[dropcap]ఎ[/dropcap]వరి కోసం ఎప్పుడాగక, మౌన సాక్షిగ సాగిపోయే
చివరె లేని కాలరూప రథము కేది లెక్కయే లేదు!√√
ఆదివారమను, బూదివారమను, రెండు సమానమే,
ఏది శతాబ్దేది ఉగా దేది పట్టదా బండి మెదడుకు!√√
పండుగని, పబ్బమని ఉబ్బి కబ్బముల నింపువాడు
ఎండి, ఆశలెండి, నిట్టూర్పు లూర్చువాడు ఈ మనిషే!√√
కడుపు నిండని బడుగు మనిషికి, లేనె లేదెపుడు పని,
గడుసు కోయిళ్ళ ఆకుటూయళ్ళ గీతాల ఆమనులతో! √√
రెక్కాడితేనె ఆడు డొక్క కొక్కటే, వినబడే ఆ సంగీతం ,
లెక్క తప్పని తాళంతో,చుట్టి వేసే తన ప్రేవుల గీతం!√√
ఎవరి కోసం ఉగాదుల, ఈ పంచాంగపు గ్రహ మార్పుల
రివాజు ఉత్సవాలు, స్తోత్రాలు, రిక్తహస్తాల దానాలు?!√√
మనిషియె పట్టని ఘనాపాఠుల కేల నీరాజనాలు?!
అణచటమే హక్కను నిర్దయ కేల వ్రృథా కైవారాలు! √√
ఒక్కడి కోస మంద రందరి కోసం ఒక్కడన్నది హుళక్కి!
చెక్కుచెదరక నే నొక్కడి నుంటే చాలు, అదే లక్ష్యం, మోక్షం!√√
ఇక తా నొచ్చానని కొసరి కొసరి కూసే కోయిల రాకతో
లోకం చేసే శుష్కార్భాటం కాదా, యీ ఉగాది నాటకం!?√√
మనిషికి, మాటకు, సత్యనిష్ఠకు, ఏ వని స్వాగతమనగ
ఆ నిరవధిక స్వేచ్ఛా సురభి అందర కందునో, నాడె ఉగాది! √√
ఆలోచనల తావులకు, ఊహల విరులకే అడ్డుగోడల
నిలపాలని ఏ నాడనుకోమో, నాడే ఆ అచ్చపు ఉగాది!√√
ప్రకృతిని విను మనిషి, ప్రజ నాదరించు ప్రభుత నాందులు
ఏ కోయిల విన్పించని ఆనంద గీతుల సిసలైన ఉగాదికి!!√√
ఇది నైరాశ్యం కాదు, విప్లవ మసలె కాదు, ఒక హెచ్చరికే!
ఏ సంఘం మూలం మరుస్తుందో, దాని తుదికిది ఆది యని√√
మూలం మనిషి, ఆలంబన ప్రకృతి, రెంటి రక్షె శ్రీకృష్ణ గీత
కాలం చూస్తోంది ఏ రాజుల, ప్రజల బుద్ధెటు మొగ్గుతోందో!√√
ఆ పరీక్షలో మన ఉత్తీర్ణతకు సంకేతమే, చల్లగ చూసేప్రకృతి
ఆ పాటి విచక్షణ లేదో, ఉగాది కనర్హుడవే, ఇదే దాని శాసనం√√
