[box type=’note’ fontsize=’16’] విలువలున్న మానవజాతికీ, క్షుద్రశక్తులున్న మాంత్రికులకీ…. అంటే మంచికి చెడుకి మధ్య జరిగే పోరాటాన్ని ఒక స్పేస్ ఒపెరా ఫాంటసీ సైన్స్ ఫిక్షన్ నవలగా అందిస్తున్నారు డా. చిత్తర్వు మధు. తెలుగు సేత: కొల్లూరి సోమ శంకర్. [/box]

అధ్యాయం 22: ” బ్లాక్‌మెయిల్”

[dropcap]ని[/dropcap]శ్శబ్దం.

గొర్రెలను వధించే ముందు ఉండే నిశ్శబ్దం కాదది.

వధించడానికి ముందుగా వేటాడే జంతువుల వంటి గ్రహాంతర దుష్ట జీవులు పాటించే నిశ్శబ్దం కాదది.

చంద్రుడి ప్రకృతిదృశ్యం యొక్క నిశ్శబ్దం.

లా దెర్నియర్ స్టేషన్ వద్ద.

వాతావరణంలో శూన్యం ఉంది.

కాబట్టి ధ్వని లేదు.

తుఫాను మరియు రాళ్ళ వర్షం ఆగిపోయాయి. ఉధృతంగా వీచిన గాలి… విశ్వశక్తిని ఉపయోగించి ఆ వంచక దుష్ట గ్రహాంతర జీవులు సృష్టించిన భ్రమ అని నేను బలంగా విశ్వసిస్తున్నాను.

ఆ వంచకులు అణువులు, ప్రోటాన్లు, ఎలెక్ట్రాన్లు, బోసన్స్… ఇలా దేన్నైనా మాయచేయగలరు.

లేకుంటే, ధ్వని ఎక్కడ నుండి వస్తుంది?

కుజగ్రహ వృద్ధ తాంత్రిక చక్రవర్తికి సహాయపడుతున్న ఆల్ఫా వ్యవస్థ మాంత్రికులు కొంతసేపు మౌనంగా ఉన్నారు.

“డోనాక్స్?” సమూరా అరిచాడు.

“క్స్..క్స్ క్స్ …” ఆల్ఫా వ్యవస్థ మాంత్రికులు ఉడతల్లా అరిచారు.

అప్పుడు మానవ స్వరం వినబడింది.

“అవును! నా పెద్దమెదడుని వెతుకుతుంటే హిమోగ్లోబిన్ కంటే ఎక్కువ ఆక్సిజన్ తీసుకునే అణువు అది అనీ, గరిష్టంగా రెండు గంటలపాటు కణజాలాలకు ఆక్సిజన్ అందిస్తుందనీ తెలుస్తోంది. డోనాక్స్ అనేది కుజగ్రహం మీది మానవ కాలనీకి చెందిన అరుణ భూముల సామ్రాజ్యపు డ్రగ్ అథారిటీ వారి అనుమతి పొందిన – అనాక్సియాకు విరుగుడు మందు. అవును, వాళ్ళు చనిపోరు. కానీ మేము హనీని చంపాలని అనుకోవడం లేదు. మిగతావాళ్ళంతా మాకు నిరుపయోగం. వాళ్ళంతా సామాన్ల లాంటి వారు. వాళ్ళనీ మనతో తీసుకుపోదాం. బ్రతికినంత కాలం బ్రతుకుతారు.”

సమూరా తన చేతులను ఊపాడు.

వెనుతిరిగి ఉన్న గబ్బిలంలా వికటంగా నవ్వింది సయోనీ.

నవ్వుతో తల కదిలిపోతుంటే, కృశించిన రొమ్ములతో ఆమె ఛాతీ ఎగిసిపడుతోంది.

ఇంతలో భుంమనే ధ్వని వినిపించింది, ఓ మెరుపు కనిపించింది.

“హనీ ఆమ్రపాలి… రా…  హాస్యగాళ్ళ లాంటి నీ తోటి గ్రహాంతర తాంత్రిక మిత్రులనూ తీసుకుని రా… స్వచ్ఛమైన, నిస్వార్థమైన మాంత్రికుడికే ఆ అద్దం కనబడుతుందని మా పుస్తకం చెబుతోంది. రా! మనం అక్కడికి వెళ్ళడానికి వాహనం ఉంది. నీతో అవసరం పడింది…”

ఒక క్షణంలో నేను చాలా ధృఢమైన నైలాన్ తాళ్ళతో కట్టబడి ఉన్నాను. మరో క్షణంలో ఒక పెద్ద రైలు బోగీ పరిమాణంలో ఉన్న స్పేస్ క్రాఫ్ట్ ముందు పడ్డాను.

మిగతావాళ్ళు కూడా వచ్చి గట్టి శబ్దంతో నా పక్కనే నేల మీద పడ్డారు. ఆ విసురుకి మేమంతా లేచి నిలబడ్డాం.

“లోపలికి పదండి!” ఆల్ఫా వ్యవస్థకి చెందిన మరో గ్రహాంతరవాసి అన్నాడు, బహుశా స్పేస్ క్రాఫ్ట్ సిబ్బందిలో ఒకరై ఉంటాడు.

కేవలం నడవడానికి వీలుగా తాళ్ళతో కట్టి ఉన్న పాదాలతో అడ్డదిడ్డంగా నడుస్తూ నేను అక్కడున్న కాబిన్‌లోకి ప్రవేశించాను.

మిగతావాళ్ళని లోపలికి తోశారు. అమ్మయ్య… ఆ క్యాబిన్‌లో ఆక్సీజన్, గురుత్వాకర్షణ మరియు చల్లని వాతావరణం ఉన్నాయి. నేను ఒక బంకర్ మీద కూర్చున్నాను, ప్రకృతిని నా పక్కన కూర్చోబెట్టారు. అది రెండు వైపులా బంకర్ లాంటి సీట్లు ఉన్న సైనిక రవాణా విమానంలా ఉంది. ఒకరి తరువాత ఒకరుగా వాన్ కు జాక్, చాంద్, డిమిట్రీ – చివరగా బుసలుకొడుతున్న ఏనిమాయిడ్ లోపలికి ప్రవేశించారు.

