ప్రసిద్ధ హిందీ/ఉర్దూ కవి, సినీ గీత రచయిత శ్రీ జావేద్ అఖ్తర్ కవితల సంపుటి ‘ఇన్ అదర్ వర్డ్స్’ లోని కవితలను సంచిక పాఠకులకు తెలుగులో అందిస్తున్నారు శ్రీ వారాల ఆనంద్.
మరో సమయానుకూల ఆలోచన
పిల్లలు
పులుల, ఏనుగుల రూపాల్ని
మేఘాల ఆకారాల్లో చూసినట్టు
ఓ ఆలోచన తళుక్కుమంటుంది
చాలా మంది కాలంలో
జ్ఞానాన్నీ, దార్శనికతని గ్రహిస్తారు
చాలామందికి ఆ విశ్వాసపు ఛాయల్లో
తమ వెతుకులాటకు ముగింపు కూడా లభిస్తుంది
మనం కాలం అనుకుంటున్నది
నిజానికి ‘దైవం’
కానీ
సత్యాన్ని వెతికే వారు
కాలమంటే ఏమిటి అన్న ప్రశ్నను
తమ హృదయపు లోతుల్లోనూ
తమ ఆలోచనల్లోనూ నింపుకుని
సంచరిస్తూనే వుంటారు
మూలం: జావేద్ అఖ్తర్
తెలుగు: వారాల ఆనంద్