[dropcap]సా[/dropcap]గిపోతున్న కాలప్రవాహాన్ని అక్షరబద్ధం చేసి ముందు తరాలకు అందించ వలసిన బాధ్యతతో చివుకుల శ్రీలక్ష్మి గారు 116 కవులతో 129 అంశాలపై కవితలు వ్రాయించి ‘వచనకావ్య రచనా వేదిక’ ద్వారా పుస్తక రూపంలో తీసుకువచ్చారు. ఆ పుస్తకంలోని ఆరు అధ్యాయాలలోని కవితలపై కోరాడ నరసింహారావు గారు అందిస్తున్న విశ్లేషణలో ఇది మూడవ భాగం. మొదటి భాగం ఇక్కడ, రెండవ భాగం ఇక్కడ చదవవచ్చు.
***
పంచమాధ్యాయ గుణ ప్రశంస
ఏ దేశచరిత్ర చూసినా
యేమున్నది గర్వ కారణం అన్నట్లుగానే
బలహీనుల భుజాలపై … బలవంతులెక్కి స్వారీ చెయ్యటమే చరితం …!
నిర్బంధింపబడ్డవాళ్ళు…
స్వేచ్ఛకోసం చేసే పోరాటాలే అన్నీ ఐతే…మనభారతదేశ స్వేచ్ఛాస్వాతంత్ర్య
పోరాటాలు విలక్షణమైనవి!యివి చరిత్రలో నూతనాధ్యాయానికి తెరతీశాయి
తొమ్మిది దశాబ్దాల
అవిశ్రాన్త పోరాటం ఊపందుకుని…
నలు దిశలనుండీ
కార్చిచ్చులా వ్యాపించి …
ప్రాణాలకు లెక్క చేయని
ఎందరో దేశభక్తుల బలిదానాలతో …
కాలం కర్మం కలిసిరాగా
చివరకు గాంధీజీ అహింస, సత్యాగ్రహాలతో …
ఆంగ్లేయుల కుయుక్తి దేశవిభజనకు దారితీసి…
అఖండభారతం రెండుముక్కలై స్వాతంత్య్రం ప్రకటించుకున్న విషయాలనన్నిటినీ సవివరంగా అందమైన పదాల అక్షరీకరణతో
జాతీయ గీతాలాపనలు,
జెండా రెపరెపలతో సాక్షాత్కరింప జేశారు
భారత స్వాతంత్ర్య పోరాటం
వెంకట స్వామి గారు ….!
యుద్దాల పర్యవసానం… రక్తపాతం, అణచివేత, అరాచకం, అతలాకుతలం యుద్దాలతో సమస్యలెన్నటికీ పరిష్కారంకావు
బలమున్నవాడిదే
రాజ్యమవుతుంది
ఆ బలం నేడు వొకరిదైతే
రేపు మరొకరిదవుతుంది
యిది రావణకాష్టంలా
రాజుకుంటుంది తప్ప
చల్లారదు…ఈసత్యాన్ని గ్రహించిన గాంధీ మార్గానికి యావత్ భారతం మద్దతుపలికి…
అతని వెంట నడవగా…
ఆంగ్లేయుల కుయుక్తులింక పారక…
గాంధీజీ సత్యాగ్రహానికి
తలవంచి ఆంగ్ల ప్రభుత్వం పలాయనం చిత్తగించింది !
మానవేతిహాసానికి
ధ్రువతారగా భారతావని పోరాటం నిలిచింది అంటూ యుద్దాల పరిణామం శీర్షికన సుబోధకం చేశారు
బాలకృష్ణ గారు!
ఏ దేశ చరిత్ర ఎలా వున్నా… నాదేశచరిత్ర
నాకు గర్వకారణం …
ఎన్నెన్ని నెత్తుటి మరకలున్నా నాతల్లి మనసు మీగడ తరకే
అని మన జాతీయ జెండా వినీలాకాశంలో
రెపరెపలాడేటందుకు
దేశవ్యాప్తంగా ధీరోదాత్తులైన దేశభక్తుల రక్తతర్పణలే… ఈదేశచరిత్ర …అంటూ ఆంగ్లేయుల రాక మొదలు
జరిగిన పరిణామాలతో ప్రధానమైన తిరుగుబాట్లను… సంక్షిప్తంగా చక్కని పదచిత్రాలతో అందంగా కవిత్వీకరించి అందించారు నా దేశ చరిత్ర శీర్షికన గౌరునాయుడుగారు!