అప్పుడు క్యాబిన్ చివరలో సమూరా కనిపించాడు. వికారమైన రూపంతో సయోనీ అతని పక్కనే ఉంది.

“హలో! ప్రభూ! నా త్రాళ్లను విప్పదీయచ్చు కదా? మీ ఆల్ఫా వ్యవస్థ మిత్రులతో మీకా పిచ్చి అద్దం దొరకలేదా? గెలాక్సీని లేదా కనీసం గ్రహాలను జయించటానికి ఆ అద్దం ఎలా సహాయం చేస్తుందో చెప్పండి? మళ్ళీ నేనే ఎందుకు? చంద్రుడి చీకటి వైపున మీరు వెండి కొవ్వొత్తిని కోల్పోయారని నాకు తెలుసు” అన్నాను.

“తాళ్ళు విప్పండి! విప్పండి!” అంటూ నా బృంద సభ్యులందరూ అరిచారు. ప్రకృతి స్వరం ఒక పిచ్చుక గొంతులా ఉంటే, ఏనిమాయిడ్ స్వరం ఎద్దు రంకెలా ఉంది.

“నోరుముయ్యి! నువ్వో గుంటనక్కవి! ఇక్కడికి ఎందుకు వచ్చావు? నాకంతా తెలుసు! భూమి మీద నాకు గూఢచారులున్నారు. న్యూ హోప్ నగరంలో ఈ పథకాన్ని రచించి మిమ్మల్ని ఇక్కడికి పంపారని నాకు తెలుసు! మీరు నన్ను చంపడానికి వచ్చారు! కానీ ఓ విషయం గుర్తుంచుకో – నాకు చావులేదు, నేను శాశ్వతంగా ఉంటాను. చంద్రుడు, టైటాన్, గనీమేడ్ మీద దాచి ఉంచిన అన్ని అద్భుత వస్తువులను పొందుతాను. ఇప్పుడు నాకు ఆల్ఫా వ్యవస్థకి చెందిన అదృశ్య మాంత్రిక సైన్యం సహాయపడుతోంది. కాస్త కష్టమయింది… కానీ చంద్రుడి చీకటి వైపున ఉన్న ఆ దౌర్భాగ్యపు నేరస్తులు.. అఘోరా అఘోరీలను చంపాం… వెండి కొవ్వొత్తి నాకు తిరిగి లభించింది. దాని సహాయంతోనే మేము మళ్ళీ ఇక్కడ మీ జాడలు గుర్తించాము. నేను మళ్ళీ నా అరుణ భూములను జయించి, ఆ పాత కుక్క మీరోస్‌ని చంపి, వాడి కళ్ళను పెకిలిస్తాను. అప్పుడు ఏమి జరుగుతుందో నువ్వు ఊహించలేవు.

ఒకసారి నేను అరుణ భూముల సింహాసనం అధిష్టించాకా, సౌర వ్యవస్థలోని వివిధ గ్రహాలకు చెందిన, అనూహ్యమైన శక్తులున్న నా రహస్య అనుచరులందరూ విరుచుకుపడతారు!

వారు తమ ప్రభుత్వాలను, సైన్యాన్ని, శాస్త్రవేత్తలను పట్టుకుంటారు. భూమి, చంద్రుడు, టైటాన్, గనీమీడ్, ఇంకా దుర్బలుడైన కాన్‌స్టాన్‌టైన్ పాలిస్తున్న కుజగ్రహపు మానవ కాలనీ… ఇవన్నీ ఓ భయానక కాళరాత్రిని అనుభవిస్తాయి….

మీరు వాళ్ళ శక్తులను ఊహించలేరు…. నా స్లీపర్ సెల్స్ యొక్క శక్తులు… వారు అగ్నిని సృష్టించగలరు, నీటిని నియంత్రించగలరు, ఆకాశాన్ని విచ్ఛిన్నం చేయగలరు, భూమి మీద రంధ్రాలు చేయగలరు, వాయువుతో ఆడగలరు! సాధారణ మానవులచే నివసించే గ్రహాలన్నీ నా అనుచరుల ఆధీనంలోకి వస్తాయి. విశ్వశక్తి యొక్క అనుచరులు …

వాళ్ళందరినీ నేను కుజగ్రహం మీది అరుణ భూముల నుండి నియంత్రిస్తాను.

వృద్ధాప్యం, చావు సమీపిస్తుండడంతో నేను మొదట అమరత్వం కోరుకున్నాను. కానీ, ఓ ధూర్త మానవా! అమృత ఔషధం త్రాగితే శక్తులు కోల్పోతానని చెప్పకుండా నువ్వు నన్ను మోసం చేశావు. ఒరే కుక్కా… నీ దుష్ట భార్య నా కుమార్తెని చంపింది. నేను ఆల్ఫా వ్యవస్థ లోని అఘోరా సమూహాన్ని ఎలా బుజ్జగించానో, ఎలా ప్రార్థించానో ఆ అంగారకుడికే తెలుసు! ఆల్ఫా వ్యవస్థ లోని  ‘కెప్లర్ బి’ లోని గుహలలో నివసించే అఘోరాలు ఆమెను పునరుజ్జీవనం చేయడంలో నాకు సహాయం చేశారు

నేను అమరుడిని. దాచబడిన ఆరు అద్భుత వస్తువులు చేజిక్కించుకోవాలని అనుకుంటున్నాను. తద్వారా – నా అనుచర గణాలను, నా సైన్యాన్ని నియంత్రిస్తాను.”

