[శ్రీమతి ఏ. అన్నపూర్ణ రచించిన ‘నేర్చుకుందాము’ అనే కవితని పాఠకులకు అందిస్తున్నాము.]
[dropcap]ప్ర[/dropcap]కృతి నేర్పుతుంది మనకు పాఠాలు
నేర్చుకుందాం ఒద్దికగా ఓర్పుతో
ఆణువణువూ పరిశీలించితే
ఏదో ఒక సందేశం వినిపిస్తుంది
భూమి – ఆకాశం, సరస్సులు – నదులు,
పర్వతాలు – అంతం లేని సాగరం
జీవిత సత్యాన్ని చెప్పే బోధకులు
ఏ పాఠశాలలోనూ తెలియ చెప్పని
గొప్ప నేస్తాలు
కాలం గడవటంలేదు అనడం
బద్ధకస్తుల లక్షణం
ఆకాశంలోకి చూస్తే దేశాలు దాటి
ఎగిరే పక్షులు కనిపిస్తాయి
అగాధమైన జలధిలో ప్రయాణించే ఓడలు
చిన్న గాజు తొట్టెలో ఈదులాడే మీనాలు
చెంగున దూకే ఉడతలు అబ్బుర పరుస్తాయి
బుల్లి బుల్లి రెక్కలు ముడుచుకొని
హమ్మింగ్ బర్డ్స్ చిట్టి చిట్టి చీమలు
నిరంతరం పనిచేసే క్రమశిక్షణ
రాబోయే కాలానికి ముందు జాగ్రత్త
ఎవరైనా నేర్పేరా లేదు నేర్చుకున్నాయి
చూడటానికి దూది పింజెలు అయితేనేమి
కఠినమైన శిఖరాలను సైతం
బాహువుల్లో బంధించగలవు మేఘాలు
ఎంత గాలి వీచినా తుపానులు వచ్చినా
ఎదిరించి ఠీవీగా నిలబడతాయి భారీ వృక్షాలు
మానవాళికి మార్గదర్శకాలు తరచి చూస్తే
కంటి ఎదుట నిలిచిన సుందర స్వప్నాలు
మాయని చరిత్రలో స్ఫూర్తి సందేశాలు
అనుసరించేవారికి తరగని విలువైన ఖజానాలు.
