[dropcap]వి[/dropcap]షయ తీవ్రతను తగ్గించేది విషాన్ని సైతం అమృతంగా మార్చేది ‘హాస్యరసం’. ఇది మనందరికీ అవసరం. ఆరోగ్యానికి హాస్యమే ఆహారం. ఆరోగ్యమే మహా సంపద. ‘సాహిత్య శ్రీ’ కొండూరి కాశీవిశ్వేశ్వరరావు గారు అందిస్తున్న హాస్యరంజని (నవ్వుల శతకం) ఆస్వాదించండి.
91. ట్రాన్‌సిస్టర్
రాజేష్: నీకు ఇంత జనరల్ నాలెడ్జ్ ఎలా వచ్చిందిరా?
శ్రీకృష్ణ: నాకు వినడం వల్ల వచ్చింది.
రాజేష్: ఎవరు చెబితే విన్నావు?
శ్రీకృష్ణ: మా సిస్టర్ చెపితే విన్నాను.
రాజేష్: అసలు నీకు సిస్టర్స్ లేరు కదరా.
శ్రీకృష్ణ: ఒక సిస్టర్ ఉంది.
రాజేష్: నాకు ఎప్పుడూ కన్పించలేదే!
శ్రీకృష్ణ: ఎప్పుడూ ఇంట్లోనే ఉంటుంది, బయటకు రాదు.
రాజేష్: నన్ను సతాయించకు రా, ఆ సిస్టర్ ఎవరో, ఎలా ఉంటుందో త్వరగా చెప్పరా!
శ్రీకృష్ణ: మా ఇంట్లో ఉంటుంది. రోజూ ఎంతో విజ్ఞానమిస్తుంది. వినోదాన్నిస్తుంది. అదే ట్రాన్‌సిస్టర్!
92. కంద పద్యము
ఆచార్యులు: శిష్యా! కంద పద్యము గూర్చి వివరించుము.
శిష్యుడు: గురువు గారూ! కంద కూర వండుట ఎంత కష్టమో, కంద పద్యము రచించుట అంత కష్టము.
93. డుమ్మా
యాంకరి: మీరు తీయబోయే చిత్ర విచిత్ర సినిమా పేరు ఏమిటో చెప్పండి.
డైరక్టర్: ముందుగా నా పేరు అడగండి.
యాంకరి: క్షమించండి, మీ పేరు ఏమిటి?
డైరక్టర్: నా పేరు ‘గైర్‌హాజర్ రాజా’. నేను స్కూలు, కాలేజీ క్లాసులకు గైర్హాజరై దాదాపు తెలుగులో వచ్చిన సినిమాలను చూసేశాను.
యాంకరి: ఓహో! అందుకేనా! మీరు ఇన్ని సినిమాలు తీయగలిగారు.
డైరక్టర్: ఔను! ఇది నా అనుభవం.
యాంకరి: ఇప్పుడు చెప్పండి మీ చిత్ర విచిత్ర సినిమా పేరు ఏమిటో?
డైరక్టర్: ‘డుమ్మా’.
94. తెర వెనుక
నాయకుడు: ఇదేమిటయ్యా! పార్టీ కార్యాలయంలో తెర కట్టారెందుకు?
కార్యకర్త: అప్పుడప్పుడూ మనం తెర వెనుక రాజకీయాలు కూడా చెయ్యాలి అని నిన్న మీటింగులో మీరే చెప్పారు కదా! అందుకనే తెర కట్టాను సార్!
95. శవానంద్
యాంకరి: మీకు ప్రత్యేక అవార్డు ఏ పాత్రకిచ్చారు?
శవానంద్: సహజంగా నటించినందుకు
యాంకరి: అదే ఏ పాత్రలో నటించారు, సారీ.. జీవించారు?
శవానంద్: శవంగా సహజంగా నటించినందుకు.
96. తప్పట్లు – చప్పట్లు
పండిట్: తప్పట్లకీ, చప్పట్లకీ తేడా ఏమిటిరా?
పండరి: విషయం నచ్చినా, నచ్చకపోయినా ఏదో తప్పదన్నట్లు కొట్టేవి తప్పట్లు, ఇక చప్పచప్పని ప్రసంగాలకు కొట్టేవి చప్పట్లు.
97. సర్పంచ్
టీచర్: సర్పంచ్ అంటే ఎవరు?
మున్నా: సర్‌ఛార్జి కట్టడానికి పంచె కట్టుకొని ఆఫీసుకు వెళ్ళేవాడే సర్పంచ్ సార్!
98. కెమిస్ట్రీ
హేమంత్: నువు డిగ్రీలో స్పెషల్‌గా ఏం తీసుకున్నావ్?
వెంకట్: నేను కెమిస్ట్రీ తీసుకున్నాను రా.
హేమంత్: కెమిస్ట్రీ చాలా కష్టమైనదిగా, అది ఎందుకు తీసుకున్నావు?
వెంకట్: నా గర్ల్ ఫ్రెండ్‌తో కెమిస్ట్రీ బాగా కుదురుతుందని!
99. డంపింగ్ ప్లానెట్
వినయ్: ఏంటిరా అంత సంతోషంగా, నీలో నువ్వే నవ్వేసుకుంటున్నావు?
అజయ్: నాకో సూపర్ ఐడియా వచ్చిందిరా!
వినయ్: అదేంటో చెప్పరా.
అజయ్: మన భూమ్మీద చెత్త పడేయాటానికి డంపింగ్ యార్డులే లేవు కదా.
వినయ్: ఇదేమైనా కొత్త విషయమా?
అజయ్: ముమ్మాటికీ కొత్త విషయమేరా! నా ఐడియా, పరిశోధనలు మెచ్చి ప్రభుత్వం నాకు అవార్డ్ కూడా ఇస్తుందిరా.
వినయ్: అది ఏమిటో చెప్పరా.
అజయ్: మనం పడేసే చెత్తా చెదారాలన్నీ వేరే గ్రహం మీద పడవేస్తే అసలు మనకు డంపింగ్ యార్డ్ చెత్త సమస్యలు ఉండవు కదరా!
100. వెబ్ కౌన్సిలింగ్
పేరెంట్: ఇదేమిటయ్యా విద్యార్థులకు ‘వెబ్ కౌన్సిలింగ్’ ఈ పాడుబడ్డ భవనంలో పెట్టారు? పైగా ఈ భవనం కూలిపోయేలాగా కూడా ఉంది! ఆఁ..
నిర్వాకం: వెబ్ అంటే సాలెగూడే కదా! అలాంటి సాలెగూళ్ళు ఇక్కడ చాలా ఉన్నాయి. అందుకనే కౌన్సిలింగ్ ఏర్పాటు చేశాం.
(మళ్ళీ కలుద్దాం)