“అవును అవును. సమూరా!” అన్నాను. “కుజ గ్రహ మాంత్రిక చక్రవర్తి…. కాని నేను మిమ్మల్ని చంపుతాను. మీరు గొప్ప మాంత్రికులే అయినా మీరు దుష్టులు. మీరు నా తల్లిదండ్రుల్ని హతమార్చారు. ఇప్పుడు మీరు తీవ్రవాదంతో సౌర వ్యవస్థ యొక్క గ్రహాల నాగరికతని నాశనం చేసి వాటిని ఆక్రమించుకోవాలని అనుకుంటున్నారు. కాబట్టి అద్భుత వస్తువులు గురించి మర్చిపొండి. మా చేతుల్లో మీ మరణం కోసం వేచి ఉండండి! ఈ వెర్రి గ్రహాంతర అస్థిపంజరాలనే మీరు మాంత్రికులుగా భావిస్తే… ఇక్కడ నా భార్య ప్రకృతి, కుజ గ్రహానికి చెందిన వాన్ కు జాక్, చంద్ర గ్రహానికి చెందిన శక్తివంతమైన చాంద్ మరియు పశుశక్తి ఎక్కువ ఉన్న ఏనిమాయిడ్… ఇంకా గొప్ప మాంత్రికులు. నేను ప్రతీకారం కొరకు వచ్చాను. మిమ్మల్ని చంపేస్తాను… ఇది నా వాగ్దానం!” అన్నాను.

నేనిలా అంటూండగానే నా శరీరం మొత్తం ఎరుపు రంగులోకి మారిపోయింది. నైలాన్ తాళ్ళు నిశ్శబ్దంగా కాలిపోయాయి. భూమి యొక్క ఎవరెస్ట్ పర్వతమంత శక్తిని కలిగి ఉన్నానని భావించాను. నా చేతులు భారీగా మారాయి, ఒక్క దెబ్బతో నేను వెయ్యి టన్నుల శక్తిని వెదజల్లగలను. నా కళ్ళ నుంచి ఓ లేజర్ కిరణం వెళ్ళి సమూరా పొడవాటి పుర్రెకు నేరుగా తాకి ఎర్రటి మెరుస్తున్న రంగులో వెనక్కి వచ్చింది.

సమూరా మూలిగాడు. తన దుర్బలమైన చేతిని విసిరాడు.

అతను చావడని గుర్తొచ్చింది.

పొడగరులైన ఆల్ఫా వ్యవస్థ గ్రహాంతర మాంత్రికులు వారి విచిత్రమైన భాషలో కీచుమనే స్వరంలో అరుస్తూ మాకేసి చేతులు ఊపారు. ఒక ఎరుపు జ్వాల గుండ్రంగా సుడులు తిరుగుతూ వచ్చి నా ముఖం మీద, ప్రకృతి మొహం మీద తగిలింది.

నా జీవితంలోకెల్లా అత్యంత ఎక్కువగా పీడించిన బాధను అనుభవించాను. నా మొత్తం ముఖాన్ని నిప్పులలో వేయిస్తున్నట్టుగా ఉంది.

శక్తినంతా కూడదీసుకుని ‘అన్నిహిలాటియో టొటాలిస్…’ అనే మంత్రాన్ని ఉచ్చరించబోయాను. ఇంతలో ఒక చెయ్యి నా భుజం మీద పడింది.

ప్రకృతి అంది, “హనీ, ఈ స్పేస్‌క్రాఫ్ట్ కాలిపోతుంది. దయచేసి నియంత్రించుకో…”

నేను సగంలో ఆపేశాను, మంత్రంలోని ‘మోర్టాలిస్..’ అనే మాట నా నోట్లోంచి బయటకు రాలేదు…  నా గొంతు బలహీనపడింది, నా ముఖం కాలింది.

అప్పుడు ఆ ఎరుపు జ్వాలలు వాన్ కు జాక్, చాంద్‌ని తాకాయి. వారు గట్టిగా అరిచి పడిపోయారు. డిమిట్రి దాదాపుగా తన పూర్తి శక్తిని సంతరించుకుని, పైకి లేచి నిలబడింది. ఆమెది దట్టమైన మెరిసే చర్మం. ఆమె టైటాన్‌లో తయారుచేసిన గట్టి దుస్తులను ధరించి ఉంది. ఆమె తలమీది కొమ్ముల నుంచి నిప్పురవ్వలు బయటికి వచ్చాయి.

ఆమె ఆల్ఫా వ్యవస్థకి చెందిన ఆ ఇద్దరు దుష్ట మాంత్రికుల వైపు రెండు వేళ్లు చూపిస్తూ, టైటానియన్ భాషలో ఒక శాపం పలికింది.

ఒక మెరుపు వెళ్ళి – సాగి ఉన్న తలలలోని మెదడు కనిపించే ఆ దుష్ట మాంత్రికుల పుర్రెలను తాకింది. వారి కళ్ళు పైకి తేలాయి, మెదడు యొక్క సలకై, గైరై… రాత్రి ఆకాశంలోని మెరుపుల్లా కనబడ్డాయి.

అప్పుడు వాళ్ళు ఒక నిమిషం కదలకుండా ఉన్నారు.

సయోని మా వైపు తల ఉండేలా తిరిగింది. గట్టిగా కేక పెట్టింది, కానీ ఆమె చేతులు వెనుక వైపు ఉన్నాయి.

ఇది దుష్ట మాంత్రిక శక్తి యొక్క భయానక ప్రదర్శన! హాస్యంగా ఉన్నా భీతిగొల్పేది.

“ఆపు డిమిట్రీ! ఆపు! ఆపేయ్.. మేము ఇక్కడ పోరాడకూడదు! మేము ఆక్సిజన్ లేకుండా జీవించము. మాట్లాడుకుందాం” అంది ప్రకృతి.

అప్పుడు నిశ్శబ్దం.

చిన్నగా టిక్ టిక్ టిక్… అడుగుల శబ్దం వినబడింది.

“అమ్మయ్య! మాస్టర్. నేనొచ్చేసా… ఆలస్యమైంది. మొత్తానికి నేను మిమ్మల్ని కనుగొన్నాను. కానీ నాకు ఛార్జింగ్ తక్కువగా ఉంది” అన్న మాటలు వినిపించాయి.

ఇంకెవరు? అన్నీ తెలిసిన యురేకస్.. లోహపు మనిషి.

అది నేరుగా ఒక గోడ మీద ఉన్న ప్యానెల్ వద్దకు వెళ్లింది. వెంటనే విద్యుత్ ప్లగ్ అవుట్‌లెట్‍లో ఒక మెటల్ రాడ్‌ని ఉంచింది. దాని యాంటెన్నా నుండి చాలా తక్కువ కాంతిలో మెరుపులు వస్తున్నాయి.

