[dropcap]ప్ర[/dropcap]కృతి ఒడిలో పెరిగాము
పొలం బడిలో చదివాము
ఈ నేలే మా పలక
ఈ నాగలే మా బలపం
తల్లిదండ్రీ, గురువు, దైవం
సర్వం తానై నిలిచెను పుడమి ॥ప్రకృతి॥
అరక దున్నడమే అ… అ…
‘అ’ అంటే అన్నం
ఆకు పొయ్యడమే ఆ… ఆ…
అన్నం పెట్టి ఆకలి తీర్చే
ఈ భూమాతంటే భుక్తి, భక్తి ॥ప్రకృతి॥
కారు మబ్బులను పిలిచాము
కాడి ఎడ్లనే నమ్మాము
ఈ ధాన్యపు గింజలలోనే
ధనాల రాశులు చూసాము ॥ప్రకృతి॥
నారు వెయ్యడం తెలుసు
నీరు పొయ్యడం తెలుసు
నమ్ముకున్న ఈ మట్టిలో
మణులు ఏరడం తెలుసు ॥ప్రకృతి॥
శ్రమలో సుఖాన్ని చూసాము
స్వేదం ధారవోశాము
చెమట చుక్కే జయ్యపు గింజై
కడుపుకు చల్లని గంజయ్యింది ॥ప్రకృతి॥
కొత్త వంగడా లేశాము
అధిక దిగుబడిని పొందాము
వివేకంతో విజ్ఞానాన్ని
ప్రపంచానికే పంచాము ॥ప్రకృతి॥
