పిచ్చి వనం

[శ్రీ పెద్దాడ సత్యప్రసాద్ రచించిన ‘పిచ్చి వనం’ అనే కవితని పాఠకులకి అందిస్తున్నాము.]

[dropcap]క[/dropcap]మ్మగా పాడే కొయిల
వచ్చిందని వనమంతా
మురిసింది
ఒళ్ళంతా కళ్ళు చేసుకుని
వినోదించింది
తనువంతా చెవులు చేసుకుని
విని తరించింది
కోయిల గానంతో
తన్మయమైపొయింది
తన బతుకుకి ఇది
చాలనుకుంది
ఇంతలో ఎంత మాయ
అన్నట్లుగా
ఆ మధురగానం
మౌనమైంది
ఆ రూపం
కనుమరుగైంది
ఇంతింతగా ఎదిగి
ఎగిసిన వన సంబరం
మూన్నాళ్ల ముచ్చటైంది
కోయిల తన కోసమే
వచ్చిందనుకున్న ఆ వనం
ఆమె కానరాక
ఇక చాలనుకుంది జీవనం
పాపం పిచ్చి వనానికి
తెలియదు కాబోలు
వసంతం కోసమే
కోయిల వచ్చిందని
అది వెళ్ళిపోగానే
తానూ ఎగిరిపోయిందని