మెరుపులు, మంటలను వెదజల్లుకుంటున్న ఈ గొడవనంతా సమూరా మూర్ఖంగా, బలహీనంగా చూస్తుండిపోయాడు.

అకస్మాత్తుగా సమూరా నిటారుగా నిలబడ్డాడు. అతని కళ్ళు ఒక అద్భుతమైన ఎరుపురంగులో ప్రకాశించాయి. ఫ్రంట్ కాబిన్ నుండి అప్పుడే వచ్చి అక్కడ నిలబడ్డ ఒక పైలట్‌కేసి చేయి ఊపాడు.

“ఇంటర్ గెలాక్టిక్ మానిటర్ ఆన్ చేయండి. త్వరగా.”

“కానీ ప్రభూ! ఇక్కడ అగ్ని పోరాటం వద్దు. స్పేస్‌క్రాఫ్ట్ పేలిపోతుంది.”

“అవును, అవును! నాకు తెలుసు. మేము ఆపేశాం. ఇక ఇక్కడ పోరాడటానికి విశ్వశక్తిని ఉపయోగించం. కానీ మానవా! హనీ నువ్వు మాతో సహకరించాలి. తప్పదు.”

“నీ ఇష్టం వచ్చినట్టు చేసుకో” అని అరవబోతుండగా… కాబిన్ యొక్క రెండు మూలలలోనూ ఉన్న మానిటర్లపై బొమ్మలు ప్రత్యక్షమై వాటిలో కదలిక వచ్చింది.

చిత్రాలు మొట్టమొదట అస్పష్టంగా ఉన్నాయి. తర్వాత స్పష్టంగా కనిపించసాగాయి.

ఎంత స్పష్టంగా ఉన్నాయంటే ప్రకృతి ఆ బొమ్మలను సులువుగా గుర్తించి, ఓ భయంకరమైన కేక పెట్టేంత.

భారతీయ గ్రామస్థులు ధరించే దుస్తులను ధరించి, ఎర్ర తలపాగాతో ఉన్న ఒక వృద్ధుడిని ఇద్దరు ముసుగు వ్యక్తులు పట్టుకుని ఉన్నారు, వాళ్ళ చేతుల్లో రెండు లేజర్ తుపాకులు ఉన్నాయి.

ఆ గ్రామీణుడు భీతి చెందిన కళ్ళతో కెమెరాలోకి చూస్తున్నాడు.

“అమ్మా! నా ప్రియమైన ప్రకృతీ, హనీ! మీరు దీనిని చూస్తుంటే, నా గురించి చింతించకండి. వాటిని చంపి, ఏం చేస్తారో చేసుకోనివ్వండి. మీరు ఏం చేయాలనుకుంటే అది చేయండి. ఇక్కడ మమ్మల్ని ఎందుకు బంధించారో అర్థమవుతోంది. నా తల తీసేసినా మీరు పట్టించుకోకండి!”

ఆయన మహా. ప్రకృతి వాళ్ళ నాన్న. ప్రకృతి వెక్కి వెక్కి ఏడుస్తోంది.

“ఆ… పం… డి…” అంటూ అరిచింది. ఆమె కళ్ళలోంచి ఒక ఎరుపు లేజర్ కిరణం వెళ్ళి సమూరా ఛాతిలో తగిలింది. అతను కొద్దిగా వెనక్కితగ్గి గట్టిగా నవ్వాడు.

“ఈ విషయంలో నీ భర్తకు ధన్యవాదాలు చెప్పుకోవాలి. నాకు మరణం లేదు. లేకుంటే భూమికి చెందిన అత్యంత శక్తివంతమైన మహిళ నుండి వెలువడిన మృత్యు కిరణం దెబ్బకి నా గుండె ఆగిపోయి ఉండేది. హా! హా! హ!” అంటూ నవ్వాడు సమూరా. అప్పుడు అతను తన గొంతును సవరించుకుని అరిచాడు.

“అమ్రాపాలికి చెందిన వ్యర్థమైన, నిరుపయోగమైన స్త్రీవి నువ్వు! యువరాణి సయోనికి ఒక పనిమనిషిగా ఉండవలసినదానికి, ఆమె పాదాలను బంగారు పళ్ళెంలో కడిగవలసినదానివి! మీరు ఆమెను చంపివేసారు. ఇప్పుడు నీ భర్త… ఈ కుక్కను మాకు సహకరించమను. అద్దం పొందడానికి మాకు సహాయం చేయమని చెప్పు. లేదంటే క్షణాల్లో మీ తండ్రి తల మొండెం నుండి వేరవుతుంది. హా! హా!” అంటూ నవ్వాడు. “నా ఆదేశం అక్కడికి చేరుకోవడానికి ఒక నిమిషం మాత్రమే పడుతుంది. ఇది చంద్రగ్రహం. ఇక్కడ నుండి భూమి కేవలం 10 లక్షల కిలోమీటర్లు మాత్రమే. హా! హా! హా! నీకు మీ నాన్నంటే ఇష్టం లేదు? నువ్వు కృతజ్ఞత లేనిదానివా? నువ్వు అతని మేనకోడలు అయినప్పటికీ నిన్ను స్వంత కుమార్తెగా పెంచినందుకు ఇదేనా నువ్వు అతనికిచ్చే ప్రతిఫలం?” అన్నాడు సమూరా.

ప్రకృతి కోపంతో గర్జించింది.

“లేదు, లేదు లేదు. హనీ సహాయం చేస్తాడు! నేను కూడా సహాయం చేస్తాను! ఎట్టి పరిస్థితులోనూ మీరు ఆ అద్దం పొందుతారు. ముందు మా నాన్నని వదిలేయండి. దయచూపండి!”

నాకంతా అర్థమైంది. “సరే చక్రవర్తి. మీరే మళ్ళీ గెలిచారు. నాకా అద్దం నిజంగా కనబడితే… అది మీదే! నేను మీ పుస్తకాలలో ఎంపిక చేసినవాడను. ధన్యవాదాలు. మహాని వదిలిపెట్టి, అద్దం ఎక్కడ ఉందో నాకు దారి..” అన్నాను.

