[dropcap]మం[/dropcap]చు దుప్పటి మేలి ముసుగు
పచ్చని కొండలలోకి నీరై జారుకుంది
గజగజమని వణికించే చలికి
వీడుకోలు చెప్పింది ఆమని ఋతువు
హిమపాతానికి జడిసిన దినకరుడు
నిస్సహాయంగా సాగరంలో ఒదిగిపోయాడు
ఆకాశంలో వెలిగే చంద్రునితో
ఊసుపోక మంతనాలు చేస్తున్నాడు
చంద్రుని అందానికి పరవశమై అతడిని
అందుకోవాలని ఎగసి పడుతున్నాయి తరంగాలు
మోడువారిన చెట్లు చిగురించి
మొగ్గలు వేయగానే మురిసి పోయింది ప్రకృతి
విరబూసిన విరులతో తరువులన్ని
భారంగా వంగిపోయాయి
మదినిండుగా మకరందం నింపుకుని
గర్వముతో మిడిసి పడ్డాయి
అందుకోమని భ్రమరాలను ఆశపెడుతున్నాయి
దరిచేరిన భ్రమరాల తాకిడికి
తాళలేక రెక్కలు విరిగి సొమ్మసిల్లి పోయాయి
అరవిరిసిన పూల మొగ్గలు
లోకమెరుగక వింతగా చూస్తున్నాయి
మధువును నింపుకున్న పూల చుట్టూ
చేరిన చిన్నారి హమ్మింగ్ బర్డ్స్ సందడి చేస్తున్నాయి
తళతళ మెరిసే వెండిమబ్బును చూసి
అసూయతో నల్లమబ్బులు కబళిస్తున్నాయి
కురిసిన వాన చినుకుల ధాటికి
మకరందం కోలుపోయిన
పూలు నేల రాలాయి
రాలిన పూలతో చిట్టి ఉడుతలు
గెంతులువేస్తూ ఆటలాడుకుంటున్నాయి
మామిడిపూలను ఆరగించిన కోయిలమ్మలు
గొంతు సవరించుకుని రాగాలు తీశాయి
