ప్రకృతి ప్రాణ వాయువు ప్రసాదిస్తుంది కదా!
మనిషేమిటి, కాలుష్య వాయువును వెదజల్లు తున్నాడు!
మలయ మారుతంతో, మంచి గంధపు వాసనలతో
మనసు ఉల్లాస డోలలు ఊగాలి కదా!
పూల పరిమళాలతో, పక్షుల కిలకిల రావాలతో
హరిత తోరణంలా భువి విరాజిల్లాలిగా!
రాగ రంజితం కావాలిగా!
విష వాయువులు విశృంఖలంగా విరజిమ్మితే
తావిలేని పువ్వులు పూస్తాయేమో !
కూతలేని పిట్టలు వస్తాయేమో !
మేథలేని పిల్లలు పుడతారేమో!
వరద బీభత్సాలు
భూకంపాల భారీ నష్టాలు
సునామీ శవాల గుట్టలు
ఇప్పటికే చూశాంగా!
వీటి ప్రభావం తాత్కాలికమేనని
జనాళి ఉపేక్షిస్తుందేమో!
ఇప్పటి నుంచి దీర్ఘకాలిక దుష్ప్రభావాలు
జీవకోటిని అతలాకుతలం చేస్తే-
మానవాళికి మేలుచేసే
క్రిమి కీటకాలు అంతరించిపోతే-
పరాగ సంపర్కానికి భ్రమరాలు
గ్రహణ శక్తిని కోల్పోతే !
తుమ్మెదలు గ్రోలే మకరందం
పువ్వులకు లేకుండాపోతే
వట్టి పోయిన విరులే మిగిలితే
నేలను సారవంతం చేసే
వానపాములు కనుమరుగై తే
పారిశ్రామిక వ్యర్ధాలూ
పురుగు మందులు వాటి సంతానోత్పత్తిని దెబ్బతీస్తే!
ఆహార చక్రం అతలాకుతలం అయితే
పిచ్చుకల కిచకిచలతో
అలరారే గూళ్లు మూగనోము పాటిస్తే
కాలుష్య ప్రభావానికి లోనై
పుట్టుకొచ్చే సముద్ర పక్షులు (గల్ఫ్స్)
వికృతిగా ప్రవర్తిస్తే..!
కనకుండానే గర్భస్రావాలు
పుట్టుకతోనే లోపాలు కొనసాగితే
ప్రకృతి వికృతి కాదా!
బ్రహ్మాండం బడబానలం కాదా!
