[dropcap]దే[/dropcap]శంలో నేటి సామాజిక స్థితిగతులపై తన ఆలోచనలను ‘వారెవ్వా’ అంటూ కవితాత్మకంగా వెల్లడిస్తున్నారు ఐతా చంద్రయ్య.
~
కొనబోతే కొరివి వస్తువులు
అమ్మబోతే అడవి లాగ..
దళారుల దందాల దళములు
జనగణమ్ముల నేడిపించ.
నిమ్నవర్గము కందకుండా
ధరలు ధరపై నిలువలేవు.
అంబరమున చుక్కలై అట
వెక్కిరింతల పాలుజేయ
ఉద్యమాలెన్ని జేసిన
ఏమి లాభం లేకపాయె.
***
భూమి కోసం, భుక్తి కోసం
శక్తినంతా కరగదీసి,
ఆవహించిన అలసటంతా
ఛేదించవు అతుకు బతుకుల్
స్వేద కణములు కాంతిధారలు
కంటిపాపల కప్పగించ
పదవి పెదవులు తడి గ్రోలేడు
నక్క జిత్తుల తాపమణచ
పరిష్కారము చూపు వారికి
ప్రణుతి జేసిన ఫలితముండు.
***
దైవమంటూ, దెయ్యమంటూ
దగాకోరులు రెచ్చిపోగ
మనిషి లోపల మానవత్వము
దానవత్వము కౌగిలించగ
దొరల ముసుగున దొంగలెందరో
దేశ సంపద కొల్లగొట్టగ
కులము, మతము కుత్సితాలకు
రెచ్చగొట్టిన మ్లేచ్చులుండ
సహనమెంతో కాలముండదు
రెచ్చిపోదురు ఖచ్చితముగ.