సమూరా తన చేతులను రుద్దుకుని, ఒక దీర్ఘ శ్వాస తీసుకున్నాడు. నిర్జనమైన అడవిలో వంద హైనాలు అరిచినట్టుగా నవ్వాడు.

“యో! హో! బయల్దేరండి!”

మానిటర్ మీద చిత్రం మసకబారింది.

స్పేస్ షిప్ ఇంజన్లు కూడా గర్జించాయి. మేము ఒక ఊపుతో గాలిలోకి లేచాం.

***

అధ్యాయం 23: సౌర ఫలకాలు

బ్లాక్‌మెయిల్. కుట్ర. హత్య. అధికార దాహం.

అనేక యుగాలుగా దుష్టుల లక్షణాలు ఇవే. అతను బ్లాక్‌మెయిల్ చేశాడు. ధృవీకరించుకోడానికి నాకు సమయం లేదు.

ధృవీకరించుకోవాలంటే, అది యురేకస్‌తోనే సాధ్యమయ్యేది, దాన్ని ప్లగ్ తీసేసి, ఛార్జింగ్ లేకుండా చేసి, స్పేస్‌క్రాఫ్ట్‌లో ఓ మూలగా విసిరేశారు. ఆ చిత్రం నిజమైనదో లేదా కల్పితమైనదో యురేకస్ ఇట్టే చెప్పేసేది.

భూగోళంపై నాల్గవ సహస్రాబ్దిలో మాయలు, మంత్రాలు సాధనచేసే అనుచరుల నెట్‌వర్క్ సమూరాకి ఉందనేది స్పష్టమవుతుంది.

అక్కడే కాదు, ప్రతిచోటా ఉంది.

వారు ఐజి నెట్‌లో యూట్యూబ్‌ ద్వారా ఒక చిత్రాన్ని ప్రసారం చేయగలరు, దాన్ని అంతర్జాతీయంగా పోస్ట్ చేసుకోవచ్చు.

ఒకనాటి పాత తీవ్రవాద సంస్థల్లాగే.

కానీ అది ఒక బుకాయింపు కావచ్చుగా?

భూమి యొక్క దక్షిణార్ధగోళంలోని ఒక మారుమూల గ్రామం ఆమ్రపాలి నుంచి ఒకరు చంద్రుడి చీకటి వైపు అంచులో ఉన్న లా దెర్నియర్ స్టేషన్ వద్దకి ఒక చిత్రాన్ని పంపించగలరా?

సమాధానాలను కనుగొనడానికి నా మనస్సు వేగంగా పరుగెలెత్తింది.

ఇది గెలాక్సీ మెసెంజర్ ఉపగ్రహ నెట్‌వర్క్ ద్వారా సాధ్యమే.

పైగా చంద్రుడు చాలా దగ్గరగా ఉన్నాడు.

సందేశం, చిత్రం చాలా స్పష్టంగా వచ్చాయి. కుజగ్రహానికి 25 నిమిషాల సమయం తీసుకుంటే, చంద్రుడికి పైకి రావడానికి 10 నిమిషాలు మాత్రమే పట్టింది.

కాబట్టి తలలు సాగి ఉన్న ఆల్ఫా వ్యవస్థకి చెందిన మాంత్రికుల సాయం తీసుకుంటున్న తాంత్రిక చక్రవర్తిని ఎదుర్కోడం కష్టం.

చూద్దాం, అతను మమ్మల్ని ఎక్కడికి తీసుకెళ్తాడో?

ఒక గంటలో అంతరిక్ష నౌక చంద్రుడి చుట్టూ ఉన్న కక్ష్యలోకి ప్రవేశించింది.

“మనం చంద్రుడి చుట్టూ తిరుగుతున్నాము. హా! హా! హా!” అంటూ ప్రకటించాడు సమూరా. త్వరలో మేం సౌర ఫలకల వ్యవస్థను చేరుకుంటాం, ఇది సూర్యుడి నుండి శక్తిని గ్రహించి, చంద్ర కాలనీలకు శక్తిని పంపుతుంది.

నా మనసులో మెరుపులాంటి ఒక ఆలోచన స్ఫురించింది. నేను ప్రకృతి కేసి చూశాను.

ప్రకృతి నన్ను చూసింది.

ఆమె ముఖం ఎర్రగా ఉంది, కొంతకాలం వరకూ మెరిసిపోతూండేది. ఇప్పుడు పేలవంగా, నీరసంగా ఉంది.

“ఆ అద్దం సౌర ఫలకాలలో దాచబడి ఉంటే?” గట్టిగా అన్నాను.

“ఎలా… అయినా వాళ్ళెందుకు అక్కడే దాచవచ్చు?” అంది ప్రకృతి.

“అంతే! కక్ష్యలో సౌర ఫలకాలలో…!” అరిచింది డిమిట్రీ.

వాన్ కు జాక్, చాంద్ నిలుచున్నారు. మేమంతా కిటికీలోంచి బయటకి చూశాం.

నల్లటి ఆకాశం నేపథ్యంలో దాదాపు 50 కిలోమీటర్ల పొడవున్న ఓ మెరిసే వేదికను ఏర్పాటు చేశారు. వెండి రంగులో మెరిసిపోతూ నల్లటి ఆకాశం, మినుకుమనే నక్షత్రాలు, సుదూరంగా నీలం, బూడిద రంగులో సగం నెలవంక ఆకారంలో భూమి… ఈ నేపథ్యంలో ఆ వేదిక శూన్యంలో తేలుతోంది. మాకు దిగువన చంద్రుడు చిన్నగా కనబడుతున్నాడు, మసూచికపు మచ్చల్లా బిలాలు!

అవి చంద్రుని చుట్టూ కక్ష్యలో తిరిగే సౌర ఫలకాలు. అవి సూర్యుడి నుండి శక్తిని గ్రహించి, చంద్రుని సమీపంలోని విద్యుత్ కేంద్రాలకు సరఫరా చేస్తాయి. ఇది చంద్రుడిపై కాలనీలకు శక్తి వనరు మాత్రమే కాదు, కానీ చాలా ఉపయోగకరమైనది. 15 రోజుల పాటు ఉండే సుదీర్ఘమైన రాత్రి గడవడానికి, చంద్ర కాలనీలకు భారీ స్థాయిలో శక్తి అవసరం అవుతుంది. యాభై శాతం శక్తి ఇక్కడ నుండి సరఫరా చేయబడుతుంది.