ప్రపంచాన్ని పరికించి పరిశీలిస్తేనే పరిస్థితులు అవగతమవుతాయి…
పరిష్కారాలకు దారి దొరుకుతుంది
మనలో స్వార్ధం చోటు
చేసుకున్న తరువాత
మనం ఆదినుండీ థియరీల్లో హీరోలమే అయినా ప్రాక్టీకల్స్లో
జీరోలమైపోయాం…
సుస్థిర సమసమాజ నిర్మాణం కోసం మనం పడ్డ చిరకాల తపన స్వరాజ్యం చేకూరే
పిమ్మట తీరే అవకాశం కనిపించింది
ప్రపంచంలోని సోషలిస్టు
కమ్యూనిష్టు విధానాలకు ప్రభావితమై
సంక్షేమ రాజ్య స్థాపన…
అంతరాలులేని
సమసమాజనిర్మాణం
ధ్యేయంగా…
ఆ కలల తీరం చేరే దాకా
ఈపయనం సాగాలి అంటూ భారతదేశంలో సోషలిజం శీర్షికన ఆకాంక్షిస్తున్నారు
సూర్యలక్ష్మిగారు …!
ఎన్ని ముక్కలు,చెక్కలు చేసి విడగొట్టిన మనది అఖండభారతావనియే…
రెండవ ప్రపంచ యుద్దానంతం వరకూ ఆంగ్లేయుల ఆగడాలు సాగినా
వాళ్ళ వేర్పాటువాద చిట్కాలు యిక పనిచెయ్యక… తోకముడిచి పోతూ పోతూ వారు మళ్ళీ పెట్టిన వేర్పాటు చిచ్చు ఆ పరిణామాలు యెంత ప్రభావం చూపినా
పలు పొరుగురాజ్యాలతో సత్సంబంధాలనేర్పరచుకుని అభివృద్ధి పధంలో సాగుతూ…
ప్రపంచదేశాలకే మార్గదర్శకమైనామని ప్రశంసించారు సత్యవతి గారు….!
అరుణాచల్, అస్సాo,
మేఘాలయ, మిజోరo… నాగాల్యాండ్ ,మణిపూర్ లాంటి ఈశాన్య రాష్ట్రాల్లోని చీకటి వెలుగులను
మాదకద్రవ్యాల మత్తు, వివాదాలు, తిరుగుబాట్లు, పొత్తులతో పతనానికి ప్రాణంపోస్తోందంటూ వాపోయారు
ఈశాన్యపు వెలుగు నీడలలో లక్ష్మీ నారాయణ గారు…..!
ఎన్నో యుద్దాలతో
రాటు దేలిన వారు భారతీయులు, వాయుసైన్యాలతో… పటిష్టమైన రక్షణ వలయంగాఏర్పడి
కుల,మత,రాజకీయాల కతీతులై దేశాన్ని
కంటికి రెప్పలా కాపాడుతున్న మన త్రివిధ దళాల ప్రత్యేకతలను సవివరంగా విశ్లేషించి అభినందిస్తూ వీరిని తిరుగులేని త్రివర్ణ పతాక రక్షక త్రిమూర్తులన్నారు
శ్రీనివాసులు గారు ….,!
ప్రణాళికాబద్దమైన విధానాలే ప్రగతికి దోహదపడతాయి
పురోభివృద్ధికి ప్రణాళికలే
పట్టుకొమ్మలు…
అనేక పోరాటాలతో సాదించుకున్న స్వాతంత్య్రం సుస్థిర శాంతి సౌఖ్యాలతో విలసిల్లటం కోసం
పంచవర్ష ప్రణాళికలతో ముందుకు సాగుతూ మంచి ఫలితాలను సాధించి దేశాన్ని ప్రగతిపధంలో నడిపిస్తున్న
మహానుభావులందరికీ వందనాలంటున్నారు ప్రణాళికాభారతంలో…
నాగేంద్రప్రసాద్ గారు….!
