[dropcap]ఇ[/dropcap]ది అల్లాఉద్దీన్‌కు దొరికిన
అద్భుత దీపం కథ కాదు.
‘సెసేమ్’ మంత్రంతో నడిచిన
ఆలీబాబా నలభై దొంగల కథ కాదు.
జలార్ణవాల్లోంచీ పుట్టుకొచ్చిన
ఒంటికన్ను రాకాసుల కథా కాదు.
రాజును మురిపించి
వెళ్ళిపోయిన మాయాకన్యల కథ కూడా కాదు.
వాళ్ళంతా నిన్ను ఊహాలోకాల్లో తిప్పి అలరించిన వారే
నీకేమీ అన్యాయం చెయ్యని వారే
ఇపుడు చెప్తా విను అసలైన కథ!
కనపడని మాయల తంత్రంతో
ఒంటరి యుద్ధం చేస్తున్న ఒక పోరాట యోధుడి కథ
ఏ అద్భుత దీపాలూ లేకుండా కథ నడిపే వారి కథ
ఏ ‘సెసేమ్’ మంత్రాలకూ తెరవలేని గుహల కథ
క్షణానికొకటిగా మొలిచే రాకాసులనెదిరించే కథ
ఏ వీరత్వాన్నీ చూసి ప్రేమించని మాయాలోకపు కథ
నిను ఉసిగొల్పి పరిగెత్తించి
నీ కాళ్ళ కింద నేలని లాక్కు పోయే దొంగల కథ
నీ కంటికి కలిక మేసి
కనురెప్పలు దోచుకునే మాంత్రిక మేధావుల కథ
నిన్ను చీకటి గదిలోనే ఉంచి
నీ చుట్టూ ఆడుతున్న కోతి కొమ్మచ్చి కథ
నీవే అల్లాఉద్దీనై ఆలీబాబావై సాహస యోధుడివై
మాయల తెరలు చీల్చి మర్మం కనుక్కొచ్చే కథ
నీకు తెలియకుండా జరిగే నీదే అయిన కథ
నీ భుజాన వీడకుండా వేలాడుతున్న బేతాళుడి కథ
ఓ కొత్త కథ ఉంది చెప్పనా?