నాల్గవ సహస్రాబ్దిలో సౌర వ్యవస్థ యొక్క అద్భుతం.

నా మనసును చదివినట్లుగా సమూరా అరిచాడు.

“అవును, హనీ! చాలా స్వచ్ఛమైన, అమాయకమైన మాంత్రికుడివి నువ్వు! నువ్వు బయటకు వెళ్లి, చుట్టూ నడిచి… మా కోసం  సౌర ఫలకాలను శోధించి, అద్దం తీసుకురావాలి. ఒక చిన్న స్పేస్ వాక్ నీ ఆరోగ్యానికి మంచిదే. కాదంటావా?”

నాకు నవ్వు రాలేదు.

“ఇతనికేమైనా పిచ్చా?” అనుకున్నాను. “ఏదైనా అంతుచిక్కని అంతరిక్ష రోగంతో బాధపడుతున్నాడా? ఏ పురాతన మాంత్రిక సంఘమైనా ఎన్నో ప్రదేశాలని వదిలి ‘ఇక్కడ’ ఎందుకు దాస్తుంది?

“మేము చంద్రుడి మీది బిలాలు, గుంతలు, పర్వతాలు అన్నీ వెతికాం. కానీ ఎక్కడా అది మాకు దొరకలేదు. నా ఆల్ఫా వ్యవస్థ స్నేహితులు – దాన్ని చూడలేకపోయినా దాని రేడియేషన్‌ని అంచనా వేయగలరు. హా! హా! ఎందుకంటే. వారు నిజంగా నీ అంత స్వచ్ఛమైన మాంత్రికులు కాదు…  కానీ వాళ్ళిక్కడ ఒక అత్యంత ముఖ్యమైన ఫోర్స్ స్థాయిలను కనుగొన్నారు!” అన్నాడు సమూరా.

“ఇది ఉన్మాదం!” అన్నాను. “ఇది పైకప్పు పలకలతో కూడిన ఒక కక్ష్య స్టేషన్. వాటి మీద నేను అంతరిక్షంలో ఎలా నడుస్తాను?” అన్నాను.

“నీకు తెలుసా, నువ్వు ఇతరులను నడిపించే గొప్ప మాంత్రికుడివి. చింతించద్దు! మా ఓడతో నిన్ను కలిపే ఒక కేబుల్ ఉంటుంది. పైగా నువ్వు తిరిగి రావాలని కోరుకునే నీ ప్రేయసి ఇక్కడే ఉంటుంది… ఈ ముగ్గురు మూర్ఖులని తీసుకుని వెళ్ళి, మాకు ‘లా గ్లాస్ డి కమ్యూనికేషన్ యూనివర్సల్’ తెచ్చివ్వు!”

ఆల్ఫా వ్యవస్థకి చెందిన అఘోరా అస్థిపంజరాలు మొదట వారి భాషలో ఏదేదో మాట్లాడాయి. తర్వాత యూనివర్సల్ డిజిటల్ లాంగ్వేజ్‌ లోకి మారారు.

“హనీ వెళ్ళు! కేవలం చుట్టూ నడు! ఆ ఫలకం చుట్టూ నీలం కాంతి ఉంటుంది. దాన్ని తీసుకుని వెనక్కి వచ్చేయ్!”

మరో మార్గం లేదు.

“దయ చూపండి! ప్రభూ! చక్రవర్తి సమారా! దయచేసి నాతో పాటు యురేకస్‌ని తీసుకెళ్ళడానికి నన్ను అనుమతించండి” అన్నాను.

“అలాగే! మేము దానిని కేబుల్ కడతాం, అది కూడా నీతో పాటు తేలుతుంది. ఒకవేళ అది డీప్ స్పేస్‌లోకి జారిపోయినట్లయితే అంతే సంగతులు!”

కాసేపటికి నేను, కుజగ్రహవాసి వాన్ కు జాక్, చంద్రగ్రహవాసి చాంద్, జంతువులాంటి మనిషైన ఏనిమోయిడ్, నా రోబో యురేకస్ స్పేస్‌క్రాఫ్ట్ తలుపు వద్ద నిలబడ్డాం. వారు ‘వెళ్ళండి!’ అనగానే – మా గురుత్వాకర్షణ మరియు ఆక్సిజన్ సూట్లకి కేబుల్ తగిలించుకుని మేము అంతరిక్షంలోకి దూకేసాం.

***

అధ్యాయం 24: ఎంపికైన వ్యక్తి

అంధకారపు అంతరిక్షం నేపథ్యంలో అది ఒక సొగసైన వెండి సముద్రంలా ఉంది. మేము అంతరిక్షంలో తేలుతూ, కక్ష్యలో పరిభ్రమిస్తున్న సౌర ఫలకాలను చేరుకున్నప్పుడు, వాటి నుండి అద్భుతమైన తెల్లటి కాంతి విడుదలవుతోంది. మేము… ముసుగులు ధరించిన నలుగురుం.. నల్లని మచ్చల వలె ఆ ఫలకలపైకి ఎక్కాం. మేము ఒకరితో ఒకరు మాట్లాడుకోగలిగాం కానీ పవర్ జనరేటర్ల శబ్దం మాత్రం మాకు వినబడడం లేదు. సమురా యొక్క స్పేస్‌షిప్ దూరంగా తేలుతోంది. మా దుస్తులకి తగిలించిన తాళ్ళు దానికి జోడించబడ్డాయి.

“నేను కదిలే వేదికను చూస్తూ ఒకే స్థలంలో ఉంటాను, ఆ అద్దం కోసం చూస్తాను” అన్నాను. ఆ సౌర ఫలకల చుట్టూ నేను పరిగెత్తలేను ఎందుకంటే కుక్కని గూడుకి కట్టేసినట్టు, నన్ను స్పేష్‌షిప్‌కి కట్టేసారు. మేమంతా స్పేస్‌షిప్ పాటు కదులుతున్నాం.