దేశం పరతంత్రం నుండి స్వాతంత్రానికొచ్చిందన్న ఆనందం అచిరకాలంలోనే ఆవిరైపోయింది
రాజకీయానికి రంగు మారి స్వార్ధపు తెగులు సోకి
తర తరాల పరిహాసం మళ్ళీ ప్రజాస్వామ్యాన్ని వెక్కిరించింది దగాలూ, దోపిడీలు నిత్యకృత్యమై
వికృత రూపం దాల్చుతున్న
ఈ దుస్థితిని దూరం చేసి ప్రపంచానికి ఆదర్శమయ్యేలా ఆ పూర్వ వైభవాన్ని
తీసుకురమ్మని ప్రార్థిస్తున్నారు ప్రజాస్వామ్య మధుర క్షణాలను తలచుకుంటూ
కే జి వేణుగారు ….!
సృష్ఠి లోనే విశిష్ట ప్రాణిగా ఖ్యాతి గడించిన మానవుడు అక్షరాల వెలుగులో మరింత
మిన్నయైనాడు అంటూ… అక్షరం విప్లవాలకు
బాట వేసింది…
అరాచకాల కోటలు
కుదిపింది అని
అక్షరం యొక్క
గొప్పతనాన్ని చెపుతూ
అక్షరం జాతిని
ప్రగతిపధంలో
వడివడిగా నడిపిస్తుంది అన్నారు
సుబ్బారావు గారు !
మన కళలకు మూలాలు
ఆదిమానవుల
జనపదాలలోనే వున్నాయి వారు అరిచే అరుపులు ,
వేసే అడుగులతోనే
కళాత్మకత రూపు దిద్దుకుంది…
ప్రకృతిసిద్దమైన
సహజ నాద శబ్ద పరికారాల ప్రతిరూపాలే
జంత్ర వాద్యాలు…
అమ్మ పాడిన లాలి పాటలూ జోలపాటలు
శ్రామికుల పనిపాటలు
సంగీత, సాహిత్యాలుగా… రూపుదిద్దుకున్నాయి
వివిధ ప్రాంతాలలో
వివిధ కళారూపాల ఆవిర్భావానికి, వికాసానికీ యివి దోహదపడినాయంటూ.
జానపదగాయకులే
జాతివైతాళికులైనారని విడమర్చి వివరించారు యెల్లభాషలకు తల్లి జానపదంలో
కూర్మారావుగారు !
“వాక్యం రసాత్మకం కావ్యం …
కావ్యేషు నాటకం రమ్యం” అన్నారు…
సంగీత, సాహిత్య, నటనావైశిష్ట్యాలతో ఆకట్టుకుంటుంది
నాటక రంగం దీనికి ముసలితనం రాదు చావులేదు…
యిది అజరామరం !
ఈ జగమే ఒక నాటక రంగం .. మనమంతా పాత్రధారులం
అంటూ
ఆ దేవుని రచన గొప్ప దైతే…
ఈ మనిషి ప్రదర్శన మరీ గొప్పది
వీనుల విందొనరించి మానసికప్రశాంతతను చేకూరుస్తుంది అని కొనియాడారు
లక్ష్మీ ప్రసాద్ బాబు గారు !
కవిత్వం
సాంప్రదాయ పంజరాల్లో అందాలు చిందుతూ చాలాకాలమే గడిపేసింది పెంచుకోగలిగిన
కొందరికే ఆనందాన్ని పంచుతూ…పడమటి చూపుతో నవ్య సాహిత్య పరిషత్తు ఆవిర్భవించి వచనానికి పురుడుపోసింది
కాలానుగుణంగా అనేక మార్పులకు లోనై
అనేకానేక రూపాలతో నేడు విరాజమానమవుతుందంటూ
అందుకు దోహద పడిన వారి నందరినీ పేరు పేరునా
అభినందించారు
వచనం కవితయిన తీరు శీర్షికన
శ్రీరామూర్తి గారు…!
