[dropcap]ఏ[/dropcap]మిటిదీ? మనసు ఘనీభవించి
ఇంత ఘోరకలి చెవుల బడినా
మనసు స్పందనలు కోల్పోయి,
మౌన నిస్తేజ సంభాషణ?
మనసు కవాటాలలో శృతి తప్పిన తీగెల్లో
చేతనత్వం నశించిందా?
అంతరంగానికీ, బాహ్య ప్రపంచానికీ,
వారధి తెగిపోయి,వెన్నెల మెట్లెక్కలేక
చీకటి గుయ్యారంలో చతికిల బడిందా?
పలువిధాల సంచరీ భూతం కావాల్సిన మనసులో ఆ శూన్యాకాశ ఖాళీ ఏమిటీ?
అ, ఆ ల డాంబికాలతో అల్లిన అక్షరాలు
కుదురుగా కూర్చోవేం?
అన్యాయాన్ని కవిత్వీకరించాలంటే
కలం కుంచెతో గీద్దామంటే
కవిత్వానికింత మూతి ముడుపేం?
కళలలోని లలితం
నన్నర్థం చేసుకోదేం?!
లాలిత్యం ఓదార్చదేం!
నడ్డి విరిగిన నా ఆలోచనలు
కలంపోటుకైనా
కదల మంటున్నాయేం?
మనసు మూలను అంటుకున్న మమత
పొరలు, వెతల కరిగీ విచ్చుకోవేం?
రగలుతున్న జ్వాలలన్నీ, మనసు కాన్వాస్
పొగల సిరానద్దీ గీయదేం? పొగరా మదికి?
అచేతనమై పెన్నేం కదలదే? దిగులుసిరాతో
నింపానా? దివాంధ నయ్యానా?
లేక ఆమె ~ ఊపిరిలో నేనూ స్తంభించానా?
