఖమే నరకమని
సుమతీ శతకం సూక్ష్మంగా చెప్పింది.
సహజనులలో స్వామిని దర్శించు
సర్వజన హితమే నీ ప్రార్థన పరమార్థం
అదే నిర్మలానందపు మర్మం.
మతాలు దేవుడిని రకరకాలుగా ఆవిష్కరిస్తాయి
వేరే దేవుళ్ళను నమ్మొద్దంటాయి
‘ఏకం సత్! విప్రాః బహుధా వదంతి’
అన్న సూత్రమే నీకు ప్రమాణం
‘నదీనాం సాగరో గతిః’ అన్నట్లు
అన్ని మతాల గమ్యం ఒకటే అని గ్రహించి
నీ మతాన్ని విడువక, అన్ని మతాలనూ ఆదరించు
అదే నిజమైన సెక్యులరిజం!
పరమాత్మ మనుషుల్లో ప్రకృతిలో
వ్యాప్తంగా ఉంటాడు
వేరే రూపం ఉండదాయనకు
అంతర్ముఖుడివై ఆయనను దర్శించుకో
బంధనాలకూ, పక్షపాతానికీ అతీతుడవైతే
మిగిలిందంతా ప్రశాంతం!
విముక్తి మార్గం నీకిక సుగమం!