సహనం చచ్చిన వేళ
ఉద్యమం పుట్టుకొస్తుంది సామాజిక ప్రయోజనమే
ద్యేయంగా సామూహిక చైతన్యమే ఉద్యమం
అణచి వేసేకొద్దీ
పైకి లేస్తూనే ఉంటుంది
అనేక ఉద్యమాలకు ఊపిరిలూదింది ఆయా ఉద్యమ సాహిత్యమే…
అక్షరమే ఆయుధమై అడుగేస్తుంది
సాహిత్యమే సైనికుడై పోరాడుతుంది
అంటూ ఉద్యమాల
తీరుతెన్నులను వాటి వైశిష్ట్యాన్నీ వివరించారు శ్యామల గారు !
వ్యక్తులను…ప్రాంతాలను…
చివరకు దేశాలనూ
దగ్గరకు తెచ్చి కలపగల శక్తి
సమాచార రంగానిదే
ప్రాధమిక స్థాయిలో ఈ గురుతర బాధ్యతను పత్రికలు
పోషించాయి పాఠకులను పెంచుకు నరులకు ప్రోత్సాహాన్నందిస్తూ
ఆన్లైన్, వెబ్ పత్రికల స్థాయికి ఎదిగింది సమాచార వ్యవస్థ
వందేళ్లలో రాని మార్పులు యిరవయ్యేళ్లలో వచ్చాయంటూ
సమాచార రంగాన్ని
విపులంగా సమీక్షించి విస్తృత విషయ పరిచయం చేశారు రాజేంద్ర ప్రసాదవర్మగారు!
సింధు నాగరికతతో
నవీనీకరణలో ముందడుగు వేసిన భారత దేశం
మొఘల్ చక్రవర్తుల
మహా కట్టడాలు
కళా ఖండాలకు ఊపిరిలూదింది
ఆంగ్లేయుల పాలనలో ఈ నవీనీకరణ మరింత ముందంజ వేసి అన్ని రంగాలలో తన ప్రత్యేకతను చాటుకున్నప్పటికీ యిదంతా మన సుఖం కోసం కాదని వారి స్వార్దానికని అర్ధమైన తరువాత స్వరాజ్య స్థాపనతో స్వీయ పాలనలో వ్యవస్థలన్నింటినీ మెరుగు పరచి అభివృద్ధిలో
వున్న స్థితి నుండి ఉన్నత స్థితికి దూసుకు వెళుతోంది భారత్ అంటూ జయ జయధ్వానాలు పలికారు
లక్ష్మణరావు గారు …!
అన్నిరంగాలనూ
అభివృద్ధి చెందించిన ఆధునికత
విద్య,వైద్య,ఉద్యోగ రంగాలలో విప్లవాత్మకమార్పులను
తీసుకు వచ్చింది …
భౌతికాభివృద్ధితో పాటు మానసిక ఆందోళన, అశాంతి ,వత్తిడుల
ముళ్ళ పరుపులను గూడా పరిచిందంటూ ఆధునికత అన్నిరంగాలలోనూ కలిగించిన లాభ నష్టాలను వివరిస్తూ
ఏది ఏమైనా కాలాన్నీ దూరాన్నీ జయించి
ప్రపంచాన్ని పోకెట్లోకి
తెచ్చేసిందంటూ ఆధునికతకు జోహార్లన్నారు అమ్మాజీ గారు !
ఇంతై, అంతై, వటుడoత అన్నట్టుగా
ఈ ఆధునికతను ఎంత పొగిడినా కొంత మిగిలే ఉంటుంది
యిది అభివృద్ధికి ఎంత దోహద పడిందో
అవినీతికి అంత తోడ్పాటునందించింది
ఆర్ధికనేరాలకు, మోసాలకు అవకాశాన్నిచ్చింది
లాభనష్టాల సమాహారమై హద్దులను చెరిపేసి విస్తృతంగా విస్తరించి
అన్నిరంగాలనూ పరుగులు తీయిస్తుందని
రంగుల హంగులతో ఆధునికత పేరిట ఆధునికతను
అభివర్ణించారు నారంశెట్టివారు …!
