[dropcap]శ[/dropcap]త్రువు సహజంగానే నీకు గురి పెడుతుంటాడు
వాడు నిన్ను ద్వేషిస్తూనే ఉంటాడు!
ఈర్ష్యా, అసూయలతో రగిలిపోతూనే ఉంటాడు!
బురద జల్లుతూ, అభాండాలు వేస్తూ కాలం గడుపుతుంటాడు!
నీకెప్పుడూ కీడు తలపెడుతూనే ఉంటాడు!
నీ కదలికల నెప్పుడూ కనిపెడుతూనే ఉంటాడు!
నీ బలహీనతల కోసం వెదుకుతూనే ఉంటాడు.
వాడి బుర్రెప్పుడూ దయ్యాల కార్ఖానాలాగే పనిచేస్తుంది!
వాడి శక్తులూ, యుక్తులూ కుయుక్తులై ఉంటాయి!
ఒక్కోసారి –
నీ శ్రేయోభిలాషి లాగే నటిస్తుంటాడు.
నీ వెంటే ఉంటూ శల్య సారథ్యం వహిస్తాడు.
నారదుడై నీ మాటల్నే మంటలుగా మండిస్తాడు.
నీ సంతోషం వాడికి విషాదమవుతుంది!
నీ విజయం వాడికి పరాజయమవుతుంది.
నీ పురోగమనం వాడికి తిరోగమనమవుతుంది.
నీ పరాభవం వాడికి ఉల్లాసంగా ఉంటుంది.
నీ పరాజయం వాడికి ఉత్తేజాన్నిస్తుంది!
నీ పతనం వాడికి ఉత్థానమవుతుంది.
వాడు నివురు గప్పిన నిప్పులా
కుబుసం వీడని పాములా
అదను కోసం ఎదురుచూస్తూంటాడు
నిన్ను వెన్నంటే నీడ వాడు!
నిన్ను ఉరివేసే తాడు వాడు!
నీ కంట్లో నలుసు వాడు!
నీ ఒంట్లో నలత వాడు!
వాడెన్ని సార్లు ‘క్లిక్’ చేసినా
నువ్వు ఓపెన్ కాని పేజీలా ఉండాలి!