యురేకస్ కూడా స్పేస్‌షిప్‍కి తగిలించిన కేబుల్‌తో శూన్యంలో తేలుతుంది.

“మిత్రులారా, సౌర ఫలకలలో నీలం లేదా ఆకుపచ్చ కాంతివలయం కోసం చూడండి. అది విశ్వశక్తి నాణ్యతని ప్రతిఫలిస్తుంది. మిర్రర్ ఆఫ్ యూనివర్సల్ కమ్యూనికేషన్ ఇక్కడ ఉన్నట్లయితే బాగా ప్రకాశిస్తూంటుంది” అన్నాను.

కొన్ని నిమిషాలు గడిచాయి. సౌర ఫలకాలు కదులుతూనే ఉన్నాయి. చంద్రుడి కాలంలో ఒక గంట గడించింది. నాకేదైనా కనబడుతుందని నేను ఊహించలేదు.

వాన్ కు జాక్, ఇతరులు నా వెనుకగా తేలుతున్నారు. చాంద్ తన చంద్రుని మాండలికంలో ఉచ్ఛస్వరంలో వణుకుతున్న స్వరంతో ఒక పాట పాడాడు.

“చంద్రుని ధ్వనులలో ఏకత్వం లేదని; బిలాలు లోతుగా ఉన్నాయనీ, పర్వతాలు ఎత్తుగా ఉన్నాయనీ; అది చల్లగా ఉందనీ; కానీ తన ప్రేమ శాశ్వతమైనదనీ ఆ పాటకి అర్థం…” అని యురేకస్ అనువదించింది. “మిస్టర్ చాంద్ చంద్ర మాండలికంలో పాప్ గాయకుడు!” అంది.

అప్పుడు కనబడిందది. కదిలే ప్లాట్‌ఫాం మీద అన్ని తెల్లని సౌర ఫలకాల మధ్యగా ఆకుపచ్చ రంగును చూడగలిగాను.

అది సమీపంలోకి, మరింత దగ్గరగా వచ్చింది. అది నా పాదాల క్రిందకి వచ్చినప్పుడు అది లేత ఆకుపచ్చ మరియు నీలంలో మెరుస్తూ కనబడింది.

“హుర్రే!” అరిచాను.

ఇతరులు దానిని చూడలేకపోవడంతో ఎలాంటి శబ్దాలు చేయలేదు.

నేను నా బలమంతా ఉపయోగించి ఆ ఫలకని బయటకి లాగాను.

అది చాలా దృఢంగా ఉంది, అతి కష్టం మీద వెలికి వచ్చింది.

దాంతో పాటు ఒక పురాతన చర్మపత్రపు కాగితం ఎగిరి వచ్చింది. ఇప్పుడు నాలో వివేకం ఉంది, దాన్ని అందుకుని చదివాను.

స్పేస్ స్యూట్‌కి అమర్చిన గాగుల్స్ ద్వారా నేను బూడిదరంగులో ఉన్న గతకాలపు చర్మపత్రం మీదున్న నల్ల అక్షరాలను చదివాను…

“ఈ సౌరశక్తి ఫలకల దాకా వచ్చి దీన్ని కనుగొన్న ఓ భాగ్యశాలీ!  ఇదే యూనివర్సల్ మిర్రర్. మీరు సౌర వ్యవస్థలో ఏ ప్రదేశన్నైనా; పాలపుంత గెలాక్సీలోని కొన్ని ప్రదేశాలను దీనితో చూడవచ్చు. కానీ మీరు దీన్ని మంచి కోసమే ఉపయోగించాలి. దురాశ లేదా బ్లాక్‌మెయిల్ లేదా హత్యల కోసం ఉపయోగించకూడదు. మీరు స్వార్థ ప్రయోజనాల కోసం దీనిని ఉపయోగిస్తే మీ కంటిచూపు పోతుంది.”

“ఓహ్!” అంటూ మిగతావాళ్ళతో అన్నాను “నాకా అద్దం దొరికింది!”

ఈసారి నేను ఆ అద్దాన్నీ, దాంతో పాటు ఆ చర్మపత్రాన్ని సమూరాకి ఇచ్చేయాలని నిర్ణయించుకున్నాను. అతను తన కంటి చూపును కోల్పోడం నాకిష్టం లేదు.

అతనెలాగూ దుర్మార్గుడే.

ఇంతలో యురేకస్ “అభినందనలు మాస్టర్! విశ్వశక్తి తరంగాలని నేనిప్పుడే గ్రహించాను. మీకా అద్దం లభించింది!” అంది.

స్పేస్‌షిప్ నుండి మరొక గొంతు వినబడింది. “నేను చక్రవర్తి సమూరాని. హనీ, ఓ మానవా! నీకు అభినందనలు! నేను తగినంత ధన్యవాదాలు చెప్పలేను. ఇప్పుడు దాన్ని సురక్షితంగా స్పేస్‌షిప్‌లోకి తీసుకురా. వెంటనే! జిత్తులు వద్దు!”

అయితే నా ప్రకృతి వాళ్ళ దగ్గరే ఉంది. నేను వారికా అద్దం ఇవ్వకపోతే, ఆమ్రపాలిలో నా మామగారు మాహా తన ప్రాణాలు కోల్పోతారు.

“ప్రభూ, మేము వస్తున్నాము” నేను అరిచాను. “ఎవరికీ ఎటువంటి హాని చేయకండి! నా ప్రకృతికి ఏ ప్రమాదం తలపెట్టకండి” అన్నాను.

“సరే! ఏ ఇబ్బంది లేదు! రండి! నువ్వు తెలివైనవాడివి! హా! హా! మంచి వృద్ధ మాంత్రికుల సంఘం వారి ఈ సరదా వస్తువులను కనుగొనేందుకు నిజంగానే నువ్వు ఎంపికైన వ్యక్తివి”.

మేమంతా వెనుతిరిగి, తేలుతూ వ్యోమనౌక వైపు కదిలాం. నౌక సమీపంలోకి రాగానే మా అందరినీ లోపలికి లాగారు. అప్పుడు ఎయిర్ లాక్ తెరుచుకుంది, మేమంతా స్పేస్‌షిప్‌లోకి ప్రవేశించాం.

