[box type=’note’ fontsize=’16’] రాజ్యాంగ నిర్మాత, డా. బి.ఆర్. అంబేద్కర్ జయంతి సందర్భంగా వారిని కవితాత్మకంగా స్మరించుకుంటున్నారు కుంచె చింతాలక్ష్మీనారాయణ. [/box]
చిక్కుముడుల జీవితాలకు
నీ జీవితాన్నే నిదర్శనంగా నిలిపిన
ఓ ఆదర్శమూర్తీ…
దీపపు వెలుగు నీడ భాగాన
చీకటి బతుకులను చైతన్య పరిచిన
ఓ చైతన్య కారకుడా…
గొంతు దాటని ప్రశ్నల మాటలకు
ధైర్యరసాన్ని నూరిపోపిన
ఓ వైద్యుడా…
శాపంగా మారిన బ్రతుకులకు
మోక్షాన్ని ప్రసాదించిన
ఓ మునీశ్వరా…
ముళ్ళ బాటను కాస్తా
రాచబాటగా మార్చిన
ఓ సమాజ నిర్మాతా…
దేవాలయపు గోపురపు నీడ తాకలేని
దళితజాతికి రక్షగా గ్రంథాన్ని నడిపిన
ఓ మహారథ సారధీ…
మానవజాతిని మలినం చేసి
దళిత జాతిగా విడగొట్టినా…
అణగారినవర్గ దర్మశాస్త్ర పండితుడుగా ఎదిగి
దళితజాతి వనంలో దళిత పుష్పమై
సుగంధ పరిమళంతో
తన అక్షరాలతో మలినం కడిగిన
ఓ మహాగ్రంథకర్తా…
రామరాజ్యాన్ని
రాజ్యాంగ రాజ్యంగా మార్చి
పరిపాలనలో దిశానిర్దేశాన్ని చూపి
ఓ గొప్ప సంఘ సంస్కర్తవై
భారతరాజ్యాంగ రూపకర్తవై
దళిత జాతి రత్నమై
నలువైపులా కాంతులీనుతున్నావు!!
-కుంచె చింతాలక్ష్మీనారాయణ
