[శ్రీ గొర్రెపాటి శ్రీను రచించిన ‘నేస్తమా.. వింటున్నావా?’ అనే కవితని పాఠకులకి అందిస్తున్నాము.]
[dropcap]ఒ[/dropcap]కే చోట కూర్చున్నామనుకో
కొత్త విషయాలేవీ తెలుసుకోలేము!
అలసట ఎరుగని ప్రయాణం
మనమైతే
ప్రపంచం నేర్పే పాఠాలెన్నో!
బావిలోని నీళ్ళు తోడకుండా ఉంటే
పనికి రాకుండా పాడైనట్లుగా..
సరికొత్త కి ఆహ్వానం పలకకపోతే
పాత పద్ధతిలోనే పనిచేస్తుంటే..
మారుతున్న ప్రపంచ పోకడలను,
సాంకేతికతను అర్థం చేసుకోలేము!
అందుకే నేస్తం..
నిత్య చైతన్యం,
తెలుసుకోవాలనే ఆరాటం,
రేపటి పై ఆశ,
ఉన్నతంగా బతకాలన్న ఆశయం..
సదా జ్ఞప్తికి వుంచుకొని జీవించాలి!
అప్పుడే మన బ్రతుకు తీరు పదిమందికి ఆదర్శమయ్యేది!
అర్థవంతమైన జీవితానికి సందేశం మనమై నిలిచి
అందరి మన్ననలు అందుకోగలము!
