[dropcap]త[/dropcap]ల్లిభాషలో విద్య నేర్పిన
తరతరాలకు మేలు జేయు.
పాల బుగ్గల పసిడి ప్రాయము
పలుకరించు మాతృభాషన.
ప్రాథమిక పరిజ్ఞానమంతా
పంచిపెట్టును అమ్మభాష.
నేల విడిచిన సాము గదరా,
నమ్ముకున్న పరాయిభాష.
కలసివచ్చును ఇతర భాషలు
కళాశాల విద్యలందున.
***
ఐదు భాషలు విశ్వమందున
అంతర్జాతీయ భాషలు.
అందులోనే ఆంగ్లమొకటై
అలముకున్నది భారతాన్ని.
పిల్లబోయిన గాని ఇంకా
పోలేదిచట పీతి కంపు.
ఆంగ్ల మాధ్యమమ్ముదో ఫ్యాషన్
ఆదర్శము భావదాస్యము.
జపాన్, చైనా, రష్యా లందు
ఆంగ్ల మాధ్యమమే లేదు.
***
ఉన్నవారు ఆంగ్ల మాధ్యమము
నందు చదువ లేదు నష్టం.
వెనకబడితే ఆస్తులున్నవి
వెనుక ముందున బోలెడన్ని.
లేనివాడే వెనుకబడితే
లేనేలేదోయ్ బతుకుబాట.
వృత్తి విద్యా కోర్సులందున
ఉండవలెనోయ్ ఆంగ్ల భాష.
పదో తరగతి దాక మాతృ
భాషా మాధ్యామ ముత్తమం.