నేను సమూరాకి నమస్కరించి, పెద్ద కార్బన్ నానో ప్లేట్ లాగా ఉన్న ఆ అద్దాన్ని అతని ముందు ఉంచాను. జోస్యంతో ఉన్న చర్మ పత్రాన్ని కూడా అందించాను.

“హా! హా! ఇప్పుడు నువ్వు ప్రతిదీ చెబుతున్నావు! దుర్మార్గాలు చేయకూడదని ఇది చెబుతోంది. ఆ వృద్ధ మాంత్రికులు మూర్ఖులు. మంచి చర్యలతో విశ్వాన్ని ఎవరు జయిస్తారు? యుద్ధంలోనూ ప్రేమలోనూ ప్రతీదీ న్యాయమైనదే!” అని చెబుతూ “హా! హా!” నవ్వాడు సమూరా.

సాగిన తలలో ఉన్న ఆల్ఫా వ్యవస్థ మాంత్రికులు నవ్వుతున్నట్టుగా శబ్దాలు చేశారు.

“ఇప్పుడు నేను దీన్ని పరీక్షిస్తాను” అంటూ, “నాకు గనీమీడ్ రాజధానిని చూపించు” అని సమూరా అద్దాన్ని ఆదేశించాడు.

ఏనిమాయిడ్ గుర్రుమన్నాడు. అతను గనీమీడ్ నుండి వచ్చాడు.

గురుగ్రహపు ఉపగ్రహమైన గనీమీడ్ రాజధాని నగరం అద్దంలో ప్రత్యక్షమైంది. భూమికి చెందిన మానవులు నివాసం ఏర్పరుచుకున్న నివాస కాలనీ ఒకటి కనబడింది. నేను కాస్త వొంగి ఆసక్తిగా చూశాను.

భారీ పర్వత లోయలు, గుమ్మటపు ఆకారంలోని నిర్మాణాలు, గనీమీడ్ రాజభవనం గోచరించాయి. కొమ్ములతో ఒకదానినొకటి ఢీ కొడుతున్న గేదెల లోహపు ముద్ర కనబడింది.

నేను ఆశ్చర్యపోయాను.

“ఎందుకు గనీమీడ్?” అంటూ అరిచాను.

“ఎందుకంటే మనం ఇప్పుడు అక్కడికి వెళ్తున్నాం. ‘టూట్ డి స్యూట్’ (ఫ్రెంచ్ భాషలో ‘వెంటనే’).  గురుగ్రహపు మంత్రదండం కోసం వెళుతున్నాము! హా! హ!”

“వద్దు! ప్రభూ! ముందు మమ్మల్ని విడుదల చేయండి! మహా క్షేమంగా ఉన్నారని నాకు చూపించండి!”

తెర మీద మామిడి చెట్టుతో ఉన్న అమ్రాపాలి గ్రామం బొమ్మ వచ్చింది. మహా ఇప్పుడు స్వేచ్ఛగా ఉన్నారు. ఆయన రోడ్డు మీద నడుస్తున్నారు. కత్తులు ధరించిన ఉగ్రవాదులు ఆయన పక్కన లేరు.

“ధన్యవాదాలు! ఇప్పుడు ప్రకృతిని వదిలి మనం వెళ్దాం!”

“కుదరదు…! ఎలా వదిలేయగలను? నా ప్రయాణంలో మీరిద్దరూ ముఖ్యమైనవాళ్ళే. ఈ గొప్ప అంతరిక్ష నౌకలో మీరు ఆ అద్భుత వస్తువులని కనుగొనడానికి గనీమీడ్‌కు, టైటాన్‌కు వస్తారు, ఆ తర్వాత నేను మిమ్మల్ని వదిలేస్తాను! ఇది అర్థం చేసుకోలేనంత మూర్ఖుడివి కాదు నువ్వు” అన్నాడు సమూరా.

నా బృంద సభ్యులందరూ వారి భాషల్లో నిరసనలగా అరిచారు.

ప్రకృతి తన మాతృభాష హిందీ లోకి మారింది. “నహీ! నహీ! యహ్ ఖతర్నాక్ కో మార్ డాలో!” అంది.

నేను నిశ్శబ్దంగా నిలబడి ఉన్నాను.

“ఓహ్! మనకి వేరే మార్గం లేదు మాస్టర్! ఈ స్పేస్‍షిప్‌లో మీరు పోరాడలేరు లేదా విశ్వశక్తి ఉపయోగించలేరు. మీరేదైనా గ్రహం యొక్క నేలమీద దిగితే ఏవైనా ప్రణాళికలు రూపొందించవచ్చు! తప్పించుకోవడానికి ప్రణాళికలు! ఇక్కడ మీరూ, మీ బృందం మనుగడ సాగించలేరు. ఇది ఆల్ఫా వ్యవస్థకి చెందిన స్పేస్‌షిప్. మీరు విశ్వశక్తిని ఉపయోగిస్తే కాలిపోతుంది. అయితే వాళ్ళు కాలిపోరు, కానీ మీరు… “

నేను లొంగిపోయాను.

“సరే! ప్రభూ! కనీసం ప్రకృతికి స్వేచ్ఛ కల్పించండి! మేము మీతో వస్తాము. మంత్రదండమో, ఇంకేదో.. దాన్ని కనుగొంటాము. ఇది నా వాగ్దానం” అన్నాను. ప్రకృతి బంధనాలు విడిపోయాయి, నా వైపుకు నడిచివచ్చి నన్ను హత్తుకుంది. స్పేస్‌షిప్ గట్టిగా గర్జించి ఆస్టరాయిడ్ బెల్ట్ దిశలో కదిలింది. ముందుగా గురుగ్రహం చేరుకుని, అక్కడ నుండి దాని ఉపగ్రహమైన గనీమీడ్ చేరుకోవడానికి ప్రయాణం సాగించింది.

సమూరా, ఆల్ఫా అస్థిపంజర మాంత్రికుల వికటాట్టహాసాలు; తలవెనక్కి తిరిగి ఉన్న మంత్రగత్తె సయోని కేకలు మా ప్రయాణంలో ప్రతిధ్వనిస్తూనే ఉన్నాయి.

***

(సశేషం)