‘సరిగ పదమని’ (మన రెక్కలు) అనే శీర్షికతో సంచిక పాఠకులకు రెక్కలని అందిస్తున్నారు పురాణం శ్రీనివాస శాస్త్రి.
~ ~
రష్యా, అమెరికా
రాజేసిన నిప్పు
అఫ్ఘాన్‌లో మతం
వంతుల వారీ నివురు
సకల జన హాహాకారం
‘ధర్మ’ కంటక వికారం!
~ ~
మైనారిటీ, మెజారిటీ
గోల కాదు –
మంచి ఏదో
ఎంచి ఆగు –
నిక్కచ్చితనం ఎక్కడో
అక్కడే శాసన సాగు!
~ ~
బతుకంతా బాధయితే
నొప్పికే జీవితాల
నైవేద్యార్పణం
మరణమే ఇక శరణం –
అందుకే విష కౌగిలి
రైతుకయే నెచ్చెలి!
~ ~
ప్రతి ఉదయం
కొత్త కొత్తగా కొందరికి
అసలు ఉదయమే
ఉండదు ఎందరికో
మరి సంతోషం కొలబద్ధ
సన్నాసుల చేతిలో!
